我們的平淡新年

恭喜發財! 祝大家牛年行大運~ 身體強壯如牛~ 事事如意想果樣有果樣!!!

我同老公過咗一個超平淡既年廿九 + 年三十。由於感冒未清，2個都有咳，所以星期六年廿九出咗去泗和行買餸之後，依2日都係留喺屋企休息，睇吓書睇吓DVD打吓機咁~~ 好奇怪 - 唔知點今個星期六泗和行特別多鬼佬????

多過中國人好多!!!

因為咳連團年飯都冇煮...反正唔食得鮑魚又唔食得雞，但年飯冇雞冇鮑魚點似樣呢?? 所以索性唔煮!!!

今日咳已好返好多! 不過今日係年初一，雖然99去咗加拿大過年，但今晚照樣要去62度食年飯~ 如無意外聽日初二我會補煮年飯 - 開年飯~

雖然我冇煮年飯，依度過農曆新年亦冇乜氣氛~ 不過唔代表我地一d野"新年野"都冇做過! 除咗整咗2底蘿蔔糕之外......

我地換咗新枕頭床單被單!  

枕頭係早前買既，不過特別等到新年先用~~~~

 依2個搞笑枕袋有段故仔既......

話說幾年前我無意中睇到一本過期東週刊，裡面有一篇講夫妻 / 情侶關係既文章，文章背景用依對枕袋做插圖，我對依對枕袋一見鍾情!

 老公都話好得意~ 因為只係做插圖既關係，所以東週冇列明邊度有得賣，而我亦上過網搵過好多次，都係冇結果~ 後來慢慢我就淡忘咗嘞......

直至2個月前返香港...返英國前一日，我地去加連威老道太平館食乳鴿，落車後行去太平館時，經過一幢大廈，樓下有一個叫"i Room Lifestyle" 既樓上舖廣告，廣告中有依對枕袋既相! 我即時歡呼~~~~

即時上樓!!!! (特登去搵一樣野的話...多數都搵唔到! 到妳放棄唔再搵，佢又會自己鼠出來......!!!)

"i Room Lifestyle" 有好多好有sense of humour 既家居用品，而我睇中既枕袋，係一個叫做"Human Touch" 既泰國品牌~~~~

唔知大家有冇睇"珠光寶氣"呢??? 賀哲男 + 康雅瞳成日攞住果對公仔咖啡杯，就係出自"Human Touch" 架嘞!

 我 + 老公都有臨瞓前睇書既習慣，所以特別買多個4呎長既長枕連枕套用來睇書~ (公仔一樣好搞笑!!! )

不過Human Touch 只得枕袋冇床單被單，所以我要自己配返純白色既床單被單!!! 喺英國要搵質地好既簡單純白色床單被單一d都唔容易~~~ 大部份都有老土花紋.......

 最後好彩比我喺M&S 搵到!

店員話老公"好特別"! 因為佢地見好多couple 上來，個女既話抆耳仔枕袋好得意，但個男既就話"唔好啦~~~" 好少男仔好似老公咁話好喎!

介意既男仔們...其實咁先有sense of humour 嘛~ 何必咁認真呢?

 除咗新床單被單......我地喺香港仲買咗新毛巾~ 係咪好襯我地呢??  我特別留返過農曆新年先用架!