淮杞花膠蟲草花雞腳湯; 自製脆皮燒肉; 蠔汁鮑片扒白露筍 & 金銀蛋菠菜
海味清貨大行動第二炮 - 開始清清d花膠!
因為想試試V媽媽買比我既蟲草花，所以拿咗咋落去......
煲成依個集合咗花膠、連筋既豬腱 + 雞腳，香甜又充滿骨膠原既淮杞花膠蟲草花雞腳湯!好耐無整過燒肉!
早幾日睇電視見到Ken Hom 話整燒肉時喺焗盆內加清水一齊來燒，可以保持燒肉水份，燒出來既燒肉會好juicy~
心思思想試吓係咪真......
躝完街返到屋企拿拿淋煮完趕住開飯，等唔到燒肉攤涼先斬件，
所以斬得好樣衰......
老公食時仲特登"殊"我，話要咬個皮卜卜脆既聲比我聽吓!
(洗鬼你食比我聽咩? 我斬果時都知道脆卜卜啦!!
)脆皮之下充滿肉汁! 而且可能今次風乾時間長 (因為我去咗躝街!
)，今次舊燒肉好食過之前整果幾次呢!! 
自覺進步咗啊! 嘻嘻~~~~
已經可以煮到100% V媽媽既味道嘞~~~~~
自製鹹蛋仲有4粒.......
想快手食埋佢，等個樽可以再浸新鹹蛋!
淮杞花膠蟲草花雞腳湯食譜click here~ 自製脆皮燒肉食譜click here~ 蠔汁鮑片扒白露筍食譜click here~ 金銀蛋菠菜食譜click here~ 自製鹹蛋(鹽水浸製法)食譜click here~
(Empty)
回覆刪除(Empty)
回覆刪除好肚餓添 哈哈
回覆刪除[版主回覆05/08/2011 20:25:00]咁快d開工煮返餐好野比Katie 媽媽食啦!
一直以黎,我都無睇開 y blog既習慣,最多只係睇下 hk forum 睇下香港發生緊咩事,今朝見悶悶地上網serach 睇下有無 recipe 岩整, 無意中開左你個blog , 我用左個幾鐘睇左你好多篇交,生活點滴真係好有共鳴
回覆刪除但我無你整野食咁叻,我最叻只係自己用oven整過barbecue pork , 你勁我好多 ....哈哈哈
我過左澳洲近10年喇,由初初既好唔習慣形而家漸漸適應習慣左澳洲人"悠閒"既生活, 每年放假返香港反而好唔慣" 點解d人張行咁快既 ? 個個都好似好趕,去邊呢 ? " " 點解條街咁多人既 ? 今日明明係節喎 ? "
我想問英國係唔係咁架 ? 澳洲呢邊假期會無咩人出街,
平日鋪到收6點 , 係某幾間大型小小既就收7點,星期日鋪頭係更加係收4點 , 公眾假期都係 , 如果大時大節更加唔開 , 英國係唔係咁架 ?
雖然我地相隔好遠, 網上遇到真係好奇妙
[版主回覆05/08/2011 20:40:00]妳好啊anna_bb!
過獎嘞~ 我整野食唔叻! 我都係邊煮邊學咋~ 我十幾年前未結婚時來英國讀書，自己一個人住咗一段長時間，所以大大話話都煮足十幾年咯!
哇~ 澳洲果邊咁架! 會唔會住市區 + 郊區有分別呢?? 我住喺Glasgow，係蘇格蘭最大既city~ 我依邊平日有d商場收6.30pm，有d收10pm; 星期日就有d收6pm or 8pm; 公眾假期大部份店都照平日開架，最多只會早收半粒鐘! 依邊既店每年只有2日全日唔開 - 就係聖誕節 + 元旦嘞!
Internet 真係令人拉近咗好多距離呢! 我依個blog 開咗3年，認識咗好多世界各地唔同既網友，當中有部份仲做埋好朋友呢~
我都好想焗燒肉不過又驚難度高攪唔掂
回覆刪除[版主回覆05/08/2011 20:23:00]唔難架! 只係少少麻煩啫~ 妳而家隨時試吓整都得啦!
三餸一湯...白飯任裝....樣樣都好想食呀....
回覆刪除我在等梗飯盒中咋.....
[版主回覆05/08/2011 20:22:00]妳煮野食咁叻，無野難到妳啦!
今日母親節喎~ 點解等飯盒既? 妳開緊工呀??
祝Samchi 媽妳母親節快樂! 大細靚囡鍚哂妳~
Mr.T 食時仲特登"殊"練，話要咬個皮卜卜脆既聲比妳聽吓<-- 笑死我!!!
回覆刪除自己燒燒肉真係第一次聽呀!!!好犀利呀! 英國的唐人街有冇燒味鋪架??
