一條冷返香港食食食2009 - 太平館, 泉章居 , 富記

今次返香港V媽媽徇我要求 - 煮多d飯~ 所以比以往少咗出街食飯，不過始終因為有正經事要辦，所以都幾常出街食!

可能經濟唔好，今次返香港發現有好多食肆水準差咗好多! 唔好味既就無謂講嘞~ 只講好味果幾餐啦......

太平館

有日同V媽媽喺銅鑼灣shopping，所以今次去咗比較少去既銅鑼灣太平館! (平時多去尖沙咀果間!)

2個人例牌點咗個二人套餐......

 一人一個海龍皇湯~ (好鍾意食佢地既港式餐包! )

 返親香港都一定要食既瑞士乳鴿~ 真係百食不厭!

 V媽媽唔食得牛肉，所以套餐裡面既乾炒牛河，改咗做肉片炒河~ 一樣好味! 仲係我 + V媽媽最鍾意既余均益辣醬呢!!!!

 個樣幾靚幾cute 既甜品蛋糕仔~ 不過我完全冇掂過......

泉章居

食客家菜出名既泉章居，都係我鍾意既食肆之一! 我未去英國之前，經常去泉章居食晚飯架!

可能為咗方便?

泉章居而家改咗套餐制剔紙仔落單......

 套餐包埋例湯~ (唔記得轉為白果豬肚湯!!!!)

 去泉章居緊係要食佢地既霸王雞啦!

 仲有佢地既梅菜扣肉! 真係好正~~~~~

 梅菜蒸鯇魚~

 唔知咩炒上素~ 本來係想點芥菜膽既! 點知V媽媽烏龍地剔錯咗......不過依個都炒得好好食!

富記

老舊既出名小店，每次返香港我都會去好多次! 因為......

 佢地既炒飯~ 我認為係最好食既炒飯，連老公第一次食過都即刻愛上!!!

 佢地既白切雞~ 曾經有網友認同 - 佢地既白切雞有一種難以形容既特別香味~ 喺別處係唔會食得到!

 富記既小炒都非常好，非常夠鑊氣!

 如果大家有機會去富記食飯，不妨一試以下我地V家既食法:

 先點一碟生既鯇魚片......

再點一個佢地超鮮味既生滾湯e.g. 魚雲湯, 及第湯, 魚腩湯 etc~ 唔同材料可配唔同菜去滾!

 湯來咗之後，將生鯇魚片立即加入湯內，魚片會即刻被灼熟! (相中既係及第西洋菜湯~)

咁既食法除咗令湯變得更鮮甜之外，魚片仲好滑滑~

魚片沾上胡椒粉豉油.....正!