2010年6月4日星期五

二人世界三餸無湯 - 2010年6月3日 (附食譜)



簡易泰式香茅豬扒; 豉汁青口 & 炒菜心

感覺好似好耐無煮過飯咁!

星期一係銀行假期,去咗Wudon 食飯;

星期二 + 星期三都好鬼懶......

 星期二叫咗中式外賣~

今次試order 一間未試過既中式外賣店,佢地既食物水準非常唔錯喎~  而且仲算平呢!

 2份分既椒鹽雞翼~ 無唸過盒雞翼咁鬼大盒!!!! 而且仲非常好食~~~~~ 

炸皮薄得來香脆,唔似其他中式外賣店既椒鹽雞翼咬落成口粉; 味道啱啱好唔會太鹹; 配角洋蔥又唔會炒得太熟~ 真係好好味!!

 又係2份分既燒汁薯條~ 燒汁香濃好好味~~~ 唔似一般中式外賣店既燒汁淡茂茂得個杰字!

 我既大蝦炒麵~ 炒得好香好好味,而且好鬼多大蝦!  美中不足炒得唔夠乾身 - 不過以中式外賣店來講已經非常好!

 老公既雞炒飯~ 依個都好好食!  雞脾肉嫩滑,如果多少少汁會更好!

我屋企附近有好多中式外賣店,不過就唔係間間都好食!  以前試過幾間新野但都好失望~  所以之前一直都係stick to 一間叫做最好既~ 今次嘗試依間新野又平又好食,好有驚喜啊!

星期三仍然懶~~~~  天氣熱老公又話無乜胃口,加上要睇"Sons of Anarchy"......

 所以今次叫咗Kebab 外賣!

我要咗個spicy burger + spicy chicken baked potato;

老公就要doner kebab with chips~

咪睇依餐求求其其呀,依餐外賣都唔錯架!  依間係我認為屋企附近最好食既咖喱外賣店! 只係同時亦係最貴果間咖喱......

偷咗2日,星期四終於有興致的起心肝煮野食嘞!

 晏晝先整個炸魚片豆腐卜豬骨湯烏冬做lunch~

 阿四寄比我既牛頭牌豚骨湯塊真係好好味!

 尋晚急不及待試試都係阿四送既李錦記泰式香茅豬肉醬~

 真係又方便又好味! 依大碟野清到見碟底~~~

我好鍾意食海鮮 - 尤其係貝殼類~~~~

不過眾多貝殼類之中,我就好唔鍾意細隻黑色殼既藍青口!

所以雖然依度周圍都有得賣鮮活生猛既藍青口,但係我都要買急凍貨 - 肥美碩大啖啖肉既紐西蘭青殼青口~

以前返香港時會去西貢掘蜆,都會攞到好多依種新鮮生猛大大隻既青殼青口,V媽媽就咁白烚熟青口,用來點食蟹果種大紅浙醋......

青口爽口鮮甜啖啖肉,配埋又酸又香既大紅浙醋,真係好味到呢~~~~~~~

 不過急凍野都係用來整豉汁嘞!

本來想煲個菜乾豬骨湯,不過而家夏天傍晚成6、7點外面仲好鬼光 ,我掛住執野執到忘記哂時間,唔夠時間煲湯呢......

 簡易泰式香茅豬扒食譜click here~

 豉汁青口食譜click here~


9 則留言:

  1. 個雞炒飯啲雞多到睇唔到啲飯,如果唔係妳寫炒飯,我仲以為係餸黎架
    [版主回覆06/04/2010 19:59:00]依度既中式外賣店其實都係呃洋人既~ 不過就 唔係 所有呃洋人既地方都唔好食!
     
    雞炒飯叫就叫做雞炒飯,但其實係雞同炒飯分開來炒架! 所以上面咪一大pat 雞肉囉!
     
     

    回覆刪除
  2. Gaileは林家歐巴桑2010年6月4日 上午5:33

    妳果兩餐外買真係好足料喎
    今次妳妳食burger反而妳老公唔食喎,少有
    [版主回覆06/04/2010 23:17:00]我地唔止平時自己煮大餸,連出街食 + 叫外賣都食好多野架!
     
     

    回覆刪除
  3. 樣樣我都好鍾意呀~~我見你叫果個中式外賣果個椒鹽雞,真係流曬口水呀,係香港好耐都無食過,搵日要食下先得!
    [版主回覆06/04/2010 23:16:00]果個雞翼真係 非常唔錯!  而且好鬼大盒~
     
     

    回覆刪除
  4. 我呢度的中餐外賣超油﹗我試過幾間都係咁﹌ 我鐘意你的炸魚片呀﹗
    [版主回覆06/05/2010 01:49:00]呃洋人既中方外賣多數都係油膩架嘞~ 不過我唔太mind,最緊要係好味!
     
    炸魚片只係中式超市急凍貨來~
     
     

    回覆刪除
  5. 嘩!做咩妳餐餐都食咁多嘢,仲係咁瘦o架!超羨慕呀!
    [版主回覆06/07/2010 18:35:00]我油浸唔肥嘛!
     
     

    回覆刪除
  6. 外買依兩餐好正, 叫咁多, 妳地會唔會食唔哂架 ?
    乜個雞炒飯咁cute既, 放d雞係炒飯上面叫雞炒飯 , 哈哈哈, 咁都得
    我都係buy妳碗炸魚片豆腐卜豬骨湯烏冬, 唁該下次煮多一碗lunch speed post俾我吖 
     
    [版主回覆06/07/2010 18:35:00]平時我地自己煮兩個人都好大餸,所以我地叫外賣都食得哂架!
     
    其實中式外賣店主要都係做洋人生意架嘛~ 所以咪用返洋人炒飯方法 - 雞同飯分開炒囉!
     
    哈哈~~~ 我都覺得我碗野正d!
     
     

    回覆刪除
  7. 椒盬鷄翼好好味咁喎 , 真係好大盒添 . 香港叫外賣無咁多0架 !
    [版主回覆06/07/2010 18:33:00]依間椒鹽雞翼真係又好食又抵食! 不過唔係間間中式外賣店都咁好食 + 咁大盒架!!
     
     

    回覆刪除
  8. 反而我好少出去食飯, 因為唔知食乜好  所以為有煮飯
    [版主回覆06/07/2010 18:32:00]weekend + 老公放假時我多數比較少煮,因為老公想我陪佢,唔想我spend 咁多時間喺廚房~
     
    不過我都係鍾意自己煮多d! 一來出街食好難唸食乜; 二來我覺得好多野都係我自己煮好食d~
     
     

    回覆刪除
  9. 幾好呀,  你屋企附近有好多中式外賣店, 懶d都ok, 可以叫外賣 
    [版主回覆06/07/2010 18:29:00]中式外賣店係有好多間,不過唔係間間都好味~
     
     

    回覆刪除

Related Posts Plugin for WordPress, Blogger...