由於辦事期間有人無厘頭地將好多細節自把自為改完又改，搞到一眾由英國返港既親友(包括我在內!)，來回機票回程要作廢，要改期 + 另訂單程機票返英......所以今次我去香港 + 返英國分別搭咗2間唔同既航空公司 - KLM (荷蘭皇家航空) + 國泰~
話哂我都喺英國住咗咁多年，已經搭過無數次飛機來回香港 + 英國，但我並非只搭同一間航空公司，所以多年來對各來回香港 + 英國既航空公司既服務 + 飛機餐都略知一二，今次一於講吓飛機餐啦!
British Airways (英航)
咪以為我返香港一定會搭英航，事實上我最憎就係搭BA!!! 雖然我已經身經百戰搭過好多次長途飛機，不過我仍然係咁怕氣流~
每次遇到氣流我都會捉緊老公隻手，就算佢瞓緊覺都會比我嚇醒!!! 而BA就係我認為遇到氣流時最震既航空公司，真係比佢震到怕哂!!!而且個人覺得，BA既飛機餐最鬼難食! 尤其佢地個早餐 - 有果醬既齋蛋奄列......真係唸起都想嘔!!! 我永遠掂都唔掂佢地個早餐~
KLM (荷蘭皇家航空)
KLM 係我既"飛佛"! 個人覺得佢地既座位較闊，坐得舒服之餘，仲唔知點解佢地成日都唔滿 - 令我可以喺十幾粒鐘既旅程裡面一人霸佔2座位!
我曾經搭過KLM 既商務客位返英國，果次從未試過搭飛機咁好瞓~ 直頭舒服到瞓到流哂口水!KLM 既飛機餐係我個人認為眾多來回香港 + 英國既長途線，最好味既航空公司! 好奇怪~ 我 + 老公以前去過Amsterdam 旅行，果幾日我地覺得荷蘭冇啖好食! 但就唔知點解，我認為KLM 既飛機餐最好食~~~
唔知係咪金融海嘯既原因呢? 今水返香港既飛機餐，無論晚餐 + 早餐都好明顯地縮哂水! 不過縮水還縮水...幸好味道並冇退步!
依份晚餐係由"俏江南"提供既~ 據我所知以前銅鑼灣都有一間"俏江南"，不過已經執咗! 雖然叫做"甜酸雞肉"，不過食落一d都唔似甜酸雞，個汁好好味 + 好多雞肉，味道非常有水準~ 美中不足係細份咗少少......
Cathay Pacific (國泰)
返英既機票改為搭國泰~ 其實之前我都搭過國泰 - 不過只限於由香港去東南亞各地既幾粒鐘短途線，一直都覺得國泰既食物好好味! (香港人既航空公司緊啱香港人口味啦~~~)
今次搭國泰長途線就係第一次~ 不過經過今次之後，我以後長途都一定唔會搭國泰!!!
(1) 十幾粒鐘既長途機，行李竟然只得20kg!!! 係我搭過既長途機最少既一次! 而且我又例牌行李超重十幾kg......佢雖然話比夠我25kg，不過補水都要成$2000幾銀! (好過去搶~) 最後唯有攞返部份野出來，由V媽媽幫我攞返屋企再寄過來比我!
(2) 半夜遇到氣流震到阿媽都唔認得! 震咗一輪已經嚇到瞓唔返......;
(3) 最令我驚訝係國泰超白痴既座位設計 - 我從未搭過一次飛機，座位係冇得較低既! 正常既飛機座位按制後，椅背都可以放低; 但今次搭依班國泰，椅背不但唔可以調低，按制後座位反而凸出幾舊三尖八角既野~ 雖然一向搭長途機都辛苦，但咁辛苦都係第一次! 設計依種座位果位仁兄個腦好有問題!!!!
依班國泰唯一可取既地方，就係食物水準就非常好 - 又大份又好味!
>>>>>>>>>>>>>>>>>>>>>>>>>>>>>>>>>>>>>>>>>>>>>>>>
除咗以上幾間航空公司之外，我之前仲搭過......
