最近睇咗4套香港製作 - 歲月神偷、惡胎、滅門、心魔，當中除咗"歲月神偷"之外，其餘3套全部係港剷片......
我 + 老公一向好鍾意任達華既戲!
以上果4套戲，最好既"歲月神偷" + 最剷既"滅門" - 2套都有任達華~ 我唸因為"滅門"實在太太太剷嘞!
所以見到依套"天水圍的夜與霧"又有任達華，我都唔敢再抱咁大希望......
不過事實証明咗 - 一套好戲主要因素除咗要有好既劇本 + 演技精湛既演員之外，最最緊要就係要有一位出色既導演! 
同一個演技被公認既任達華 - 拍羅守耀既"滅門"，出來結果係一套令觀眾睇到極級尷尬既剷片
width="480" height="385">
睇戲前根本唔知有套戲叫做"天水圍的夜與霧"!
之前只聽過另一套許鞍華既"天水圍的日與夜" - 但無睇過~一路睇緊"天水圍的夜與霧"，一路有種故事似曾相識既感覺~
不出我所料 - 睇完戲後上網一查，原來故事係base on 2004年一宗天水圍滅門倫常慘劇既真人真事......真係好佩服任達華!
電視報紙雜誌上睇到任接受訪問，行出來係好有台型，充滿大將之風既型男一件; 但戲裡面佢演一個社會低下層無賴無業麻甩，竟然都可以入型入格，充滿寫實生活感! 嗱~ 依d就叫做演技嘞!!
今次第二次睇張靜初既戲 (第一次係"門徒"~)，佢演剛從來地到港既師奶仔演得真係好好，放棄靚樣幾乎全戲都完全無化妝，不過佢唔化妝都好靚啊~
佢被提名最佳女主角真係實至名歸，甚至攞埋都應該受之無慚! 真係唔明點解佢會敗喺惠英紅既手上??? 
有水準既導演拍每一場戲都絕對唔會馬虎求其收貨，而且會選最適合既演員來演戲中每一個角色!
"天水圍的夜與霧"裡面除咗任達華 + 張靜初2個中心主角，戲中一大班唔出名既師奶extra 演員，另特別一提演任達華既馬夫兒子果位男演員(sorry
唔知佢叫咩名!)，全部都演來非常自然 + 有生活感，觀眾睇來完全唔會有突兀感覺! 除咗歸功一班優秀演員，導演許鞍華亦應記一功! 
我唔算係許鞍華fan~ 不過我就好鍾意佢既"女人四十"!
輕鬆寫實得來溫馨感人~睇完"天水圍的夜與霧"我發現咗一件好荒謬既事 - 原來星期日 + 公眾假期係無社工當值既!
當然每個有工作既人都有權放假! 但無論咩大假期都好，總會有警察、醫生、消防員...等等當值，just in case 有突發事情發生要處理~
大部份倫常慘案都係突發性既，引發慘案既導火線隨時都有可能發生，唔會因為假期而暫停休息，假期過後先再來過......
假期無社工當值 - 個案當事人有突發事件需要求助，可以搵邊個? 真係荒謬到不得了!! 匪夷所思......
Overall "天水圍的夜與霧"製作認真，演員出色投入角色，一套非常有誠意非常出色既港產電影!
不過因為以真實倫常慘案作為題材，內容寫實得來會令觀眾不安!特別想提提片尾credit，用一幅幅小朋友描繪家庭暴力既粉彩畫，加插凶案零碎片段定格，簡單畫面效果震撼~
V評分:
我都係鐘意歲月神偷 !
回覆刪除岩岩星期日都睇左有任達華既撕票風雲.......演過哂氣不過因查案又掂返既police.....不過故事就..........
[版主回覆07/23/2010 07:26:00]其實"天水圍的夜與霧"同"歲月神偷"係好唔同既片種~ 不過任達華既表演同樣有水準，分唔出高下.......
不過佢好怪 - 好既劇本又接，爛到好似"滅門"既垃圾佢又接......
妳講得啱呀，有演技，無好劇本都係徒然 依套戲都係其中一套我想睇既港產片，另一套就係歲月神偷
回覆刪除[版主回覆07/23/2010 07:22:00]依2套都好好值得睇! 2套都好唔同風格，但2套都係少有既港產佳作!
不過"滅門"就千其唔好睇嘞!
“ 天水圍的夜與霧 ” , 依套聽閒是無錢拍出來的超低成本電影 ( 但是否好戲好多時未必同完成本掛鉤 ) 我都未睇 , 聽閒好正 , 現又有 Mrs.T 比 5 粒星 , 我都抓日返學校借黎睇下先....
回覆刪除[版主回覆07/23/2010 07:20:00]依套我就唔知! (任達華應該平極有限喎! ) 不過我知道"天水圍的日與夜"就係低成本 + 2星期就拍起全套戲~
我覺得許鞍華真係香港一個不可多得既好導演!
我好似喺第四台睇過下"天水圍的日與夜"但唔記得係咪...女人四十就有睇,許鞍華其實真係好有才華既女導演,at least睇佢既戲係會值回票價果隻囉...
