由鮑魚海參飛機餐開始 - "香港的超級V媽"

日本著名相聲師 + 暢銷作家島田洋七，有一個堅強能幹既"佐賀的超級阿嬤"; 我雖然住喺蘇格蘭，同樣有一個我認為能人所不能 + 廚藝超卓既"香港的超級V媽"!!

我既"香港的超級V媽" - V媽媽~ 相當能幹! 既要每日應付非常忙碌既工作 + 將屋企打理得一塵不染之外，仲要買餸、煮飯一手包辦，每晚靠佢一雙手煮到成枱各樣佳餚!!!! 最好野係 - V媽媽咁忙碌既生活，佢仲抽到時間煲韓劇、同朋友行街shopping 打麻雀嘆茶......

V媽媽煮得一手逢人食過都lam 住脷讚好既靚正餸! 我經常打電話越洋偷師!


舊年11月從香港返來後，已經同大家介紹過少部份V媽媽美食; 今次返香港雖然係因為V嫲嫲走咗，不過因為咁我有機會返娘家小住3星期 (而且係婚後第一次喺香港娘家住咁耐!)，可以每晚品嚐到V媽媽親手煮既餸，舌頭好幸福啊~~~

所以特別開設"V媽媽廚房"，往後幾日會同大家分享我今次返香港食到既V媽媽既好菜，將其中V媽媽既烹飪技巧 + 部份食譜記下來!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
舊年返香港後已經提過，每次我返英國，V媽媽都會為我準備一盒私伙鮑魚飛機餐! 今次亦唔例外......

 不過今次鮑魚帶埋佢個friend - 海參~

今次依盒私伙飛機餐有段小插曲...話說我入禁區前例牌喊到豬頭咁既款~ 一路喊住扯哂蝦咁過海關時，我如常誠實地話比海關哥哥知 -  我有一盒野食......

 海關哥哥: erm.......唔得果喎!

 我: 吓? 我次次都係咁果喎!!! 我喺飛機上面食之嘛，到倫敦前我一定會食哂，唔會帶入英國境架! 我11月時都試過咁......

 海關哥哥: 其實舊年7月開始已經唔得架嘞......

 我: 吓? 咁我係咪要喺度食哂佢???

 海關哥哥: 其實係因為有汁先唔得，倒咗d汁就得架嘞!

(咁你唔早講!!!?!??!? 嚇得我吖~~~)

 我: 咁我可以喺邊度倒汁呀???

 海關哥哥: 唔洗妳自己倒~ 妳過完X Ray 後，果邊有同事幫妳倒!

 我: 係咪真係只倒汁架? 唔會成盒餸倒哂果呵?? (雖然海關哥哥態度非常友善，不過多疑既我我怕佢"昆"我過海關後，扮哂唔覺意倒哂我成盒野!!! )

 海關哥哥: 哈哈~~ 係呀~ 只倒汁架咋，唔會倒其他野! 我唸依盒野都幾貴.....

真係唔該哂果位海關哥哥啊!

有驚無險~ 過關後我即打電話比V媽媽! 佢話: 啊~ 係呀! 今次有海參嘛，海參多d汁先好味嘛......