Stock Pot...Out Of Stock?!?!!!

我真係好討厭英國既冬天!!!!!

頂~~~ 上星期雖然成個星期又凍又毛毛雨，但有一兩日間中都出過吓陽光; 點知到咗weekend 仲衰 - 星期六、日連續兩日出面都係橫風橫雨! 樹被吹到左搖右擺......但今日一早又陽光普照喎!!! 真係吹脹~~~~

大佬呀...weekend 一個星期先得一次咋~ 要落雨唔該留返weekdays 啦!!!

 我係非常怕凍既人~ 一出街就要包到成隻粽咁!!!

不過英國好多室內既公眾場所，一到冬天就開行哂暖氣，包到咁既款，入到室內行一陣...就會好似焗桑拿咁!!!! 一出一入，一冷一熱...咁就好易領野感冒~~~

呻完~ 回正題...

剛過去既weekend 首要任務 - 就係要買返個湯煲!

New Year's Day 果日發現湯煲裡面有溶咗既膠袋，所以成個煲唔要得! 早排見TK Maxx 好多湯煲賣，我當時都心思思架~~不過原本果個又冇問題，無謂咁浪費 + 咁唔環保!

搵足2日...Lakeland, TK Maxx, M&S, Debenhams, Argos...都搵過哂，全部都冇一個湯煲容量大得過4L! 而且選擇好少，最後都係焗住要去返Ikea......

- 雖然喺TK Maxx 搵唔到湯煲，不過都買咗隻新煎pan~ (一早都唸住買架嘞! );

- Ikea 買既湯煲，容量有8L + 尚算好樣，而且好平，£15.65~  不過我最鍾意係佢既膠手柄!  啱啱揼咗果個係金屬柄，我拮煲蓋時成日唔小心辣親......

- 另外仲買咗個玻璃兜用來整蘿蔔糕~~~~

舊年年中開始，我棄用超市膠袋，改用環保袋買餸~ 去Tesco 買野仲可以儲Green Points 添!  而且我覺得用環保袋買餸好潮~ 買餸都買得特別有型!!!!

不過我覺得好多環保袋質地都唔太堅固，好易爛......但堅固果d又太細!

咁啱喺TK Maxx 搵到依個Rip Curl (一個滑浪服裝用品既品牌~) + WWF (World Wide Fund for Nature - 世界自然基金會)，合作出品既熊貓環保袋!

原價要£26~ 但TK Maxx 只賣£9.99!

 我第一眼見到個袋已經覺得好cute!  用料又堅固~~~~

 最緊要係夠大!! 唔洗我下下帶一大叠環保袋出街~~~~
大減價開始水尾，好多店舖做埋依個weekend 就完......

 又比我搵到件我size 既Sexy 閃閃Tube Top 喎~ 依件野超平 - £5! 幾抵玩~~~~

世事真係無奇不有......

尋日橫風橫雨之下去到Ikea，泊好車我同老公就直衝入去門口，突然我見地上一亮，以為有錢執......(比較耐既廚房網友，應該知我 + 老公有個習慣 - 行街時玩執錢! )

 點知我執到既係一個超市手推車代用幣......
咁就冇乜咁奇吖! 但突然老公話: 咦? 後面個公仔係咪Bonnie 來架???? (老公意指Bonnie 果種狗，唔係指真係Bonnie~)

 OMG! 相中狗仔竟然同Bonnie 一樣係Cavalier King Charles Spaniel...仲要同Bonnie 差唔多樣 + 顏色~

連老公都話: This is so weird!!!!