V媽媽靚正餸2009 - 3月23日

鹹肉豆腐湯; 乾煎豉油皇大蝦碌; 清蒸紅頸魚 & 炒菜心

是晚我約咗朋友出街食飯，本來同V媽媽講咗話唔返屋企食飯，所以佢就煮少d餸~ 不過V家一向好鬼夜先食飯，我去完街返到屋企時正好剛剛開緊飯......我見到有大蝦碌 + 又有紅頸魚，又想食埋一份!!! 所以我幫手裝飯時，連自己果碗都裝埋...(我係飯人來嘛!!!)

V媽媽: 妳正一衰人來架! 又話唔返來食飯，等我冇煲妳飯!!!

V媽媽見我話之前果晚條紅頸魚好正，今餐又買多條! 不過依條冇影相啊......

鹹肉 / 鹹豬骨豆腐湯

1. 五花腩 / 豬骨用大量粗海鹽醃好，放入雪櫃一晚。

2. 將醃好的五花腩 / 豬骨汆水一會，去清血水和多餘鹽份。

3. 燒熱油鑊爆香薑數片和略拍蒜頭數粒。

4. 加入適量清水煮滾，加入五花腩 / 豬骨，用雞精調味。

5. 待湯大滾後轉中小火滾45分鐘(五花腩) 至1小時 (鹹豬骨)。

6. 最後加入豆腐和白菜仔滾約10分鐘即成。

P.S. 上海菜一向以"濃油赤醬"口味濃為特色，而依個湯正係上海菜來，味道鮮鹹~ 所以雖然五花腩 / 豬骨已醃鹹，但仍然要用上雞精來調味! 另可用雞粉或清雞湯來代替雞精粒~

依味係老公其中一樣至愛!

乾煎豉油皇大蝦碌

材料只有新鮮大蝦碌 + 生抽!

1.大蝦碌剪去眼鬚和腳瀝乾備用。

2. 燒熱油鑊下大蝦碌，快手炒至轉色。

3. 澆進生抽快手兜勻上碟即成。

 V媽媽: Andy 好鍾意食依味啊呵?

 我: 係呀!

 V媽媽: 等佢下次返來時，我又整比佢食!

(喂~ 喂~ 喂~~~~ 老公唔返香港，都可以整比我食呀吓!!?!??!)