茄子豆腐煲 (全素版)

一般茄子豆腐煲會有肉碎，
依個話明係"全素版"，當然唔會有肉啦!

我用咗依種超市有售既急凍素雞粒來代替肉碎........

溶雪後個樣真係好似切粒既熟雞胸肉!
其實佢係黃豆製品來，但味道口感一d都唔似雞肉......


1. 素雞適量切小丁; 硬豆腐沖洗一下後切件備用。


2. 茄子洗淨抹乾，去蒂切成粗段。


3. 鍋下油燒熱，下茄子段炸20至30秒後至表面微微金黃撈起，放在廚房紙上吸去多餘油份備用。


4. 燒熱油鑊爆香薑片，下(1)的素雞丁炒一會後加入豆腐，煎至微微金黃。


5. 以糖和素蠔油調味先兜勻，再加入三色豆和清水至蓋住材料約1/3煮滾，蓋上鑊蓋焗1分鐘。


6. 茄子回鑊略兜，勾粟粉水芡至汁稠，再兜勻所有材料，上碟即成。



NOTE

A. 三色豆純粹作裝飾用，可有可無;


B. 大家會見到煲裡面夾雜住一d條狀物體，
果d其實係我之前包腐皮卷時剩得既邊邊碎碎，
為免浪費，好多時我煮齋菜時會加d落去!
都係可有可無，如果有的話可以喺Step 5加入~


C. 我知好多人嫌麻煩怕開油鑊炸野......
不過茄子用炸既方法的確比用炒方法快好多 + 好食得多!
大家一定會覺得炸茄子一定會好油，
但其實只要油溫夠高快速地炸一下，
茄子唔單止唔會索油，而且口感會更香更好味!
我用大約一碗油去炸茄子，炸完仍然剩返一碗油，
油量並無明顯少咗~

相反炒茄子好似比炸茄子用少好多油，
不過茄子一下鑊就會即時吸盡油，
無油就炒唔到野.......咁當然又要加油啦，
結果加幾多吸幾多........
茄子吸飽哂油仍然未炒好!

當然視油如妖魔鬼怪既人可以用水煮茄子代替炸，
不過要預咗水汪汪 + 一定唔香，口感味道差幾條街!