台灣 - 紅燒牛肉麵

雖然N年前香港已經有"台灣牛肉麵"，不過之前我一直都無幫襯過......

直至06年我第一次去台北正式認識台灣紅燒牛肉麵，驚為天人!

07年再去台北時，我已經鍾意牛肉麵鍾意到黐咗線~  日日唔整一碗唔安樂!!

愛丁堡開咗既台式小店Meadowood 福爾摩沙，雖然每次去親我都會點炸雞扒飯，不過我會迫老公點紅燒牛肉麵 - 咁我就可以分一杯羹來解解我對地道台灣牛肉麵既相思之苦!

 我唸: 既然Meadowood 整到地道台灣紅燒牛肉麵既味道，咁我應該都搵到材料 + 可以整得到喎!

上網一輪research 後，發現整紅燒牛肉麵所需材料，依度全部都買到喎! 即時買齊材料開工去~~~~

有齊哂材料靠打天才波胡亂煮一下......剛炒好哂材料落煲炆牛肉，聞到香味我已經感覺到 - 係依種味道嘞!!

大成功!!!!

以後唔洗出門口都可以享受到地道既台灣紅燒牛肉麵嘞~~~

1. 牛肉清湯450ml; 辣豆瓣醬3湯匙; 沙茶醬(或沙茶粉)2湯匙; 洋蔥1個切塊; 紅蘿蔔4條去皮切大塊; 蕃茄3個切塊; 蔥3條切段; 薑3片; 紅辣椒1隻切半; 蒜頭6粒; 八角4粒; 台式牛肉滷包1至2個; 冰糖1小塊; 陽春麵適量(即白麵條)。

 台式牛肉滷包

 陽春麵

2. 牛腱約1kg汆水去清血水，取出沖淨泡沫，切大塊備用。(可用牛腩代替牛腱~ 不過我鍾意用牛腱多d!)

3. 燒熱油鑊，下蒜頭、薑片、蔥段、洋蔥塊和紅辣椒炒香。

4. 加入辣豆瓣醬和沙茶醬炒勻爆香後，先放入炆牛肉的鍋。(辣豆瓣醬和沙茶醬份量可自行增減! )

5. 再燒熱鑊，爆香一下紅蘿蔔和蕃茄，盛入炆牛肉的鍋。

6. 最後將牛腱塊炒至金黃後灒紹酒。

7. 牛腱進鍋，加入牛清湯後，再加入清水至蓋過所有材料面。

8. 放入牛肉滷包，八角和冰糖，上蓋煲至大滾後轉中小火炆2小時即成紅燒牛肉湯。

9. 陽春麵煮好後過冷河，淋上煮滾紅燒牛肉湯，灑上蔥花和莞茜即成。