匪夷所思~
今時今日竟然會有人投資去拍"滅門"依種超級垃圾!! 難道嫌錢腥乎??一開場見到羅守耀個名，我心裡已爆咗句F word
- 因為上星期睇咗佢執導另一套垃圾"惡胎"! 不過見有任達華喎~ 總算有一絲曙光......
不過睇完"滅門"後令我好震驚
- 無唸過"滅門"可以比"惡胎"更爛!!!! 大佬呀~ 依套"滅門"點止係low budget 呀? 直頭係NO budget!!
整套戲只可以用不知所謂來形容 - 故事不知所謂; 情節不知所謂; 情理不合不知所謂; 對白不知所謂; 配樂不知所謂......不過最不知所謂都係個導演!
剛開場地點set 喺中國大陸張兆輝被槍決一場戲，真係睇到我想暈低!
稍為有少少常識都知道槍決刑場係荒蕪黃沙爛地; 點會係個周圍大廈林立，綠草如茵既鬧市運動場架??
而且執行槍決過程既係武警，並非戲中既公安.......齋係依場戲已經令我覺得好羞家 + 丟哂香港電影既架!!
真係難為張兆輝喺咁既製作下仲交足戲......羅守耀身為導演無常識兼好明顯無做research，美國洛杉磯讀大學電影系畢業????????? 
戲中"鏟點"多到數唔哂令人真係慘不忍睹!
唯獨有感浪費咗任達華、張兆輝既演技; 與及安志杰、蔣璐霞既好身手~老公一路睇一路問我: 點解Simon (任達華)會拍依套戲架???
我點鬼知~~~~~
香港電影曾經喺歐美穩坐亞洲電影一哥之位; 時而世易，日本 + 韓國電影近十多年發展確係非常出色，屢有佳品......
不過人地既進步唔代表自己要退步架! 偏偏人地已經咁出色，香港就不停咁退步!! 香港絕對唔係無人材，更加唔係無佳作 - 只可惜佳作太少，垃圾太多!
睇過羅導演兩套大作後......以後見到佢既作品我真係不敢恭維!
就算下次有周潤發都係咁話!! 
再多幾套好似"滅門"咁既港鏟霸片，恐怕香港電影業真係要來一個"滅門".......
"滅門"英文戲名叫做"Bad Blood"; 咁羅守耀算唔算係香港電影業既bad blood 呢?
(比返少少credit 果班打得既演員~)
沒有留言:
發佈留言