一條冷返香港食食食2009 - 歎茶 (明閣, 潮館, 好彩 & 翠園)

雖然英國都有中式點心飲茶，不過水準同香港既酒樓完全唔可以相比~  喺依度飲茶唔難食的話......真係要偷笑架嘞!!!

今次返香港，去咗5個不同既地方飲茶~ 次序以日期先後排名......

明閣 - 3月19日

 "明閣"位於朗豪酒店6樓，04年開業，今年獲2009米芝蓮1星級~

"明閣"內部裝修簡潔，比較新派帶fusion 味，網上好多人認為明閣既裝修"好有品味"~ 不過並唔係我杯茶! 個人感覺就比較造作......(不過可以話我"冇品味"既! )

當日並非我點菜，所以我冇睇過餐牌，3人各點一個$400既set lunch，埋單總數$1200......

 頭盤 - 唔知咩筍涼拌鮑魚絲~ 依個唔知咩筍口感似西芹，配合埋有麻油香既汁，鍾意食鮑魚既我覺得整體上味道只係不過不失......

 竹笙翅~ 湯底唔錯，不過翅一向並非我所愛! 而且依個個翅唔多夠熱......

 露筍班片~ 露筍 + 班片都非常新鮮! 好食~~ 但稍嫌份量太少......

 蠔汁北菇鵝掌鮑片配大蝦(龍蝦??)炒飯~ 炒飯炒得非常好; 北菇, 鵝掌 + 鮑片都炆得好入味! 好食~~~ (席間有人認為炒飯中既係龍蝦肉......我唔知呀!! )

餐後甜品 - 楊枝金露~ OK~ 唔太甜，冇乜特別!

V食後感: 總括來講，依餐係好食既~ 不過個人覺得 - 咁既價錢係應份要好味既! 但並唔係物有所值 - 好味既程度，並非同佢既價錢成正比! 始終我唔多接受中餐以西餐既格局來進行，感覺扮哂野之餘，亦不能夠食得開懷!

或者蔡瀾講得啱 - 西方人去評中國食物真係冇乜說服力...... 米芝蓮星評級既準則，我唸並唔適合套用喺香港依個臥虎藏龍既美食天堂之上!
(好鬼憎朗豪酒店向街果部lift~~~ 我有畏高架嘛!!!!!)

地址: 旺角上海街朗豪酒店6樓

潮館 - 3月21日

旺角新世紀7樓既"潮館"，又係另一間黑沉沉既新派裝修中式飲茶食肆......(係咪依期興呢???)

不過"潮館"有一樣野可取 - 樓底好鬼高! 所以就算枱排到密麻麻，感覺都唔會焗促!

當日係星期六爆哂棚~ 好彩一早訂咗位! 門口坐滿等位既客人~ 4個人叫到成枱都係野! 仲有食剩可以打包......

 好鬼難食既小籠包~ 蒸到穿哂窿，裡面既湯汁流哂出來乾爭爭......(叫做"潮館"乜唔係食潮州野既咩??? 點解會有上海野既???)

 賣相 + 味道都唔掂既排骨~ 唉......

 蝦餃、燒賣 + 右面既話梅豬手.....甜既! 唔好食~~~ (都唔知邊鬼個點既? 點咗又冇人食!!!)

 濃味 + 甜到阿媽都唔認得既叉燒包!

去完地獄~  卒之進入人間......

 潮州粉果~ 普通!

 咩菜苗餃~ OK!

 不過不失既日式燒茄子~ (個汁其實係好味既，不過可能落太多馬蹄粉!!?? 似鼻涕......)

 又係叫咗但冇人食既煎堆仔 + 鹹水角~

漸入佳境~ 上天堂嘞.......

 牛肉腸粉~ 尚算皮薄 + 滑!

 食到我拍哂手掌既潮州蠔仔粥~ (始終打潮州菜招牌，都係整返潮州野好好多! )

 蜆介鯪魚球~ 好味道!!!! 蜆介尤其香口~ 不過蜆介好鬼少啊......

 超香脆既香茜腐皮卷~ 依個好好味! 咬落卜卜脆 + 真係好香莞茜香味!!!

V食後感: 我唸中式點心並非"潮館"既強項!!??!? 依餐食物水準好參差，有好好食亦有好鬼難食! 至於價錢方面......我唔知! 因為唔係我埋單既~~~

地址: 旺角太子道西193號新世紀廣場7樓728-731號舖


好彩海鮮酒家 - 3月23日

因為就腳 + 食物好味，所以V媽媽經常去"好彩"飲茶而成為咗熟客仔~ 於是V媽媽成日恃熟賣熟 - 想坐邊度就坐邊度! 得我地兩丁友，明明人地裡面果邊得返大枱，經理親自走過來將大枱拆細比我地坐......真係好鬼麻煩!

是日我地得兩丁友都餓鬼上身......

 我獨霸既燒鵝瀨粉~

 我一向鍾意食"好彩"既蝦餃~ 叉燒包係V媽媽既!

 醉香BB鴿~ 好香紹興酒味道，好好味! 一人一隻~~~

 熱辣辣，外面香脆 + 裡面超滑滑既"椒鹽九肚魚"~

 "好彩"好鬼正既"蒜茸春卷"~ 不過今次個腐皮卷唔夠脆而失色咗少少......

 涼瓜班腩煲~ 超級好食!!!!! 我又鍾意食涼瓜又鍾意食班腩，一次過滿足哂兩個願望! 班腩既皮仲好鬼爽口啊~~~~ (唸返起都流口水......)

