Mr.T 既中文水平

早兩日有網友問我 - Mr.T 係咪竹升?

其實喺廚房打躉得比較耐既網友，都應該知道Mr.T 係竹升來~ 正確d來講，應該話老公係一個識講廣東話，但完全唔識睇 + 唔識寫中文既"假鬼佬" - 會更加貼切!

記得同老公拍拖頭3個星期，我地係全英語對答! 我當時都問過老公識唔識講中文，佢話唔識......直至一次老公同我一齊既時候，99打電話比佢，我聽到老公用半鹹淡廣東話同99對話! (我99英文唔好~)

 於是我問老公: 你究竟識唔識中文架?

 老公: 識講少少.....唔識睇 + 唔識寫，不過講得唔好!

喺我發現老公原來都識講廣東話既時候，我地既對話就開始變成半中半英，直到而家都係......咁究竟我老公既中文有幾唔好呢? 除咗佢自己 + 我既中文名之外，其他中文字一律唔識睇 + 唔識寫! 而且睇見佢寫中文字真係想暈低~~~ 

筆劃錯到離哂大譜!!! 除此之外，老公一知半解既中文水平，完全笑爆咀......

"條女" & "個女"

拍拖初期，有次我同老公提起V爸爸 - 已唔記得係乜事，不過我記得好似係同老公呻V爸爸不是! 具體情況我已唔記得清楚......

老公聽完我呻後，用廣東話同我講: 咁妳係佢(V爸爸)條女來架嘛.........blah blah blah~~~

原來老公當時一直以為 - 廣東話既"條女" = 爸爸 + 女兒既關係!!!

即老公當時認為e.g. 我係V爸爸"條女"; 而我就係老公"個女"~

 我當時好震驚啊~~~~~~ 我即時問清楚老公知唔知道"條女" + "個女"既分別! 結果如我所料......

紏正老公既同時，我亦鄭重地加多句:

 你千其唔可以再搞錯呀!!! 笑Q屎人呀!



老波女 & 菠蘿妹

有次同老公講開中文字，我用紙 + 筆講解過比老公知 - 老婆個"婆"字，上面係個"波"字，下面係個"女"字......

之後老公活學活用，開始間中玩野 - 叫我做"老波女"~

 (個人覺得有少少三級不雅!

)

後來唔知點解，佢開始叫我做"菠蘿妹"!!?!???!

估計係老公想記住"老波女"...從而聯想到"菠蘿"......再久而久之記錯咗做"菠蘿妹"!



強姦個"姦"

朋友Robert + 太太Pauline 現時有3位千金，但Robert 相當恨要仔! 每次佢太太有喜，佢都會廣問朋友 - 覺得佢今次生個仔定女?

我 + 老公知道Pauline 懷第3胎消息當晚......

 老公: 喂~ 妳估今次Robert 生個仔定女呀?

 我: 好老實...我睇今次都應該係女~ 因為Pauline 冇變樣衰!!!

 老公:  點解中國人咁鍾意生一仔一女既?

 我: 因為一個子 + 一個女，加埋係一個"好"字囉~ (我又出動紙 + 筆解釋老公知!)

 我: 好似你、大伯 + 姑仔...兩男一女加埋就係個"嬲"字嘞~ 所以你老豆(即62)個樣咁鬼惡 + 脾氣咁臭!

 老公:  ......咁如果今次Robert 生個仔，會係咩字?

 我: 兩女一男應該唔係字來喎~ 不過都好既，起碼佢地最少會有一個"好"字嘛!

 老公:  咁如果Robert 再生多個女呢? 咁係唔係字?

 我: ......係個"姦"字......

 老公:  咩野係"姦"字????

 我: 強姦個姦呀......

 老公:  (呆咗3秒) 咁我希望佢今次生個仔啦!

結果都係"姦"字......

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

經過我9年幾既訓練，老公既中文水平，已經進步到可以用中文串我既地步!  不過老公仍然有好多我先聽得明，而其他人會搲哂頭既古怪中文......

- 馬路"沉水" - 意即馬路水浸;

- "面油" - 其實係"Menu"，餐牌既意思~ 根據老公所講，係62餐館打工既阿叔同佢講"面油"! 我估計係阿叔們其實講緊中式英語，而老公就誤以為Menu 中文叫"面油"......