話說我有一次整 金銀蛋菠菜, 我成曰都想整到好似出面食o個D 蛋白花,咁我天真的以為係咸蛋白,於是將D咸蛋白打落去,等左一陣係咁攪, 點知得一舊仔, 完全都唔係成碟鋪滿o個個效果, 之後問人先知原來係蛋白黎o既,其實好似你咁整個樣仲靚, 下次再煮時都試下先!
[版主回覆05/08/2011 23:28:00]人地一路食飯一路睇緊電視，佢突然"殊"我，仲以為乜鬼野咁緊要.....
過獎嘞塔羅女神~ 燒肉其實唔難整架，有部焗爐就整到架嘞!
我無用生蛋白來整依個菜呀，因為我每次整都會用2隻鹹蛋，而且我會先整熟鹹蛋，因為容易d切粒嘛~
金銀蛋菠菜好味。。。
回覆刪除但朋友仔唔好皮蛋又唔好菠菜。。。
我都係唔會整啦。。。
不過返 ＨＫ 會同我媽媽出去食。。！！
ＢＴＷ Ｈａｐｐｙ Ｍｏｔｈｅｒ’ｓ Ｄａｙ。。。！！
[版主回覆05/08/2011 23:20:00]唔食菠菜可以用其他菜整都得架! e.g. 莧菜 / 豆苗~ 佢唔食皮蛋咪益哂妳囉!
Happy Mother's Day Ka Man! 今日有無打電話比妳媽媽呀?
妳好勁呀! 燒肉都識整! 我想問要放幾多粗鹽喺豬皮面呀? 如果放得太多會唔會好鹹ga? 我都好想試下整呀.....
回覆刪除[版主回覆05/10/2011 05:44:00]過獎嘞小菲菲~ 燒肉其實唔難整架!
豬皮面我唸大約放5mm 鹽左右啦~ 唔會太鹹既，因為焗到咁上下要刮走d鹽再焗架嘛!
我住係brisbane ,屋企勁近city, 唔算郊區,雖然個區無melbourne / sydney 果d咁大,但都未算郊區掛 & 我知melbourne /sydney 果邊都係差唔多情況,最多係收晏小小 , 情況唔相差得好遠
回覆刪除而家有比較之下,睇落澳洲真係落後左D喎 , 不過其實已經比我當年過去果陣,進步左勁多, 想當年我過去果時,10年都遇唔到1個香港人(除左學校 ),起碼而家出街,好多時會聽到廣東話 , 有種好親切既感覺
可能近掛睇得小說太多,近排成日都覺得緣份好奇妙,我地相差10萬8千幾公里
咁都可以網上傾到2句 , 好神奇 --- ( 我諗我中小說毒太深喇 )
當年我有諗過去英國讀, 同時報哂澳洲同英國 2邊幾間學校 , 最後澳洲果邊出信收我先,我就選擇左澳洲 , 差小小我就可能會去英國....
其實果邊讀書係點架 ? 會唔會好自由 ?
SORRY 我好似有太多問題 , 其實我好有興趣想知, 2邊生活其實係點相差幾多 ... 如果煩到你,唔好意思~
[版主回覆05/10/2011 05:41:00]無覺得煩~ 都係吹吓水交流吓啫!
我仲以為澳洲好多中國人既添! 我十幾年前來英國讀書，果時college 已經有好多亞洲人架嘞~ 香港人都有唔少!
英國讀書方式的確同香港讀書方式好有分別! 不過係咪自由就見仁見智嘞~ 我未來英國前聽過好多人云亦云 - 咩英國讀書好free，無筆記無書.......講笑咩? 無書無notes 咁點讀呀? 想當年我係要攞住環保袋去大學圖書館借大叠參考書"抬"返屋企做功課架!
不過洋人讀書方式唔可以死背，一定要將理論apply 去真實例子，要用腦思考重於靠記憶去背 - 依點真係同香港填鴨式教育好大分別!
妳所講既"自由" - 我唸應該係洋人讀書方式要獨立! e.g. 老師比一樣功課妳時講幾時係deadline 要交，到咗deadline 妳好自動自覺交，唔交就各下自付，無人會催妳! 唔交咪無分食蛋囉!!
" Ken Hom 話整燒肉時喺焗盆內加清水一齊來燒，可以保持燒肉水份，燒出來既燒肉會好juicy~ "
回覆刪除哈哈哈...比你"挑"起左我條引 , 我決定聽日再試下整過barbecue pork 先
之前好努力試過一次,明明跟足recipe,但整左出黎,硬係怪怪地咁
我男朋友重好直接問我係唔係整緊豬肉乾
之後我就再無整過喇...
而家決定聽日再試下先 , 我諗個原理應該都係一樣掛 , 希望成功喇
[版主回覆05/10/2011 05:26:00]妳指既barbecue pork 係咪即係叉燒呀?
其實任何食譜都只可作參考! (方太、李太果咋食譜都係!)畢竟每個人手勢、用料、甚至唔同類型焗爐溫度 + 傳熱都可能會有出入，所以幾個人跟同一食譜煮出來既食物，味道口感都未必會一樣架!
