(1) 第一則就正正係關於V嫲嫲......
V嫲嫲 + V爺爺曾經喺英國居住一段頗長既時間，近十年左右先返香港長住養老。V嫲嫲年紀雖大，不過返香港初期健康狀況仍然好好，閒時種吓花或種吓菜，生活寫意~ 3月31日朝早送完V嫲嫲上火葬場 + 一切儀式辦妥後，我地一行人就去酒家食一餐"英雄飯"~ 席間同我一樣由英國返香港出席喪禮既三叔，道出一件數年前既往事......
V嫲嫲 + V爺爺居住既三層村屋，屋隔離有一條小路，沿住小路可一直行上山坡，山坡有幾塊田地屬於V爺爺 + V嫲嫲，以前佢地就係喺果度種瓜菜。數年前，有親人突然喺屋前小空地起咗一個多鬼餘 + 完全冇作用既石屎圍欄，從此V嫲嫲既健康狀況就每況愈下! 石屎圍欄起好咗冇耐，有一晚V嫲嫲發夢......
夢境中V嫲嫲準備行上山坡去田地，突然V嫲嫲見到山坡上企咗2個同村，但都已去世一段長時間既長輩，其中一個長輩阿太(音"泰")用客家話同V嫲嫲講: 阿嬌~ 妳來依度做咩? 依度唔係妳來架~ 快d走! 之後V嫲嫲就醒咗......
V嫲嫲發夢之後第二日伸手去開櫃門，竟然因此傷到腰骨! 由依個時候開始直到V嫲嫲去世，佢條腰一路痛足咁多年冇好過，一路都要依靠柺杖來行路~ 情況最差既時候，仲要坐輪椅.....所以我結婚時V嫲嫲因為行動唔方便而冇出席~ 亦係由依個時期開始，V嫲嫲身體健康越來越差......
三叔篤信佛學，佢深信屋前既石屎圍欄，對住屋既人身體健康有唔好既影響; 喪禮結束當日，我地一家都有返去禾坑村屋，隔鄰老一輩既親友都過來慰問，言談間講起石屎圍欄，都認為對風水有唔好既影響! 我對依方面冇研究，不過我自己都覺得未整圍欄之前感覺比較開揚光猛，望出去空間感大好多，整體感覺好舒服; 相反而家從大門望出去，有一半視線比圍欄擋住，感覺好焗促......
P.S. 事件係後來一次三叔返香港探望V爺爺 + V嫲嫲時，V嫲嫲親口同三叔講; 三叔曾經建議將圍欄拆除，不過有人竟然一意孤行將圍欄再加建到更高! (我唔想講係邊個，因為始終係一家人~ 不過我想講既係 - 就算有不同信仰，都應該要尊重人地既信仰! 自己就算唔信既，都唔應該自把自為 - 依個並非關於信仰，只係好簡單既做人道理而已!!!)
(2) 第二則靈異事，係同V媽媽閒談時提起，關於我既曾外袓父......
V婆婆既爸爸(即我曾外袓父)，以前喺大陸時係一個大荔枝園既工人~ 當時時勢好亂，有好多土地曾經係亂葬岡，周圍有好多用來放置先人遺骨既金塔，屢見不鮮......
一日曾外袓父同其他工友喺荔枝園一角隨處小解，唔小心整濕某個金塔......當晚曾外袓父返到屋企，當住家人面前喺神枱上不停攞香枝 + 香爐灰食! 一路食仲一路狂叫: 我一定唔會放過你!!!!! 當時年紀尚少既V婆婆喺一旁被嚇呆......果一日開始，曾外袓父就一病不起.......
>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
我只係將自己聽聞既事作一個紀錄 + 同大家分享~ 並非存心導人迷信! 希望大家抱住一個open minded 既心態去睇依2件事~ 我自己個人既睇法係 - 寧可信其有! 而我亦從中領悟到，我地後輩對已去世既先人，永遠都應該懷有一份尊重 + 敬意! 畢竟"死者為大"~~~
風水呢0的野.. 好難講的.. 我信嫁..
回覆刪除不過點解v嫲嫲唔搬開住0既?
[版主回覆04/15/2009 15:52:00]某程度上我都信風水! 不過妳叫我喺屋企擺個風水陣就未必嘞......
V嫲嫲搬開去邊度住呀? 咁果間村屋係佢地養老架嘛~ 果度其實空氣 + 環境都好好(我影咗好多相，過幾日介紹吓!)，其實對老人家身體應該係好既! 況且叫佢搬佢都唔會......
唉.... 有時我都唔知 , 我記得我懷住Katrina 時 , 老爺剛剛突然中風過身 , 但老爺剛做了身體檢查唔夠1星期 , 醫生話他甚麼老人病都沒有 (包括 高血壓 , 血管硬化 , 糖尿 , 心臟等 ) , 身體機能好正常 , 還講笑同老爺講起碼有多10年命 ............ 點知幾日後老爺就突然在街上跌一跌走咗了 (可能是暈到 ) , 於是老公打電話返鄉下通知親友 ( 老爺有間屋架 ) , 鄉下D親友話唔係咁啱呀 , 你哋間屋出面塊地 , 比人掘緊呀 , 掘了成個大洞喎 ........
