太62生日飯@中國城 (2009年6月23日)

太62太99過咗來飲老公表哥果餐，喺度小住順便過埋生日，尋晚喺中國城擺咗2圍~ ("中國城"係間酒樓個名呀~ 唔係夜總會!!!!! )

自從泗和行既昆仲軒開張之後，中國城已經少咗好多生意! 而且個個中國人結婚擺酒，都幾乎去哂樓面夠哂大既昆仲軒~ 聽聞成個夏天幾乎所有星期二都已經比人book 哂來擺結婚酒，所以尋晚太62既生日飯去咗中國城~

昆仲軒初開張時食物好唔掂 - 個個都話唔好食~ 後來過咗一排改善咗好多，食物變到好得 - 飲茶點心又多款又好食! 不過講到擺酒飲宴既食物，昆仲軒就遠遠比唔上中國城!!!!!

 紅箭咀 - 99~ 妳做咩呀???  綠箭咀 - 因為會見到唔太想見既人，所以特別著咗件戰衣，上面印住"Don't Be Jealous"~

尋晚既菜好豐富! 而且好好味~ 不過最衰上菜速度太鬼慢!! 餐飯食咗足足4粒鐘......

 燒味拼盤~ 內容好豐富 + 好好味! 有切雞、油雞、燒鴨、叉燒、燒肉、白雲鳳爪、海蜇 + 我最鍾意既燻蹄~~~

 瑤柱髮菜~ 依個菜好食過昆仲軒既多多聲!!! 瑤柱炆得好腍好入味; 髮菜炆得剛剛好，仍然爽口唔會一pat pat~~~

 西籣花 + 夏威夷果仁炒鮮帶子~ 帶子爽口鮮甜; 夏威夷果仁香脆! 好好食~~~~

 蛋白蝦球~ 依個麻麻地，因為蛋白冇乜味，蝦球尚算鮮味，不過比蛋白拉低哂........

 雞絲翅~ 我一向對魚翅都係麻麻地，我覺得魚翅最重要係個湯底，依個雞絲翅都係好過昆仲軒好多~~ 湯底好鮮!!!

 每圍2隻薑蔥大龍蝦~ 其實龍蝦理應度度都差不多.......不過竟然連龍蝦都炒得好食過昆仲軒!!! 龍蝦好鬼大隻，鑊氣好夠炒得好乾身，所以好香口~~~

 原隻炆乾鮑~ 有"鮑魚精"之稱既我，好鍾意依個~~~ 鮑魚炆得好入味好腍，正! 不過鮑魚都幾大隻，所以要用刀叉來食~~~ (當年我地結婚喺中國城擺酒，都係食依種鮑魚架!)

因為上菜速度太慢，食下等一輪先再上菜......搞到我依個時候有少少胃痛.........

 炸子雞~ 賣相靚過昆仲軒好多! 不過我因為胃痛所以冇食到，但睇個樣都知好食過昆仲軒!

抖咗一道菜後，胃痛好好多!! 繼續......

 清蒸多寶魚(Turbot)~ 條魚超大條，成條魔鬼魚咁款!!! 好新鮮好正!!! 咁大條魚食到乾乾淨淨~~~

 冬菇炒伊麵~ 平時飲宴我好少食最尾果幾道飯麵，不過依個好夠鑊氣好乾身，非常好食!!!

 糯米飯~ 99話好鹹 + 叫大家唔好食! 所以我都冇試到......

 每圍2大碟飯後果~ 但我例牌一舊都冇食到......

 飯後糖水 - 杞子紅棗燉雪耳~ 我冇食.......

 麻蓉壽包~ 我都冇食......

 好靚既生日蛋糕~ 依個食咗幾啖 - 要食清楚蛋糕質地如何嘛! 希望自己有一日會成功地焗得出一個似樣既忌廉蛋糕啦~~~~

 太62生日，人人派一封利是~ 真係名符其實"又食又拎"! 哈哈~~~~~

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

我好proud of 我自己! 因為尋晚雖然我見到一d我唔太鍾意既人，仲要同枱食飯........可能有人仍然好介意我早幾日反擊，所以初到場時見到我面黑黑! 但後來變成有講有笑，成餐飯氣氛好融洽~ 臨走時對方仲主動同我擁抱道別!

我絕對唔認為自己"假"~ 因為我係真心既! (對方係咪真心我就唔知嘞! ) 我覺得反擊我已經反擊咗 + 我既目的已經達到咗 - 想佢收聲! 我而家係完全冇hard feelings，早幾年既我根本冇可能做得到! 所以我為自己既大方覺得好自豪! 覺得自己進步咗~~~

尋晚好熱鬧，食物又好味，老人家好開心~ 我覺得太62年紀咁大但好有福氣! 不過令我想起V嫲嫲.........