唔知做乜既"心魔" (At the End of Daybreak) - 2010年7月15日

睇完成套戲有好多野覺得唔明......

- 唔明套戲點解叫做"心魔"?

- 唔明套戲英文名點解叫做"At the End of Daybreak"??  

- 唔明套戲究竟想表達乜野???

- 唔明點解惠英紅會攞最佳女主角????  

故事簡介: 故事發生在今天的馬來西亞。23歲的德仔(徐天佑)，在互聯網上認識了未滿16歲的女學生盈(黃明慧)，二人更偷嘗禁果。二人關係一直沒有人知道，直至有天盈的父母在她房內找到避孕丸，終於東窗事發。

德仔的母親(惠英紅)一直未能接受丈夫移情富有的妹妹，終日酗酒逃避現實、自暴自棄。但她對兒子有極強的佔有欲，甚至願意為他做任何事。盈父母打算舉報德仔與未成年少女發生性行為，德仔母懇求讓他們私下賠錢了事。盈父母答應了，德仔母遂向前夫借錢。怎料盈父母收錢後仍堅持要報警。盈偷走去見德仔，德仔和母親之間的緊張關係一觸即發。幾個人的一生就此被毀掉......(摘自頭條日報)

剛開場時唔明點解戲裡面既人講野都半中半英，而且英文發音騎呢，真係聽到我滴哂汗......心唸: 唉~ 不如唔好講英文啦!

後來先知道原來故事背景發生喺馬來西亞~ (不過我以前大學時來自馬來西亞既同學，全部英文發音都好好聽果喎! )

知道故事背景係馬來西亞之後，我就唔明 - 戲只係道出一現今香港社會好普遍既青少年問題，唔明點解戲既地點要set 喺馬來西亞呢?  

後來知道原來導演何宇恒來自馬來西亞!

馬來西亞、香港 + 韓國三地合資，加上導演喺自己地頭，理應拍起來得心應手; 不過結果強差人意，我覺得大部份睇完既觀眾都應該會係咁既樣 -!!

戲裡面最主要果幾個主角......

- 演德仔既徐天佑由開場到結尾完全只得一個表情 - 黑口黑面! 每句對白都係唸口簧讀出來 - even 連果句單字粗口;

- 演女學生盈既黃明慧又係全套戲只得一個表情 - 無表情!  基本上佢可以只拍一個鏡頭，其餘鏡頭用電腦copy & paste 個頭上去再加埋配音都得啦~ even 連佢比人謀殺時，我都完全感覺唔到佢驚囉! 反而演盈女同學果位略胖既平凡女生，演來更有真實感!

- 惠英紅唔係話演得唔好，只係佢演既德仔阿媽角色根本完全無發揮，要演得好完全零難度喎! 所以極其量只可以話演得不過不失啫~ (其實我唸根本唔需要專業演員e.g. 求其搵個師奶演德仔阿媽都應該可以......)
今屆最佳女主角其他被提名既對手係咪真係弱成咁呀?

雖然我未睇趙薇既"花木蘭"，又無打算睇舒淇既"游龍戲鳳"; 但淨係張靜初(天水圍的夜與霧) + 吳君如(歲月神偷)都好過哂"德仔阿媽"多多聲啦!

個人覺得德仔阿媽依個角色根本完全無資格問鼎最佳女主角囉!

全套戲最令人搲頭既地方 - 就係唔明點解德仔最後要返屋企扑濕佢阿媽??

仲有全戲不停無厘頭播大咋歌，聽到真係一聽見音樂響起都有少少忟!!!

咁套戲好唔好睇呢?

咁多野令人唔明既戲又點會好睇呢?? 唉......
成套戲overall  - 都唔知個導演做乜!!  睇後感只有 -

垃圾? 都幾架!!

 (差 ! 令人感覺最佳女主角真係兒嬉......)