2010年8月15日星期日

超A貨 (2010年8月15日)

今日同朋友們喺昆仲軒飲茶......

 今日天氣好好,有成29C啊!!!

唔知係咪天氣太熱呢? 今日6個大人,3個小朋友,只叫咗十幾碟點心左右,另加一碟三燒飯 + 一兜雲吞河粉,竟然食唔哂!! 而且覺得食物水準麻麻.......(連相都唔想影!)

我唸我 + 老公喺朋友們心目中好大食! 臨出門口時老公突然人有三急,搞到我地遲到......

朋友來電追蹤時,竟然同我講: 喂~ 你地唔係唔記得咗今日飲茶吓哇? 我點咗好多野食呀! 你地唔來既話搞唔掂架!!

飲完茶過隔離泗和行買餸......

 比我發現咗依盒野!


 早排網友Mami 阿四從香港寄來一盒Tiramisu Cream Cake 過我 (網誌),好味到我一口氣食鬼哂!

令我一直念念不忘~~~~

我買依盒同阿四送我既一樣 - 裡面係獨立包裝~

不過阿四送我既係日本貨;


 而我依盒係韓國貨!


 獨立包裝亦有所不同~

不過味道呢......我覺得係一模一樣咁好食!  連老公都話味道一樣~


 韓國貨一盒有12件,不過已經比我剷除咗一半!

本來只係唸住買來試吓,無唸過味道竟然一模一樣! 直頭係超A翻版貨呀!!

阿四~ 唔洗再接濟我嘞! 哈哈~~~~~
140698388_c.gif image by veronica_tsim




>>>>>>>>>>>>>>>>>>>>>>>>>>>>>>>>>>>>>>>>>

今日喺泗和行既停車場泊車時......


 見到隔離棵樹生咗大舊黃色怪菇!





 真係好鬼大舊!!!!


 不過我覺得依舊野好核突......

唔知依舊野有無毒既呢?  唔知食唔食得既呢??





13 則留言:

  1. D色咁靚个菇...一定有毒
    [版主回覆08/16/2010 18:41:00]我覺得依舊菇好核突呀! 睇到實物都毛管棟~~~~
     
     

    回覆刪除
  2. 真係好核突!千"其"唔好掂和食 ,我都覺得它有毒.
    [版主回覆08/16/2010 18:40:00]係呀~ 我尋日一路影相一路話核突,老公話: 咁妳仲影咁多張來嚇自己?
     
    放心~ 我唔會掂亦唔會食,我只係好奇啫! 不知名既野我唔會咁傻隨便放入口既~
     
     

    回覆刪除
  3. 我估有毒喇 ...... 因為d color咁靚
    [版主回覆08/16/2010 18:38:00]靚??????? 我覺得舊菇好核突.......
     
     

    回覆刪除
  4. 我都估佢有毒
    我記得有人講過,如果棵樹木生D菇菌類既野出黎,表示樹木開始壞死,要小心唔好咁接近佢呀!
    [版主回覆08/16/2010 18:38:00]係呀? 多謝指教!  哇~ 舊菇咁鬼大舊,咁棵樹咪好病囉.......咁如果整走舊菇,棵樹仲有無得救呀?
     
    我尋日想用個頭"烘"近d聞吓舊菇有無味道,不過老公拉鬼住我!
     
     

    回覆刪除
  5. Gaileは林家歐巴桑2010年8月16日 上午3:15

    唔知依邊搵唔搵到(正/A貨)見妳話到咁好食,我即刻想試試
    佢個樣有d似靚版靈芝...不過咁鮮色一定有毒
    [版主回覆08/16/2010 18:35:00]依隻cake 台灣入唔入得口呀? 得既話我下星期去泗和行買盒比妳! (好彩我唸住今晚先pack 野聽日寄啫!!!)
     
    吓.......妳覺得舊菇靚呀?? 我覺得佢不知幾核突!!!
     
     

    回覆刪除
  6. 我都要在香港超市搵下這個 Tiramisu Cream Cake 先...
    [版主回覆08/16/2010 18:27:00]阿四話我知依隻cake 喺百佳買架! 不過佢話多數得朱古力 + 士多啤梨味,Tiramisu 味比較少~
     
    我而家搵到依隻韓國代替品真係超正!!!!!
     
     

    回覆刪除
  7. Gaileは林家歐巴桑2010年8月16日 上午6:43

    多謝先...唔駛寄比我啦,我諗依邊就算冇入貨都應該有類似既
    我唔係話隻菇靚,係隻色比靈芝靚姐
    [版主回覆08/17/2010 02:08:00]咁妳快d去搵吓啦! 真係好正好好食架!!!!
     
    睇睇吓舊菇顏色又係幾靚既~ 不過成舊咁睇真係好核突!!!
     
     

    回覆刪除
  8. 接咩濟喎,正衰鬼黎架  韓國啲蛋糕仔都唔錯架,搵到依隻,以後幾時想食都有得食啦,妳下次要買定幾盒存倉先得啦 
    [版主回覆08/17/2010 02:06:00]真係講妳都唔信呀 - 真係一模一樣味道架!
     
    死啦~ 剩返4隻唔敢食添! 因為要等到weekend 先會再去泗和行!!!
     
     

    回覆刪除
  9. 舊菇嘅顏色好鮮豔,但個形狀就好…… 咦!好似妳話,核突!
    [版主回覆08/17/2010 02:05:00]睇睇吓舊菇顏色又真係幾靚喎! 不過成舊野真係好核突......
     
     

    回覆刪除
  10. It's colorful, i think it's poison.
    [版主回覆08/18/2010 05:32:00]no it's NOT poisonous! ive checked it - it is called Laetiporus Sulphureus~ it is edible when it's young!  but of course i wont eat it! dont worry~
     
     

    回覆刪除
  11. 妳千其唔好亂黎呀
    [版主回覆08/18/2010 05:29:00]哈哈~~~~ 我緊係唔會亂來啦! 放心~~~~
     
     

    回覆刪除
  12. 黃色菇你真係好恐怖呀~~~~~唔好掂佢呀,可能有毒架!!
    [版主回覆08/18/2010 05:29:00]我無掂佢~ 不過我上網查過嘞 - 依舊野係食得 + 有無毒架!
     
     

    回覆刪除
  13. 你老公好緊張呀?突然咁急~ 不過係屋企急好過係出面~ 我行山都見到好多怪菰﹐不過一定唔會食既~
    [版主回覆08/18/2010 05:28:00]係呀~ 開大呀.......佢唔係第一次架嘞! 次次都臨出街先來料......
     
    哈哈~~~ 我都無話過要食! 我估吓食唔食得之嘛!!
     
     

    回覆刪除

Related Posts Plugin for WordPress, Blogger...