回覆刪除我到而家都未睇"歲"片,都唔知點解依邊dvd shop冇出,但係一d垃圾片又出哂喎,搲哂頭
[版主回覆07/23/2010 20:10:00]"天水圍的日與夜"我反而未睇過，不過而家我好有興趣!
可唔可以上網order 呀?
其實香港仲有好多好既電影人,只係有時真係冇得比佢地發揮..(因為個個都要睇票房做人...唔係部部戲都有人投資!)
回覆刪除不過好彩有人真係為鐘意而拍,如果唔係香港會多好多爛片....- -"
歲月神偷我睇咗3次，真係好好睇
回覆刪除[版主回覆07/23/2010 20:06:00]"歲月神偷"係一套難得既好戲!
呢個系列我都未睇過呀
回覆刪除不過我都知道攞獎 ^^
k
[版主回覆07/23/2010 20:05:00]依套有提名，但唔知有無得獎~
不過而家得獎既戲都唔一定係係野......
任達華真係做咩角色都好神似,睇完歲月神偷更加鍾意佢
回覆刪除[版主回覆07/24/2010 05:56:00]咁果套"滅門"呢?
任達華是香港 Tom Hanks!
回覆刪除仲有呀..., 我成日撞倒佢, 每次見佢都好有禮貌, 會同任何人 Say Hello, 同幫人推門!
[版主回覆07/24/2010 05:58:00]平時睇佢做訪問都覺得佢好可親平易近人! 真係有大將風範~ 佢老婆琦琦又好靚，大方高貴，金童玉女!
我住天水圍10幾年la ... 不過依一系列都無睇過!!hahahaaa,,, 唉~ 天水圍比人o既感覺真係好鬼負面~ 太多新移民集中晒係度啦...衍生o左好多問題出o黎!! ... 無奈
回覆刪除[版主回覆07/24/2010 05:56:00]我以前未去過天水圍時，成日聽新聞都有跳樓、倫常慘案，初時仲以為果度生活環境好差..... 後來因為有同學住喺天水圍，有機會到同學屋企~ 我發現原來天水圍生活環境一d都唔差架!
唔睇好過睇
回覆刪除[版主回覆07/25/2010 04:16:00]我都係咁話!
我呢邊的醫生成日罷工抗議﹐其實我都覺得佢地不如轉行算喇。 因為做醫生係得咁多架嘖﹐做明星都一樣﹐永遠唔會發大達~ 如果有人唔救去罷工﹐真係唔好做醫生喇~
回覆刪除[版主回覆07/25/2010 04:14:00]咁咪同依邊Royal Mail, 巴士, 火車, BA....差唔多囉! 依度乜鬼都成日罷工架......
係ga!!如果無o左o個d新聞 , 小d新移民...tsw真係幾舒服!! 空氣又好d , 又唔洗樓對樓... 不過係搭車車$貴d lor!!haha*
回覆刪除[版主回覆07/25/2010 04:09:00]咁天水圍又確係遠咗dd~ 我唸除咗車費貴之外，搭車時間都好time consuming! 中學果時喺九龍塘返學，我個天水圍同學成日都遲到架!!
我妹妹睇左心情好沉重, 我一向好怕睇特別渲染暴力的悲劇, 所以呢套更加唔會睇!
回覆刪除張靜初演悲劇人物特別入木三分呢! 看過"門徒", 不錯呢!
http://hk.myblog.yahoo.com/wonka-1971/article?mid=566
[版主回覆07/26/2010 20:22:00]特登作個故事出來，又或者刻意加大咋血 + 甩手甩腳 - 依d先至叫做"渲染暴力"!
依套戲係改編真人真事，而且好多畫面許鞍華都處理得好好，並唔需要血腥鏡頭都可令觀眾意會; 而且戲主旨係道出天水圍一個存在已久既社會問題 - 依d唔叫做渲染暴力!
我上面都提過我睇過"門徒"，我都覺得張靜初演得好~
天水圍的夜與霧 5 粒星 天水圍的日與夜 一 5 粒星,super boring
回覆刪除[版主回覆07/26/2010 20:14:00]我知兩套天水圍故事性質好唔同，不過無唸過質素會相差咁遠喎! 令我更加好奇想睇~~~~
天水圍的日與夜=心魔 Same level 睇完成套戲 my face----> +
回覆刪除[版主回覆07/26/2010 20:12:00]咁大鑊?????? 鮑起靜攞咗最佳女主角喎......唔通而家所有最佳女主角都無好野!?!?!???
我剛剛睇左夜與霧了 …. 睇到個心有 D 驚 …. 因為感覺好真實 , 事實我們的社區隔無耐就會有令人難過的事發生 , ( 剛又出一單仔殺母 , 妹 )…. 透過這套片亦教人對唔同層面的朋友需要 , 困難有更多理解 , 官僚的行事模式 …. 小市民都受慣了 … 所以一向都無太大感覺 ,( 亦可以說無期望 , 自求多福好過 ) , 這份無助感亦教人心寒 …… 但這個不是什麼劇作家的創作故事 , 因而是我們生活社區的實況 ……. 點可以個心唔驚驚地 ….. 寒寒地呢
回覆刪除[版主回覆07/26/2010 20:06:00]人既情緒同天氣一樣 - 同樣咁難預測下一秒會有咩事發生........乖乖仔無啦啦都會斬死媽媽 + 妹......