至於失敗時點去改善，就要靠經驗 + 嘗試自行修改e.g. 份量、時間、溫度....etc~
祝妳既barbecue pork 成功啦!
其實焗燒肉或焗原隻雞時 , 焗盆放水除了你說的好處, 另一好處是不會產生大量油煙 , 因為高溫焗得30mins 以上時會有"炸炸聲" 滴油在焗盆, 那會產生很多油煙 , 如果加了水, 就冇了那陣油煙....因我第一次焗時攪到屋企好似煙霧迷漫 , 全屋兩天都一陣豬味呀 , 到第2次焗是加了水, 已經沒有這情況 .
回覆刪除[版主回覆05/10/2011 05:18:00]我用果種一座既風扇式焗爐焗野無煙架! 用grill 功能要打開焗爐門先會有煙，所以我從來都未用過~
不過今次加咗水來焗，焗出來既燒肉的確juicy 好多!
唉~~~我好耐無煮過飯喇，見到你煮一枱餸，我好羨慕呀)))
回覆刪除[版主回覆05/10/2011 05:14:00]
妳煮野食咁叻，洗咩羨慕呢~
我終於問到街市邊度有雞腳買嘞,聽朝即刻去買返d返黎睇門口
回覆刪除我未食過金銀蛋菠菜架,好正咁喎
我今水醃既鹹蛋好鹹,完全唔可以烚黎送飯,煮餸岩d,我又要試
[版主回覆05/10/2011 05:12:00]恭喜妳終於可以煲雞腳湯嘞!
我老公不知幾鍾意金銀蛋菠菜! 煮依個就唔怕佢唔食菜啦!!
ｈａｐｐｙ ｍｏｔｈｅｒ’ｓ ｄａｙ．．．我一早打返去比我媽媽．．．
回覆刪除好彩我地同 ｈｋ 只係 ２ 個鐘時差 （岩岩上個月較咗冬令鐘）．．．
我尋日放工真係好好好想食皮蛋．．．於是對自己好 ｄ 放工去買咗 ２ 隻黎蒸蛋，加埋之前醃好嘅咸蛋．．．
你今年都同以往一樣 ｏｎｌｉｎｅ 訂花送比 Ｖ 媽．．？？ Ｖ 媽係唔係好開心呢．．？？
[版主回覆05/10/2011 17:41:00]皮蛋就咁食得果喎~ 妳攞去蒸架?
係呀~ 訂咗花呀! (我FB放咗札花張相啦~) 99早兩星期又返咗香港，所以訂咗2札，一人一札!
我仲未買蟲草花呀 都好想試下呢 平過冬蟲草好多呢~
回覆刪除想請教多樣野 醃咸蛋用鹽醃既效果好D? 定係鹽水呀?
[版主回覆05/11/2011 20:10:00]雖然蟲草花外型同冬蟲草唔同，不過食落都係脆脆爽爽，口感都幾似冬蟲草架!
我自己覺得醃鹹蛋用鹽水浸效果比較穩定!
D燒肉好正WO~~趣卜卜實好好味啦~
回覆刪除[版主回覆05/11/2011 20:04:00]其實隔咗咁耐無整過，初時都怕燒出來個皮唔夠脆....估唔到今次竟然進步咗仲脆過之前幾次整喎!
係吖我都好鍾意就咁食皮蛋架．．．
回覆刪除不過嗰日又心血來潮蒸 ３ 色蛋．．．
朋友仔唔好．．我一個人食晒 ｈａｈａ．．！！
我見到你送比 Ｖ 媽媽札花．．．
好靚吖．．．佢見到一定好開心．．．
[版主回覆05/11/2011 20:02:00]三色蛋正呀! 哇~ 妳一個人食哂咪好滯囉.....
我99幾星期前都返咗香港，所以母親節果日我地訂咗2札花(一模一樣!)，一札送比V媽媽，另一札送比99~ 佢地兩個收到花都好開心!
燒肉都識整 , 叻叻 V 女
回覆刪除[版主回覆05/11/2011 19:57:00]過獎嘞Maggie! 燒肉唔難整架，不過處理時間長啫~
我都好耐無焗燒肉喇...原來加盆水一齊焗效果更好, 遲D要試試先!
回覆刪除[版主回覆05/11/2011 23:46:00]加盆水來焗會令燒出來既燒肉juicy 好多!
係啵﹐點解你的燒肉切得咁完整既? 我成日切到散晒﹐的皮裂晒甩甩下~
回覆刪除[版主回覆05/15/2011 04:04:00]我依舊燒肉因為趕住開飯已經斬得好衰相架嘞! 所以我都無咩心機砌靚佢.......我依碟都有裂皮呢! 想唔裂就唔好太心急，出爐後攤一攤涼一陣先斬~
嘩..你煲好多料牙!
回覆刪除實好正定啦!
[版主回覆05/25/2011 08:13:00]係呀~ 料多湯一定甜嘛!