2009年6月7日星期日

消暑佳品 - 自製香濃豆漿


上星期冇啦啦買咗個Kenwood 攪拌機,咁我冇理由淨係用來整杏仁糊架~ 我知道攪拌機可以整到好多野,我當然要物盡其用啦!  於是上網搵吓有乜野飲品要用攪拌機整......今次整咗豆漿!

1. 黃豆洗淨後,加水過面泡浸。(夏季約8小時; 冬季約20小時; 春、秋季約15小時)

2. 隔去浸黃豆的水,將黃豆加水用攪拌機打成豆汁。

3. 將豆汁倒入煲湯袋,隔出豆渣搾清豆汁,即為生豆漿。

 煲湯袋~

4. 將生豆漿煮滾後,轉中小火繼續滾約30分鐘~ 期間用湯勺除去浮起的泡沫,並要間中搞動豆漿以免煮焦。

5. 撈起浮面的腐皮。

6. 煮好豆漿熄火後加入適量冰糖,不用搞動豆漿,蓋上蓋讓冰糖自然溶化 + 豆漿自然放涼。

7. 將完全放涼後的豆漿裝進瓶子,放入雪櫃冷凍,即可飲用。

NOTE

- 黃豆 + 水的比例為1:6 - 即1份黃豆 + 6份水; 而冰糖份量可因應自己口味喜好隨意增減~

- 我今次用咗200ml 黃豆、1200ml 水 + 60g 冰糖;

- 未經煮熟既黃豆或生豆漿含有皂豆素,未完全煮熟會引起腹痛 、嘔吐、腹瀉等中毒症狀,所以千萬不可飲用未完全煮熟的豆漿!!!!

- 煮豆漿時會出現"假沸騰"現象,除咗容易滾瀉之外,亦不能徹底清除對人體有害的物質~ 所以煮豆漿時不要蓋上蓋,可幫助水蒸氣帶走有害物質!

- 豆漿煮滾後持續再滾30分鐘,可徹底清除皂豆素,亦可破壞黃豆中胰蛋白抑制酵素作用,以免令胰臟肥大;

- 煮好的豆漿熄火後不要搞動,以免搞動時讓空氣中細菌跌入豆漿內,而且豆漿內的蛋白質令細菌加倍容易滋生,從而令豆漿容易變酸變壞!


 變化 - 鹹豆漿~ (鹹豆漿食譜click here~)

 變化 - 黑豆漿~ (黑豆好處)
 


18 則留言:

  1. 原來豆漿要煲咁耐先得架? 咁地用開威馬豆漿機果d煲好少時間喎! 咁怕唔怕 清除唔到皂豆素呢?
    [版主回覆06/08/2009 17:53:00]皂豆素只要煮熟豆漿就可以清除哂 (煮滾後繼續滾5分鐘~); 煮30分鐘目的係要 破壞黃豆中胰蛋白抑制酵素作用! 如果唔係多飲的話會令胰臟肥大~~
     
     

    回覆刪除
  2. Mee ...... MeeMoreMore2009年6月7日 下午8:31

    e ..... 小姐 , e 個就係你新買的攪拌機ar~~~
    [版主回覆06/08/2009 17:50:00]就係依個~ 但有乜咁好笑??
     
     

    回覆刪除
  3. mama教加塊薑煲,無甘涼呢
    [版主回覆06/08/2009 17:49:00]係咪1塊夠架嘞? 咁d豆漿會唔會有薑味? 我唔想有薑味啊~~~
     
     

    回覆刪除
  4. +薑唷...冇咁涼唷... & 你仲可以搞埋芝麻糊唷... 超好味....
    [版主回覆06/08/2009 17:48:00]我唔係好鍾意芝麻糊啊.....
     
     
     
     

    回覆刪除
  5. 你果然十分喜歡煮嘢食.新鮮自製當然比在街買好好多.但對我來講我覺得都幾多工序時間又長.
    [版主回覆06/08/2009 17:41:00]我又唔覺得多工序喎....時間最長都係浸黃豆之嘛~ 浸住又唔洗理佢既!  早知豆漿咁易整,我就一早買個搞拌機啦~~~
     
     

    回覆刪除
  6. 自製既豆漿一定有益又好味
    [版主回覆06/09/2009 08:03:00]係咪有益d就唔知,不過就真係好味過街買囉! 街果d應該溝咗好多水,好淡又唔夠香.....
     
