懷念故友 – 雲片糕食譜

有睇開我blog既blog友應該會知道，
阿V細個時同V婆婆V阿姨一齊住喺長洲，
每逢乜節物節放長假期時，
先會返去V爸爸V媽媽九龍既屋企渡假~
果時放假除咗好開心可以見到V爸爸V媽媽之外，
仲好興奮因為可以同鄰居兩姐弟一齊玩!
(BB + K仔 – 化名! 唔係吳XX呀!! )

記得小學時有一次農曆新年假期，
同BB + K仔一齊玩緊，佢地突然比咗2封利是我，
BB仲同我講咗句”利利是是”!
我裝過利是封裡面，
全部係碎銀，有幾個銀仔 + 幾個毫子，
我好記得2封利是夾埋有$8.5，好鬼豪!
我細個時收到既新年利是都要上繳V媽媽，
當我誠實地上繳時.......

V媽媽奇怪地問: Auntie咪比咗利是妳咯喎! (即BB + K仔既媽咪)

我: 唔係Auntie比架，係BB + K仔比我架! 咁我洗唔洗比返利是佢地架?

好明顯當時既小朋友根本唔知道派利是係咩一回事!
最後由V媽媽將利是交返比Auntie物歸原主~


另外有一次令我覺得好深刻好感動......
聖誕假期，我生日當日腸胃炎兼發高燒，
剛喺洗手間嘔完出來，BB搵我一齊玩，
佢見到我個病貓樣問我咩事，
我話比BB知我病咗 + 今日係我生日~
佢用同情既眼光望住我，叫我好好休息，
過咗唔知幾耐突然有人敲門......
BB攞住一張佢親手畫既生日咭送比我，
當時我地2個都剛開始學鋼琴，
佢生日咭裡面畫咗一個簡單生日歌五線譜~
依張生日咭我依然保留到而家......


細個時既我好憎食飯! (大家係咪覺得好意外呢? )
所以V媽媽從來都唔買零食比我!
不過佢地兩姐弟經常有好多我未見過既新奇茶點零食，
佢地仲會請埋我分甘同味~
我第一次食雲片糕，就係BB請我食架嘞!

BB請我食果種雲片糕係長方形，
大約威化餅咁上下大細 + 厚薄~
裡面夾住一層半透明唔知咩來既甜餡，
我好鬼憎果舊餡!
當時心唸: 如果無咗舊餡，成塊都係白色既雲片糕就好嘞!!
今日，我終於可以食到完全無餡既雲片糕.........


-----------------------------------------

製作雲片糕材料可分成兩部份 - 糕粉 + 潤糖，
兩部份比例為1:1~

糕粉aka加工粉或潮州粉，即係熟既糯米粉;
糯米經過熱水泡浸 > 冷水泡浸 > 靜置風乾 >
炒熟 > 磨粉 > 過篩及陳化7個工序加工而成;
多用於製作中式糕點如冰皮月餅、香蕉糕等;
吸水力強，遇水即黏連，製成品口感軟滑帶黏性，
現成糕粉市面烘焙店有售~
製作潤糖配方比例:
70%糖霜icing sugar、20%油、5%清水 + 5%麥芽糖或糖漿~


1. 糖霜210g、菜油60g 、清水15g、糖漿15g全部放進大碗中拌勻成300g潤糖。

2. 將(1)加入300g的糕粉中，用pastry cutter拌好。

3. 拌好後材料應呈麵包糠狀。

4. 將(3)過篩一次。


5. 將(4)放入長形糕模內，用刮刀抹平。

6. 用另一個平底模大力 + 平均地壓實 – 要用啜奶既力去壓!
否則糕好容易會散開架!!

7. 用烘焙紙蓋住糕模，蒸鍋中燒滾水後熄火，將糕模放入蒸鍋中焗5分鐘。


8. 倒扣糕模將糕脫模切件(我一開4!)。


9. 碟墊上烘焙紙，放上糕件後再另外蓋上烘焙紙。


10. 再燒滾蒸鍋中的水後熄火，將(9)放入再焗5分鐘。

11. 取出繼續蓋住烘焙紙待完全涼後，在每件糕表面掃上少許糕粉，切片即可食用。


P.S. 可加入各類切碎果乾或果仁，
e.g. 提子乾、芒果乾、杏子乾、合桃、花生、開心果......等~
將Step(4)過篩後的材料均分成2份，
在Step(5)先平鋪一份材料進糕模，
平均地鋪上果乾或果仁，
然後再將餘下一份材料鋪平大力壓實。


後記

後來唔知發生咗咩事，
我地兩家大人不咬弦變到不瞅不睬，
(等我遲d問吓V媽媽先!)
雖然兩家人互相唔妥，
但V媽媽教我見到BB既爸爸媽媽時，
仍然要有禮貌打招呼~
不過自此我就無再同兩姐弟一齊玩.......

我小學畢業後我同返V爸爸V媽媽一齊住，
我地搬咗去舊居隔離街~
搬屋後我打過一次電話比BB，
告知我新屋企電話，
不過佢一次都無打過比我，
就係咁我地既友誼無疾而終......

聽V爸爸講，咁多年來佢經常都會撞到BB既爸爸，
佢地亦會吹吓水講吓近況~ (男人氣量總係比較大嘛!)
得知佢地仍然住緊喺舊居，
不過由我地搬走到而家，
V媽媽 + 我都從來無撞見過佢地!

唔知將來我有無機會同依位故友重逢呢?
如果有緣遇見，我地仲會唔會認得對方呢??