洋蔥黑椒汁炆鹹豬手

1. 鹹手1隻拆去包裝，汆水5-10分鐘，撈起沖洗乾淨，用廚房紙抹乾。
2. 原粒胡椒粒適量，另同等份量黑椒粒用石盅搗碎。

我用依隻Rainbow Peppercorn，
有pink, green, white, black + pimento 5種唔同胡椒粒~
全部用哂黑胡椒都可以架!


3. 燒熱少許油，下(2)爆出胡椒味，放入鹹手煎至皮表面金黃微焦。


4. 將(3)放入炆鍋中，加入滾水至浸及手約一半。


5. 下牛湯精1塊、冰糖約1個乒乓波份量和老抽約5湯匙拌勻煮滾。


6. 蓋上鍋蓋，轉小火炆至皮肉鬆化，期間間中反轉手，以筷子插入手來測試是否夠鬆化。


7. 起油鑊爆香蒜蓉，再下洋蔥絲1個爆香，加入(6)內再煮5-10分鐘。


8. 撈起手先上碟，大火煮滾炆手的汁，下喼汁1湯匙和少許雞粉調味。
9. 勾粟粉水芡至汁稠，洋蔥和汁淋在手上。


10. 最後灑上少許鮮露即成。

NOTE

- 鹹手有無煙過都無所謂，不過要記住 - 隻鹹手要係生既!

- 炆手時間視乎手大小! 我依隻炆咗大約1.5粒鐘~

- 想炆到皮肉用筷子一篤就散，可以先炆1小時，熄火焗30分鐘，再開火煮滾後轉回小火炆多1小時。

- 反轉手時要溫柔! 否則好容易整爛塊皮~