V記芒果雪糕

Weekend 買咗盒好靚既Honey Mango~ 雖然我都覺得好香甜好好味，不過一向我都唔好水果，所以剩返既就用來整芒果雪糕比老公食!

依個芒果雪糕同V記朱古力雪糕一樣 - 唔洗用雪糕機架!

1. 材料: 重忌廉(Double Cream)500ml, 全脂奶235ml, 蛋黃3個, 幼鹽1/4茶匙, 蜜糖2湯匙, 芒果2個, 糖霜100g。

2. 將全脂奶和幼鹽用小火加熱(不要煮至滾!); 煮至微微出煙時熄火，加入蜜糖完全拌勻。

3. 蛋黃和糖霜用電動Mixer 打成吉士醬(custard)。

4. 將吉士醬慢慢加入(2)蜜糖牛奶內，邊加邊搞拌，並用小火慢慢加熱。(不要煮滾!)

5. 煮至吉士醬和蜜糖牛奶完全拌勻，混合物微熱變稠，將混合物盛入玻璃大碗內，再將玻璃碗坐入冰水中，待混合物冷卻。

6. 芒果起肉用搞拌機打成蓉。

7. 重忌廉用電動Mixer 打至挺身; 將打起的重忌廉 + 芒果蓉加入已涼的(5)中，再用Mixer 打勻。

8. 將拌勻好的(7)倒入容器中，放入冰格先冷凍45分鐘至1小時，取出用湯匙搞拌打勻，再放回冰格冷凍。

9. 重復(8)2至3次後，再冷藏3至4小時待雪糕完全凝固即可。

NOTE

- 食用前可先取出雪糕，放入普通格冷凍30分鐘後才食用，這時的雪糕會軟硬適中;

- 步驟(8)作用為打碎材料中的水份，在雪糕冷凍成型過程中結成的冰粒! 重復步驟(8)的次數越多，雪糕越香滑;

- 因為芒果有好多汁，所以芒果雪糕混合物中會有較多水份，凝固過程中更容易形成冰粒，所以可能需要多搞拌幾次;

- 依個食譜係根據一個英文食譜而改良，材料係重忌廉(Double Cream)，好鬼肥架!!! 如果怕肥既話，可以改用奶脂較低既淡忌廉(Whipping Cream)!