老公聽返來既靈異事2則

我 + 老公都好鍾意睇鬼片 + 對靈異事好有興趣~  我地知道英國有好多古老酒店or B&B，以"有鬼魂作崇"來做賣點!  我成日都話想同老公試吓去住......

早幾日食飯時睇Sky 一個靈異節目 - 一大班人 + 2個所謂靈媒，去英國唔知邊度一間出名有鬼既古堡式酒店過夜，幾個人一間房 + 完全冇開燈，節目係用紅外線夜視功能既攝影機拍攝，形式係紀錄片 - 即係佢地話全部係真人真事! (佢地話咋~~~~ )

電視熒幕上所見，係一大班人伸手不見五指既房間度，經常失驚無神地大叫 - 佢地話感覺到突然有人摸佢地喎~~~~~ 我睇到好忟!!!!  忍唔住厭惡地"啫"咗一聲......

 老公: 妳唔信係真呀?

 我: 唔信喎! 我覺得佢地全部做緊戲 + 演技好差!!!!

 老公: 妳唔信...咁妳又成日話想去住吓鬼酒店?

 我: 我唔係唔信有鬼，只係唔信依個節目係真! 大佬呀~ 咁多人一間房，陽氣咁盛! 仲要大大部攝影機影住......我係鬼都唔出來啦!!!!!

 老公: 咁又係.....

不過老公一個下屬既老公(下稱B)，就有一個鬼酒店既經歷......


B 經常要出business trip~ 有一次B 出trip 入住南下一間舊式酒店既單人房(老公唔記得南下邊度)，B 發現工人執房執得好密!

e.g. 無論佢去浴室沖涼or 大小二便，出來都會發現先前喺房亂咁放既衫褲鞋襪，一一摺好放喺梳化上; 床鋪執拾好; 拖鞋亦會整齊地放喺同一位置!!!!

初時B 不以為然，心想: 細酒店可能冇咁嚴格規定幾時執房~~~ 直至B 瞓到半夜起身小解後，出來見到床又執好咗 + 拖鞋又係放喺同一位置!!!! 於是天光後，B 就去問酒店職員......

原來依間酒店歷史悠久，喺酒店裡面工作既人全部都知道 - 酒店好耐之前曾經有一個好盡責 + 好鍾意乾淨整齊既執房女傭! 女傭死後鬼魂一直留喺酒店裡面"照常工作"!!!!

不過"鬼女傭"只會幫單身男士客人，喺客人睇唔到既時候執房! 若果客人係女士，或者房間裡面多過一個人的話，鬼女傭都唔會出手; 而鬼女傭亦冇話指定會喺邊間房出現......所以只要係單身男士客人入住依間酒店，佢隨時都有可能為你服務!!!!

>>>>>>>>>>>>>>>>>>>>>>>>>>>>>>>>>>>>>>>>>>>>>>

老公另一個下屬Janet，聖誕期間同佢老公Stuart + 爸爸一會去Florida 旅行2星期，所以我 + 老公幫佢睇住狗仔Bonnie.....

老公話我知，自從Janet 媽媽舊年年頭去世，Janet 就開始變到好迷信 + 沉迷占卜靈異既事~ 最大鑊既係 - Janet 話自己經常見到佢媽媽既鬼魂!!!!

 又話自己有預知既特異功能...而且"感應"越來越強......

Janet 旅行完畢返來同我老公講，佢地喺Florida 期間，旅程最後3日Janet 既手機突然完全收唔到

，不過Stuart + 佢爸爸既手機接收就完全正常! Janet 話佢一見到手機接收唔到，佢就有好強烈既感應 - 有唔好既事發生咗!!! 不過佢唔知係乜......

Janet 當時都有同Stuart 講話佢感應到唔好既事，不過Stuart 叫佢"shut up"!!!

到佢地返到來英國，落機後Janet 即開手機 (今次收到嘞!)，第一時間收到佢好朋友既留言，好朋友既爸爸去世~ 時間剛好係3日前 - 即Janet 電話收唔到果日!

Janet 既解話係 - 個天唔想依個壞消息破壞咗佢愉快既family holiday，所以"神奇力量"令佢手機收唔到依個壞消息~~~

於是Janet 得戚地再同Stuart 講: I told you so! I know something bad has happened!!! (譯: 我都話架啦! 我知有唔好野發生咗!!!)

不過Stuart 都係果句: Oh! Shut up~~~~~