V食後感: 因為已經唔係第一次去"好彩"飲茶，所以係預期中好食~ 價錢又大眾化! 不過好好好失望既係 - V媽媽 + 我都好鍾意食既"卥水豬仔腳"......賣哂!!!!!!

地址: 旺角 彌敦道760號 聯合廣場4樓

翠園 - 4月3日

銅鑼灣"翠園"係V媽媽同麻雀腳經常茶聚既地方! V媽媽話我知，"翠園"有一味"豬潤燒賣"好好味，於是就同我去試吓~~~ 點知去到......點心紙更新咗~ 冇咗豬潤燒賣!!!! 不過幸好 - "翠園"係我今次返香港眾多飲茶經驗，最好既一間!

果日又係得我 + V媽媽兩個人......

 先來一碟蝦腸~ 皮超薄 + 超滑! 鮮蝦又大大隻......(平時我係唔食蝦腸架! 不過V媽媽唔食得牛肉先點蝦腸~ 依碟蝦腸充滿驚喜!!!)

 強力推介既特點 - 川芎蒸魚雲~ 上菜時離遠已聞到好鬼香!!! 唔食過依個，都唔知蒸魚雲依個點心可以好食成咁!!!!! 係形容唔到既好味道.....想知有幾咁好味的話，就自己去試吓啦! (依個係我最最最掛住既點心......)

 另一強力推介 - 啫啫通菜煲~ 已煮好既通菜 + 燒紅咗既砂鍋先分開，上菜時侍應先將通菜放入砂鍋裡面! "咋~~~~~"一聲即時香氣四溢!!!! 唸返起都流哂口水.......

 北菇超香、綿花(魚肚)超多、雞肉超滑 + 入味既綿花雞~ 超好食!!!

 湯汁 + 肉丸都好好味既瑤柱節瓜甫~ 又係超好食!!!

 清淡既魚湯鮮竹卷~ 鮮竹卷好足料，條條都脹卜卜! 不過個人稍嫌太清淡，不過魚湯湯底非常鮮甜!!!

 晶瑩剔透足料既海皇豆苗餃~ 餃皮通透得來.....仲竟然煙軔彈牙! 好犀利......

 鬆化 + 味道恰到好處既叉燒包~ 唔似一般叉燒包餡料杰撻撻 + 味太濃! 唔好叉燒包既我都覺得好好食!!!

 個人認為一定要食既菠蘿叉燒餐包~ 少量好味既叉燒包餡，配上非正香脆好味既菠蘿皮，再加埋熱辣辣軟腍腍既餐包......我一個人可以食哂2碟!!!!

V食後感: 依餐我一食傾心~~~ 雖然食唔到我想試既"豬潤燒賣"，不過今次所有我地點過既食物都係我強力推介! 難怪V媽媽經常特登過海落銅鑼灣同朋友飲茶......有機會的話，一定要帶老公去翠園試試!!!!

地址: 銅鑼灣希慎道1號

>>>>>>>>>>>>>>>>>>>>>>>>>>>>>>>>>>>>>>>>>>>>>>>

請大家來評評理!!!!!

請問大家認為依間酒樓叫做咩野家呢? "湖家"? "潮家"?? "湘家"???

事源愚人節當日我打電話比太62(老公既爺爺)，約太62 + 太99第二日出來飲早茶。因為外家有白事唔方便返去太62屋企，加上太62雖然住喺沙田，但搭完火車之後再要轉車......所以我就直接約兩老喺酒樓等~

太62太99一向最常去既就係沙田明星海鮮舫~ 之前返香港都陪過佢地朝朝晨咁早去明星飲茶無數次......所以雖然我由太子娘家入去沙田唔算就腳，不過最少對唔熟沙田既我來講叫做"知訂"!

點知太62話因為佢年紀太大，由舊年開始已冇得再渣車，唔方便再去明星海鮮舫~ 而家轉咗去沙田街市附近，一間新開叫做"湖家"既酒樓飲早茶! 酒樓樓下有個報紙檔云云......

咁我當時就唸: 雖然我唔熟沙田 + 唔知新酒樓喺邊......不過太62話喺沙田街市附近，應該唔太難搵，我早少少去咪得囉! 為求保險，我同太62約好時間收線後，就打電話去電話公司詢問"湖家"既電話，唸住再打去"湖家"問清楚地址......咁就萬無一失啦!

點知電話公司同我講 - 電腦資料顯示喺沙田區並無一間叫"湖家"既酒樓!!!!!!!!

唔係呀化??!!?!??!??!??!??!???!??!!!?!?!?!!!!!!!!??!??!?!
我當時認為......

(1) 既然太62認為間野叫做"湖家"，我相信打電話比佢都冇用;

(2) 我唔想太62覺得我好蠢而得失佢老人家!

當時已經係夜晚8點幾......我唯有即時由旺角搭火車入沙田，去街市果頭搵依間唔存在既酒樓 - "湖家"!!! 我又即時越洋打電話比老公求救~~~ 老公又打比99......99又打比我........

卒之行到去沙田街市果頭，離遠見到依間野，再望望角落頭有個報紙檔......我即時好鬼火滾!!!!!!!

我當然唔係火滾太62啦~ 而係因為依間野個招牌寫得真係衰到冇人有!!!!! 唔好話老人家睇錯吖，就算係我都唔肯定依間野叫做乜Q!!!!!

嘥鬼哂我d時間!

(依餐茶因為太早，完全食唔落野~ 純粹陪陪老人家既啫! 依個愚人節真係金......)