一人車仔檔 - 2010年10月25日 (附食譜)

發神經架! 連續2晚臨瞓前check 天氣update - 竟然只得-3!!!!

10月尾之喎，洗唔洗凍得咁過份呀??

凍到連我廚房枝花生油都變咗白白地色........
早幾日見扑友林家歐巴桑Gaile 整咗咖喱魚蛋，搞到我流哂口水~~
雖然我都就快返香港可以大食特食，不過見食物櫃有包豬皮......

Weekend 我又去買咗2包炸魚蛋，星期日晚炆咗大煲咖喱豬皮魚蛋~

其實之前我都整過一次車仔咖喱豬皮魚蛋，不過今次我改咗個食譜少少野仲加好味! (食譜已更新!) 同香港街邊檔一模一樣!! 呵呵~~~~~

 尋日lunch 整咗大碗車仔瀨粉;

晚餐encore 再來一大碗! (不過今次加咗棵小棠菜~ )

本來唸住預埋老公既，點知佢話唔想食湯粉!  天氣咁鬼凍食碗熱辣辣湯粉唔好咩??

話之佢由佢自己去整三文治~

不過我食緊粉時，佢又話想試吓d魚蛋; 一粒又一粒，一粒又一粒......最終足足偷咗我4粒魚蛋!! 
煮果時又話唔食，人地食緊佢偷食又要話好味......衰鬼格!!

我終於忍唔住嘞~~~~~~~~~~~~~~~

我終於忍唔住要買返依枝我人生中食過最好味又最鬼貴既麻油!

我由初來英時開始，一直都係買依隻日本極上胡麻油~ 由我初來英時賣£2.XX，到大約2年前竟然加價加到£4.55 (約56HKD)，我就唔捨得再買來食......轉買香港或台灣麻油!

價錢實在相差太遠嘞! 香港或台灣麻油，最平99p (約12HKD)有交易，其他平均都只係£1.50左右 (約18.5HKD)......

依枝極上胡麻油實在貴到離哂譜!

有網友介紹我日清麻油好正，我都見網上好多人讚好味，但我依度無得賣......

 所以我上次返香港時特登買咗枝來試吓，大約22HKD~

不過我可以話比大家知 - 我試過極上胡麻油之後已經不能自拔，日清唔該行埋一邊!

依2年幾來我試過好多麻油愛的替身，但我始終對極上念念不忘......最終都係要重投極上既懷抱~~~~~~

 不過依枝162.8ml 既死野，如今已經加價加到£5.35 (約66HKD)!!

果日將佢放入購物籃時有少少手震~~~~~~

見到依枝台灣蔭油膏，唔係好知點用不過都買咗先算......

問過林家歐巴桑Gaile，佢話原來係用黑豆整既醬油膏!


廚房通告 (2010年10月26日)

各位網友可能已經發現咗我blog 裡面好多網誌 + 食譜相片死哂圖得返個交叉......

唔洗問阿貴當然又係Yahoo 做既好事啦!

除咗好多死圖之外，我 + 其他好多用戶網誌版頭小圖都顯示唔到!!

依個情況我上星期已經發現咗，我亦填咗表日日追佢地快d整，今朝終於見小圖 + 死圖情況有改善!

我會繼續追佢地快d幫我搞返掂大咋死圖，各位睇食譜既網友請見諒!


 車仔咖喱豬皮魚蛋食譜click here~