Dobbies Garden Centre (2009年5月10日)

星期六大風大雨; 星期日一起身見天放晴，心情即時超靚靚~~~~

之前老公買返盆新既rosemary 比我，不過新依盆大過舊果盆好多，所以舊既白色花盆唔啱size......

 於是星期日就去咗Dobbies Garden Centre 買返個新花盆! 順便睇吓我仲想買咩香草~

香港有花墟; 而英國就有Dobbies~ 型型式式既鮮花、盆栽、種子、蔬菜、香草、甚至果樹，都可以喺Dobbies 搵到!

 不過Dobbies 實在太大嘞，如果慢慢行哂的話，我唸會悶死老公!

 所以我去親Dobbies 都只集中睇香草果part~~~

 幾乎講得出既香草都有得賣，連薄荷葉都有好鬼多唔同種! 而且價錢只係幾英鎊一盆，搞到貪心既我花多眼亂......

 老公話佢果日買rosemary 比我既時候，爭d攞錯另一盆外表激似rosemary，但並唔係rosemary 既香草~ 就係依盆嘞! 個樣真係同rosemary 非常相似......

 不過依盆其實係Curry Plant - 咖喱葉~ 搣吓塊葉真係有咖喱味架!!!!

 連粟米盆栽都有! 我從來都唔知原來粟米可以種喺盆既~ 不過張指引話可以......( 係真唔係呀??)

 除咗粟米，原來連薯仔都可以係一盆盆既!

 仲好鬼平! £4.99就可以帶佢返屋企~ 不過就算起哂成盆薯仔，都唔知夠唔夠我食一餐......

 哈哈~~~~ 咩野叫做"Papatoes"???

 佢地好似乜野都可以種喺盆!!! 連矮瓜都話得......

 Dobbies 仲有室外部份，不過實在太大嘞! 所以求其行咗個圈就算......估唔到咁早都會見到聖誕植物喎!

雖然Dobbies 係Garden Centre，不過裡面仲有好多9唔搭8無厘頭既店e.g. 香水肥皂既浴室用品、茶具、相架飾物......

仲有pet shop + farmfood Hall!

 屋企一路都養緊2條金魚 - Sushi & Sashimi~ 不過最近Sashimi 死咗，所以買返條新既Sashimi 返去......(已經唔知係第幾代......次次都係叫Sushi / Sashimi! )

Farmfood Hall 有好多普通超市冇得賣既食品......

 先來個估中冇獎競猜遊戲 - 大家估吓我攞住依碌係咩東東? (同食有關; 而我攞住既手勢已比咗大家好大貼士! 答案喺本篇頁尾~~~ )

我喺Farmfood Hall 買咗既食物......

- 右上係用蘇格蘭之寶 - "哈吉斯"煮成既罐頭湯~ 哈吉斯(Haggis) 係一種用羊肉 + 羊內臟搞碎後，混入香料再放入羊胃內蒸煮而成既蘇格蘭傳統食物! (如果想知多d關於哈吉斯既資料，可以睇返二人世界steak pie 最後部份~)

- 左下依罐死人罐頭帶子好鬼貴!

 只係罐頭魚柳咁大盒竟然要£5!!!! 貨架上冇價錢，我比錢時先知咁鬼貴.......(最好醒醒定定要好食呀!!!!!)

- 右下純味法國牛油餅乾~ 之前去巴黎買過一種類似既餅乾，非常好食!!!

 罐頭火雞湯~ 唸吓都唔覺得會好味......所以冇買到!

 個人覺得佢地既雪藏食物好核突......因為無論生熟食物都全部冇包裝!!!! 就咁雪~~

 我知道係為咗"要幾多就買幾多".......不過就咁放入雪櫃，我真係覺得唔多衛生喎! 我點知你地個雪櫃乾唔乾淨?????

雖然Dobbies 好多唔同香草~ 不過就係因為太多令我一時間決定唔到買邊種，所以我咩草都冇買到! 等我慢慢唸吓先......

 今次喺Dobbies 除咗買咗些少口痕食物 + 金魚之外，我仲買到我心目中既花盆!

 我影緊相時，突然覺得盆rosemary 好似咁既樣!!!

估中冇獎遊戲答案......

 棒球棍形胡椒磨~ (真係用來做武器都得呀!!!)