Qatar Airways (卡塔爾航空)
06年10月，老公既鬼仔伴郎Jeff + CJ 兩兄弟自費去香港出席我地婚禮，因為佢地自費，所以選咗比較平既Qatar Airways~ 我知道要喺多哈轉機，本來都唔係咁想搭......不過既然人地咁有心，我無謂阿之阿左~~~
喺多哈等候轉機既時間，一般都比較長~ 所以Qatar Airways 會比餐券旅客，喺多哈機場等候轉機時食餐!
Virgin Atlantic (維珍)
好耐之前搭過幾次，記憶中遇到氣流時都係好震! 食物還可以......不過有樣野幾好 - 架機明明遲咗起飛，都可以比預定時間早到目的地! (幾次都係咁!)
Air France (法航)
以前返香港時成日搭既航空公司，不過近幾年少搭咗好多~ 印象中d座位太鬼窄，坐得好辛苦，不過食物幾好味!
長途機座位冇得調低，咁你點訓覺呀
回覆刪除[版主回覆04/08/2009 03:05:00]座位設計完全霎戇!!! 完全瞓唔到~ 以後長途機打死都唔搭國泰!!!
你好勁 ...飛機餐都影埋 .
回覆刪除我1月時來回程倫敦都好好瞓 , 瞓到冇食飛機餐架 ...
我上次坐是BA 行李是 23kg , 回程咪比25鎊囉 , 最多加埋是 31-32kg咋 , 再多咗是唔比上機架 , 網上check in 時有寫明喎 .............. CX 竟然是20kg , 有冇攪錯 .
不過我知是 08年 11-12月左右實施架 .
現在長途航線的寄倉行李重量 , 仲衰過去東南亞 .
[版主回覆04/08/2009 03:03:00]我上次08年11月返香港係搭BA既，返英國時我 + 老公行李都過30kg~ 不過好彩當時仲未實行新制，佢比我地過骨! 而家BA 都有23kg啦，國泰得20kg 係咪太離譜得滯呀??
有 次 搭 國 泰 ,個 地 勤 話 我 一 件 行 李 超 重 ,要 補 錢 ,另 一 件 就 OK,....我 用 英 文 問 兩 件 行 李 一 齊 有 無 超 重 呢 ,佢 話 無 ..................我 開 喼 準 備 執 過 d 行 李 ,個 地 勤 即 刻 話 唔 使...................唔 知 係 咪 怕 我 麻 煩 ,阻 住 其 它 人 呢
回覆刪除[版主回覆04/08/2009 03:21:00]弊在今次得我一條冷呢......但得果20真係好搵笨實喎! 不過我以後打死都唔搭國泰!!! 佢果張椅既設計真係白痴到冇人有!!!!
我 都 係 一 個 人 呀 , 打 C 我 都 唔 比 錢 ,最 多 唔 要 d 嘢 囉 不 過 我 咋 唔 識 聽 中 文 ,個 地 勤 d 英 文 又 水 皮 ,咪 比 我 過 到 骨 囉
回覆刪除[版主回覆04/08/2009 04:10:00]你坐頭等定商務呀? 點解可以有兩件行李??
WELCOME BACK！ 我都有搭過國泰來回香港三藩市。啲座位設計同我搭SQ差唔多。你係咪坐洗手間之前果行呀？我之前坐過果行就係冇得ADJUST。乜唔係兩件LUGGAGES 嘅咩？每件20KG。
回覆刪除[版主回覆04/08/2009 14:48:00]唔係~ 我搭果架機全部座位都係咁! 而且架機睇落好新，唔知佢地係咪打算換哂依種座位??? 真係好白痴!
我未聽過有airline 每人可以有2件行李喎! (頭等果d我唔知吖~ 我未坐過!) 邊有咁筍每人2個入倉行李呀? 入倉行李一每人限一件20kg，再加手提行李一件限7kg，可以另揹手袋囉~~~
見到你個blog有新post就好啦...
回覆刪除你下次番香港先再約過啦...我都知道你好忙ga啦...^^"
係唷...我買左婚紗啦...有時間去我到8下啦^^"
[版主回覆04/08/2009 14:43:00]等我回埋幾個comment 即過去!
見到你個blog有新post就好啦...
