二人世界二餸一湯 - 2010年10月4日 (附食譜)

芥菜仔鹹蛋肉片湯; 豆醬排骨 & 上海烤麩

每餐盡可能都要有菜! 依餐個湯有芥菜仔，而且個烤麩都係齋來 - 有筍冇菇有豆有金針，依餐都算多菜~

T家開飯一向都係由Mr.T 裝飯"不"湯既!  不過大家睇吓左上角果碗湯 - 湯裡面好勉強地只得一塊菜葉仔......依碗湯係Mr.T"不"比自己既!

我都知佢係好唔鍾意食菜，但係咪做得太出面呢?? 衰格~~~~

星期日返去6299度食飯，臨走時99比咗大袋自家種芥菜仔我返去滾湯......

尋晚洗菜時差d嚇鬼死! 好鬼多鼻涕蟲呀!!

其實我唔太驚鼻涕蟲，不過我就好驚菜蟲! 而當我每再發現多一條野時，我都會比佢嚇一嚇 - 我要確定係鼻涕蟲而唔係菜蟲先會安心~~

鼻涕蟲足足有6、7條之多!! 果然係餓姦力......

 著緊鞋準備鬆人，99突然大叫老公幫手 - 捉蜘蛛!

好鬼大隻! 大隻過一隻小朋友手掌........


樽楊協成豆醬真係好好用! 用來蒸魚又得，炆雞又得~

 今次用來蒸排骨，方便快手又好味!

上星期整咗大兜烤麩，食唔哂既放入雪櫃雪凍咗，第二日就咁凍食來配熱辣辣新鮮煲白飯.......實在太好味嘞!!!!!!!!!!!!!

 今次一於再整大煲d! 依度我唸夠我食幾日lunch，用來配飯配粥都得! 正~~~~~

上次因為屋企無哂雲耳所以無加到......

 weekend 買咗大包雲耳，不過切完其他材料後覺得好多，所以今次都係無加到!


見網友整涼拌榨菜腎片好鬼正.......

weekend 我又買咗包雞腎來整!

網友大多用火雞腎，一片片大大塊整出來好鬼靚~~~

但我依度有鬼火雞腎咩，雞腎都係最近先見有得賣咋! 而且仲好鬼細隻，所以整出來唔係腎片，係腎粒.......不過總好過無得食既!

尋日唔知係咪為食鬼上身?

 整完盒雞腎又整咗大盒薯仔沙律!
我一定係黐咗線定嘞 - 天氣咁鬼凍竟然仲想食沙律......


 芥菜仔鹹蛋肉片湯食譜click here~

 豆醬排骨食譜click here~

 上海烤麩食譜click here~

 薯仔沙律食譜click here~

>>>>>>>>>>>>>>>>>>>>>>>>>>>>>>>>>>>>>>>>>>>>

 星期六(10月2日)同老公去咗Star Walk 打邊爐~

唔知係咪仲未凍定呢? 依餐好少選擇喎! 又無膏蟹又無蟶子皇......

 不過包埋既中式自助餐，果d椒鹽鮮魷好鬼正!