     

    回覆刪除
  7. Nice to meet you. I really like this recipe and it sounds easy, I will try to do it, Thanks
    [版主回覆06/09/2009 16:03:00]you're welcome~~~~
     
     
     

    回覆刪除
  8. Mee ...... MeeMoreMore2009年6月8日 下午7:32

    噢 ....... 明知故問的好笑啫
    [版主回覆06/09/2009 16:02:00]C9個腦有些少鈍鈍地......
     
     

    回覆刪除
  9. 我以前都整過, 係好濃味, 但係唔夠滑, 同埋都係有d渣, 你冇呢個問題咩?
    [版主回覆06/09/2009 15:59:00]我又冇依個問題喎~ 妳用乜野來隔渣呀? 我只用煲湯袋隔咗一次渣,好得喎!
     
    妳可以去豆腐舖買塊豆腐布吖~ 有網友都買咗,專業d嘛!
     
     

    回覆刪除
  10. 唔講真係唔知煮豆漿都咁多學問, 我平時仲以為攞啲豆攪水攪碎佢煮下就ok, 咁叻連呢啲都識。
    [版主回覆06/10/2009 17:55:00]睇得多網上 / 食譜書多就得架嘞~~~~~
     
     

    回覆刪除
  11. 我成日想整豆漿, 不過想唔起可以用攪拌機整, 等我又試下先.
    [版主回覆06/10/2009 17:53:00]我都係搵開食譜先知可以用搞拌機! 快d試吓啦~~
     
     

    回覆刪除
  12. 煲湯袋洗淨可以用返架....我時不時都有整比二位靚囡飲架....
    [版主回覆06/12/2009 22:39:00]係呀~ 我果包新開只用咗一個,不過唸唸吓唔捨得揼,所以洗返乾淨!
     
     

    回覆刪除
  13. 我都好耐冇整豆漿同杏仁茶喇.... 早排攞返個攪拌器出嚟都諗住整, 但係整完 kimchi 就忘記咗....
    [版主回覆04/24/2010 02:06:00]整kimchi 要用搞拌機?
     
     

    回覆刪除
  14. 係呀~ 我懶, 唔想慢慢切蒜頭, 薑同磨蘋果蓉嘛, 咪一次過攪碎哂囉~~~
    [版主回覆04/24/2010 18:43:00]OIC~ 其實我都係咁懶架!  不過我另有一部專用來搞碎蒜頭既mini chopper~
     
     

    回覆刪除
  15. 我今日跟你個食譜學整豆漿,不過發覺煮完30分鐘之後,啲豆漿已經無咗一半喇.....蒸發哂
    [版主回覆11/12/2010 19:40:00]唔係大滾呀~ 只係小小bubble 咁simmer 呀! 可以蓋蓋留少少鎼,不過要小心滾瀉!
     
     

    回覆刪除
  16. 自己整豆漿好多功夫,我細個個時我媽成日都整...不過真係比街買好飲好多...
    [版主回覆02/02/2011 19:56:00]始終自製既可以調教返自己口味嘛!
     
     

    回覆刪除
  17. 自己整豆漿好多功夫,我細個個時我媽成日都整...不過真係比街買好飲好多...

    回覆刪除
  18. 謝謝~ 剛剛有架攪拌機晌度~ 可以試下lu~

    好彩晌yahoo 搬前搵到你呢個blog~~~^^
    [熊仔回覆10/30/2013 09:09:32]我搬左lu~ 不過舊post 就未必會搬過去~

    宣傳下先~ 新居晌呢度:

    http://geniusbear.pixnet.net/blog

    得閒就黎探下我啦~
    [版主回覆10/30/2013 01:45:55]唔洗客氣!
    咁你會唔會搬呀? 你畫d公仔好得意呀,要繼續加油啊~
    希望遲吓喺新平台都會見到你!

    回覆刪除

Related Posts Plugin for WordPress, Blogger...