回覆刪除我是一位基督徒 , 有時有D嘢我都唔信 , 但我只可以講 , 有D嘢無端端整來做乜 ?
而老爺死我亦只可講 , 他都一大把年紀 , 要走始終要走 , 但他走得來是舒服的 , 當中絕無痛苦 , 這是一種福氣囉 !
[版主回覆04/15/2009 15:43:00]我自己並冇宗教信仰~ 只係我相信佛教既因果說法...... 不過中國人有某d禁忌...雖然從科學角度冇得解釋，不過因為發生喺我身邊認識既人身上，如果話只係巧合又好似講唔通......所以我都會選擇相信!
雖然我喺上面講過唔想講令我不滿既係咩人，不過有d野我真係覺得不吐不快!!!! (1) 圍欄係佢地既主意，目的係為一個只間中返吓去，而唔係住喺村屋裡面既人; (2) V嫲嫲做法事時竟然遲到; (3) 冇徵求過任何人同意，喺棺木入面放咗2大張佢地 + 兩老一齊既合照! 仲要放喺V嫲嫲個頭兩側，好似慌死人地睇唔到咁款! 做法事既人一見到即講: 大吉利是!!!
依一切都只係因為當中有人信仰唔同! 但既然大圍都同意用依個方式進行，咁佢地又決定參與，係咪就算唔信都應該要比吓面尊重返成件事呀??
呢0的人做咁多呢0的野.. 其他人都一定睇在眼內!!
回覆刪除[版主回覆04/15/2009 16:20:00]睇到都冇用...因為話又話過佢地，不過都話唔聽~ 我唔會望佢地有報應，只望佢地唔好影響到其他人!
信仰唔同，唔代表唔需要尊重人地既信仰，同埋尊重別人只係一個人既基本禮貌，咁大個人唔洗人教卦
回覆刪除朋友就話自己揀啫，親戚就冇得揀，又冇得話唔見，真係幾麻煩
[版主回覆04/15/2009 16:58:00]可幸既係 - 真係好少見! 如果唔係屋企有事的話，分分鐘一年都見唔到一次!
這些人咪自私囉 .... 他做出來既嘢 , 好似做show 咁做比人睇囉 .
回覆刪除[版主回覆04/15/2009 18:34:00]咪係~ 都唔化架! 最終大圍決定要攞返相出來! 大佬~ 兩張相都有V爺爺份...V爺爺仲健在架!!!!
I think your grandmother's case concern Fung Shui. In fact, when I was taking a geology course in school, an American professor confirmed to me that Chinese Fung Shui theory matches most of the basic geology principles. For example, the placing of a barrier such as a wall or a mirror can change the magnetic field of the concerned areas of that particular environement. If the bad magnetic force enters into a house, it may cause health problem of the people who live inside. There're many other interesting coincidents between Fung Shui and geology. When you'll have time, you may make a little research....
回覆刪除For the case of your great-grandfather, I've heard many similar but true stories from my family as well. I'm not supersticious but I do believe in sch things...
[版主回覆04/16/2009 18:15:00]really? i must tell V papa then! thanks for telling me that interesting facts! i never think about this scientifically before!
我老公住村係好信呢啲野, 我老公個亞嫲都試過靈異時件, 話話姑姐可以同亞爺通靈, 有日發夢話間屋俾人霸咗, 點知亞嫲個年隻腳就有事, 仲要切咗佢, 而且亞嫲仲話有人坐佢床頭, 咁我老公揾個識呢方面嘅fd嚟睇間屋, 話真係有野, 咁叫我老公買番個神像同整過個神主枱後, 到宜家都一齊無事, 仲愈來愈好tim..
回覆刪除[版主回覆04/19/2009 03:11:00]其實信唔信都好，我地對唔知 / 唔清楚 / 唔肯定既所有事，都應該有基本既尊重!
好似有網友同我講，中國風水學會影響到磁場，而磁場會影響個人健康~ 所以依個已經唔係信與唔信既範疇，科學角度來睇，都應該要注意~~~
驚 驚 !
回覆刪除[版主回覆06/02/2009 17:51:00]唔洗驚~ 唔洗驚!
呢個世界真係好多不可思議嘅事,有啲人會相信,有啲人就話無聊.
回覆刪除我就好相信,因為我經歷過好多嘅不可思議,但又冇辦法解釋得到.
可能真係會有第三度空間.
[版主回覆10/20/2010 17:40:00]歡迎妳呀肥姨!
我雖然無宗教信仰，不過我抱寧可信其有既心態~
肥姨有無將自己親身經歷寫過出來分享呀? 等我又去八吓吖!