食上癮既香蔥生雞蛋拌飯

老公話我有一個好大既弱點 -我好容易比電視、雜誌吸引去買/食一樣野.....

e.g. 有時唸極都唔知食咩好，突然見到電視賣KFC廣告，我就會決定想食KFC!


今次依個生雞蛋拌飯都係差唔多咁既情況!

高橋美起既圖文書"星期日的甜蜜早餐"......

裡面有介紹生雞蛋拌飯既做法，一直都覺得好吸引好想試吓!

 生雞蛋拌飯係日本人常見既飲食習慣!

材料簡簡單單只有熱辣辣白飯、新鮮生雞蛋 + 豉油~ 雖然材料簡單，但日本人對生雞蛋拌飯既配料好講究架!

 生雞蛋拌飯專用豉油，一般分開"關西風" + "關東風"2種唔同口味~

另外亦有唔同口味既生雞蛋拌飯專用調味包~

舊年我返香港時曾經喺Sogo 見過一種專用來生食拌飯既日本雞蛋; 

喺日本甚至有包埋雞蛋既生雞蛋拌飯禮盒!

雖然我覺得生雞蛋拌飯非常吸引，不過礙於生雞蛋拌飯既專用蛋 + 豉油依度都無得賣; 而且我感覺日本正宗果種食法會令白飯變涼......除壽司外，我食飯一定要食熱辣辣既! 所以我一直都無試過整來食~

早幾日無意中睇到"罐頭裡的蛋治blog"介紹既食法，覺得可行喎!   於是我就鼓起勇氣一試......

竟然令我食上咗癮!!!! 最啱用來當早餐~

大至都係跟佢既做法，但做法 + 材料有少少唔同......

1. 先盛一半剛煲好熱辣辣既白飯。

2. 打入一新鮮生雞蛋。(室溫!)

無生食專用雞蛋，咁我就用新鮮有機雞蛋啦! (雞蛋一定要新鮮!! )

3. 用另一半白飯完全蓋住生雞蛋。

4. 蓋上蓋子等候3分鐘。

5. 預備蔥花; 滴珠油 (或雞飯老抽)、日式濃縮柴魚湯和煮溶熟豬油各少許拌勻。

滴珠油

日式濃縮柴魚湯

 豬油 (可用其他較健康既熟油代替!)

6. 灑上蔥花，淋上豉油熟油與雞蛋一同拌勻即成。