回覆刪除你下次番香港先再約過啦...我都知道你好忙ga啦...^^"
係唷...我買左婚紗啦...有時間去我到8下啦^^"
其十除左維珍外，最平係米BA?（Direct flight）以前坐過BA送多張來回Europe機票，都幾好。
回覆刪除[版主回覆04/08/2009 13:40:00]唔係喎~ 機票價錢唔係睇邊間Airline 果喎，睇吓妳好唔好彩架咋! 好多airline 好多時唔係旺季會做好多特價，唔係成日搭飛機既人未必會留意到~
Hello Mrs T, Welcome back!!
回覆刪除Talking about airlines, my favorite is Singapour Airline - seats are comfortable, good food and nice air-hostesses. Moreover, their flights are on time!
I'd like KLM if I don't have children. I agree to you that the seats are comfortable, food is nice and they're on time. However, the biggest problem is that they don't serve meals to children as priority. I still remembered if I didn't go to their service cabin to ask for and serve the baby meals myself, my baby won't have any food. The mothers in the same flight with me thought and felt the same.
Even though I live in France, I must admit that flying with Air France is a new adventure each time. Why? It's because the french aren't on time and sometimes, meals can be suspended because they have strike. I remembered one time I was on a flight Air France going to Reunion Island. During this 10 hours' flight, no meal was served in the Economy class but we could smelled coffee and food from the first class cabin....... Moreover, Air France often sells more seats than their real availabilty; we can see angry passagers waiting to get their seats at the gates all the time.
I don't quite like Cathay Pacific either. Although they have good food and good service, I really hate their way of asking passagers for paying over-weighed bagages.
[版主回覆04/09/2009 21:05:00]
never try Singapour Airline......but my husband told me that a mag voted Singapore Airline got most beautiful hostesses!
OMG~ 10 hours with no meals???? did you get any refund or compensation???
now i understand why my mum hates coming over UK~ the last 2 times she came over was with Cathay Pacific! last time she came over with my dad for my wedding, and the flight was delayed for 5 hours! i swear i wont fly with CX anymore~ 20kg is absolutely outrageous!!!!
我２年前返英國時未開始寫blog而家好後悔呢
回覆刪除但一諗到坐咁耐機真係有d驚
[版主回覆04/09/2009 17:08:00]坐咁多粒鐘飛機其實真係好辛苦架!
唔係喎。我每次都係兩件入倉一件手提。以前就每件max 70pds 家下就50pds。啱啱八完啲airline 嘅 baggage info。Central and North America 係兩件。UK 就一件。如果我只係可以帶一件我諗我會比好多 penalties 囉。因為平時兩件我都超重。
回覆刪除[版主回覆04/09/2009 00:34:00]啱啱check 咗國泰 - 美洲以外既地方都係只限1件寄倉行李; 而美洲國家就全部都係2件~
我估其他歐洲airline 都係大同小異~~
我都係勁驚氣流...每次同你一樣都要捉實老公隻手....
回覆刪除我諗國泰咁既設計..係唔想前面既坐位瞓落後面, 影響後面坐位既乘客掛, 我次次都最憎人一野就瞓到最落...完全唔理後坐既人...我就見過有人因為咁吵架囉.....
國泰真係得20KG...我地次次去日本返香港都要同佢嘈....得咁少..邊夠用架...真係去搶咩.....
[版主回覆04/09/2009 19:59:00]搭經濟位係咁架啦~ 只要用餐時 + 飛機降落、起飛都拉直椅背，其他時候任何搭客都有權較低座位! 想唔比人影響到咪比多d錢搭商務 / 頭等囉~
我都覺得國泰既座位咁既設計係咁既用意~ 之但係我認為依個設計唔應該用於長途機囉!!!! 短途幾粒鐘都話啫~~~
雖然係香港人既公司，但係我真係不滿多於滿意! 20KG我真係第一次聽~ 不過去美洲地區，反而可以每人2件20kg寄倉行李喎!!! 真係大細超~~~~
KLM都係靚豬favourite! 貪佢可以喺birmingham上機! Swissair都好正~
回覆刪除[版主回覆04/11/2009 21:36:00]真係英雄所見略同嘞!
我未搭過Swissair~ 蘇格蘭一定要轉機，來來去去都係果幾間airlines......