問答發開口夢 (2010年7月9日)

我唸好多人都試過發開口夢! 我將發開口夢既情況大致分為以下幾種......

當事人意識狀況:

A. 好多時發開口夢既當事人根本全不知情 ，事後由身旁當時清醒既人覆述;

B. 有時當事人會處於半夢半醒之間，對發開口夢既情況 + 內容略知一二~

內容類別:

1. 無意識 + 無內容 - 只發出鬼食泥依依哦哦既聲音，內容不明，依個應該係最常既情況;

2. 無厘頭單句 - 多數只得一句，係有內容既，不過內容大多無厘頭;

3. 對答型 - 有系統既對答，但內容無厘頭~

我唔知自己發開口夢算唔算密呢? 記憶所及有以下幾次......

小學時代 (A + 2)

時為應該係我剛升上小學，香港首播"IQ博士"，當時我好鍾意小吉!

一次學校長假期去V媽媽處住，V媽媽話我半夜瞓瞓吓突然坐起身不停用張被撥涼，一路撥一路好似小吉咁"bubi~ bubi~ bubi~ bubi~"......然後重新瞓返低繼續瞓，全個過程100%熟睡~

我對依件事毫無印象 ，V媽媽同我覆述時順便問我: bubi~ bubi~ 係咪小吉來架?

大學時代 (B + 3)

喺舊居同當時只拍緊拖既老公一齊攬住睇電視，不過佢一路睇電視一路睇書，我就睇睇吓電視恰著咗但老公唔知......

我: 唔好搞我個電視!! (失驚無神 + 好唔老黎~)

  老公: 我都無搞過個電視!!!! (反應好大 - 因為我"冤枉"咗佢!)

我: 唔~ (係果種"算你啦"既語氣~)

老公隨即聽到我打鼻鼾，知道我發開口夢!


結婚初期 (A + 1 + 3)

一個weekend 下午，老公打緊機，我喺梳化瞓晏覺......

我: 你知唔知XXX出咗第4集? (老公話聽唔到XXX係乜!)

老公: 咩野出咗第4集?

(老公係知我瞓著咗既~ 不過at this point 佢唔知我又發開口夢，只以為我啱啱醒咗......)

我: XXX呀! (仍然唔知我噏咩! )

老公: 咩話? (開始有懷疑唔妥......)

我: ............(我無回答佢，好明顯係熟睡緊啦!! )

老公: 妳知唔知自己講緊乜呀?

我: erm erm erm...... (老公見我同時聳聳兩肩表示"唔知")

結婚快4年 - 前晚7月9日深夜 (B + 3)

老公一邊睇書，我地一邊傾閒計~ 傾傾吓我開始瞓著正處於半夢半醒間，不過老公未察覺......

老公: HonHon~ 依個故事幾得意，我讀比妳聽吖! (佢讀緊一本短篇小說~)

我: 好呀~ (其實已經瞓著咗一半.......)

老公: blah blah blah.........

老公一路講緊個故事，我一路都有"唔~ 唔~~ 唔~~~"咁應佢，不過其實我根本唔知佢講緊乜......

老公講完故事見我毫無反應，就鍚咗我一啖say good night 繼續睇書 - 我當時仲係feel 到佢鍚我既!

隨後我意識越來越模糊開始入睡，突然......

我: You suck!

老公: WHY????

我: Cos you couldn't get the guy!!

老公: What guy? HonHon~ Are you serious?? (都知知地我應該係發開口夢架嘞!)

我: Sorry~ Sorry~~ 我頭先講咗乜? (已清醒返大半~)

老公: 妳話我suck! 又話我can't get the guy!!

我: 我好似話"couldn't"喎! (已經差唔多完全醒哂，仲識搞返清楚英文grammar! )

老公: 我無搞妳個電視，又唔知要get 邊個guy呀! 妳瞓覺啦妳!! (承機舊事重提串我!!)

其實Mr.T 都比我捉過佢發開口夢架!


而Mr.T 係A + 2型~

多月前一個深夜，Mr.T 瞓到死豬一樣，我就睇緊書......

 老公: KENCO!

 我: HonHon~ 你講乜呀??

 老公: ..............(見佢唔應我，我就知佢發開口夢嘞~ )

Kenco 係卡夫旗下一個即沖咖啡品牌~  唔知香港有無得賣? 我完全唔飲咖啡; 老公都好少飲，所以我屋企係無咖啡既!

不過老公鍾意飲expresso，有時出街食飯飯後都會點來飲，間中喺office 都會飲即沖黑咖啡~ 

第二朝......

 我: 你知唔知你尋晚發開口夢呀?

 老公: 係咩? 唔知呀! 我講咗乜呀??

 我: 你淨係話"KENCO"咋! 你飲Kenco 既咩?

 老公: 唔係呀! Office 果樽係Nescafe 來架......

同場加映 - "Mr.T 爛瞓玉照1張"
有無見過人打打吓機恰眼瞓，會就咁扒喺地下瞓到死豬咁款?