二人世界二餸一湯 - 2011年5月18日 (附食譜)

芥菜鹹蛋肉片湯; 蝦醬通菜炒牛肉 & 金銀蒜蓉蒸吊筒

最近真係少咗好多煮飯......因為又係一年2次既換季大行動!

每年依個時候我都會因為執衫執鞋執到個人好鬼忟爭!!

 因為每次換季都覺得衫 + 鞋永遠都執唔哂......

於是由唔忟執到忟，繼而由忟執到更忟!!!!

野又未執哂加上個人又咁忟...若係依個時候周身唔得閒仲走去煮飯，咁咪即係搵自己笨!

之但係當我正在忙緊換季依個動作e.g. 將冬季衫收埋或入膠袋(打算捐去charity!) + 將夏季衫整理出來，天氣由早個零星期好鬼熱，突然變到近幾好鬼凍!!

係咪應該留返小部份冬天衫唔好收埋以備不時之需呢?

天氣突然變返凍 - 凍就自然想食熱辣辣飯，所以雖然周圍都係未整理好既衫 + 鞋，不過忙極都要煮飯食!
唔食飯又邊有力執衫呢?


我發現每次只醃6隻鹹蛋，都可以last 一段好長既時間......

 3月尾浸果次最後2隻用來滾芥菜肉片~ (只用1隻蛋白!)

最後依2隻個黃靚到爆哂燈~ 紅卜卜十足落咗蘇丹紅咁款!

(不過趕住開飯無影到相.......)


有理由相信 - Mr.T 已經完全克服咗佢對蝦膏 / 蝦醬既厭惡......

 因為佢話依碟野 - 蝦醬通菜炒牛肉超級正喎!

一開始我仍然要好似平時咁 - 省去蝦醬2字，只話比佢知係"通菜炒牛肉"......

到佢食落話超級正既時候，我先揭曉埋蝦醬!

可以令Mr.T 由以前超級憎蝦醬，到而家覺得蝦醬煮既餸係超級正.....真係超級有滿足感呢!! 哈哈~~~~

我從來炒咩牛肉都唔會用牛柳......原因只有一個 - 因為牛柳好貴!!

我覺得用牛柳切片來炒，整得好味係應份既!  (如果用牛柳來炒都整得唔好味的話，真係要好好檢討吓!! )
不過牛肉要炒得好味，唔一定要用牛柳果喎!

今次我用咗酒樓泡嫩油既方法來整依個蝦醬通菜炒牛肉，用既部位係牛肉眼~

可能好多人會覺得自家屋企煮餸都泡嫩油會好麻煩......

不過依個只短短幾秒鐘既"麻煩"過程絕對係值得既 - 炒出來既牛肉眼香軟嫩滑，媲美牛柳呢!! 


之前整親吊筒，無論係豉油皇、三杯、椒鹽......全部都好似係炒既!

 今次試吓用蒜蓉蝦既方法去蒸，個汁用來撈飯.......正~~~~~~


>>>>>>>>>>>>>>>>>>>>>>>>>>>>>>>>>>>>>>>

 時光倒流上個禮拜四(5月12日)果餐......

其實上星期我都忙裡偷煮.......咗1餐咁大把!

 有梅子蒸排骨;

 椒絲腐乳菠菜

另加前一晚外賣食剩既咖喱雞 + 炸雞翼......不過無湯!

每月一補 - 當歸紅棗燉牛腱~

試咗幾個唔同材料既滋補燉品，始終都係覺得依個組合最好味!!


 芥菜鹹蛋肉片湯食譜click here~

 蝦醬通菜炒牛肉食譜click here~

 金銀蒜蓉蒸吊筒食譜click here~

 梅子蒸排骨食譜click here~

 當歸紅棗燉牛腱食譜click here~