2010年8月27日星期五

Mother (骨肉同謀) - 2010年8月22日

上星期日(8月22日)特登去愛丁堡睇一套喺英國非常冷門,而且未有正式排期上映,只有極少數另類戲院播放既韓國電影 - Mother (骨肉同謀)!

知道"Mother"舊年年尾喺香港上畫後,一直好想睇!  可惜英國遲遲未上映,本來打算遲d返香港先買DVD啦......

咁啱得咁橋星期六老公上網check 緊戲院"Piranha 3D"時間時,無意中發現愛丁堡Cameo 上緊"Mother"喎!

其實戲舊年10月London Film Festival 期間上映過~ 可惜顧明思義 - 只限倫敦! 終於等到蘇格蘭上畫,但又只得愛丁堡Cameo,而且只上映一個星期~

話時話 - Cameo 絕對係我有生以來去過最殘又最屎 ,電影銀幕最細既戲院! 咋到呢......我屋企部50吋一定正過佢!! 


_342.gif image by veronica_tsim 講返套戲......

我肯屈就Cameo 並唔係為咗捧元斌場喎! 
_2178.gif image by veronica_tsim 雖然"藍色生死戀"時期我曾經覺得佢索到七孔流血......不過其實我係去捧我最喜歡既韓國導演奉俊昊既場!!

奉俊昊並不多產,而且作品主題差異好大 - 至今5套作品,搞笑、犯罪、劇情、Sci-fi 都有齊,並唔只專注拍同一類電影!

不過齋係一套"Memories of Murder"(殺人回憶),已經令我完完全全愛上咗佢! "Memories of Murder"只係奉第二套執導既作品,但個人覺得佢功力之深,至今無人能及!!

"Mother"故事講述單身媽媽同兒子二人相依為命,媽媽視弱智既兒子為命根,事事為兒子費心。一日一個妙齡少女離奇被殺,矛頭直指弱智兒子! 媽媽深信兒子清白,為咗替兒子洗脫罪名,不惜挺而走險用盡所有騎呢方法去搵出真相......


今次"Mother"最吸引我既並唔係奉俊昊,亦唔係索男元斌~ 而係飾演媽媽既阿嬸金惠子! 真係令人感受到果種為咗救個仔,做媽媽既就乜都夠膽死!  無論對與錯都好,完全甘心命抵無怨無悔無條件付出,只求個仔無事!

戲後我同老公討論過依點 - 我 + 老公都認為若果換轉係我或老公(睬~),V媽媽 + 99知道真相後都一定會大義滅親......_2006.gif image by veronica_tsim

成套戲幾乎只得金惠子一個撐起! 我一向覺得個人表演既戲好難拍得唔悶又好睇,不過"Mother"絕對做得到,依點要歸功於金惠子 + 奉俊昊~

雖然元斌係戲既男主角,但其實佢既戲份唔算多,而且表現亦未算突出~ 不過我唸其實係因為佢既角色無乜發揮!  但佢靚仔成咁都肯出來扮傻仔放棄靚仔樣,我一向最欣賞依種演員 - 依d就叫專業嘞!! 29_3_16.gif image by veronica_tsim

"Mother"係有水準既! 雖然"Mother" + "Memories of Murder"兩套戲既重點唔一樣,但我個人好難唔攞來比較~

我,個人仍然比較鍾意"Memories of Murder"!

當我睇緊"Mother"既時候,感覺似曾相識~ 成套戲由一開場金惠子獨自一個人喺草原跳舞,感覺非常"未上神枱前"既朴贊郁!  e.g. Sympathy for Mr Vengeance (復仇)......

我都鍾意未上神枱前既朴贊郁!

但朴由最高峰時令我驚為天人
_542.gif image by veronica_tsim
 既Old Boy (原罪犯);

到之後令我"吓?????"
_1282.gif image by veronica_tsim
 既Sympathy for Lady Vengeance (親切的金子);

再到後來令我
_1369.gif image by veronica_tsim
 既Thirst(饑渴誘罪)......我而家已經對佢無哂興趣!

奉俊昊至今仍然係我心水10/10~   個人唔希望佢會步朴既後塵!!

我,始終都係最鍾意"完全奉俊昊"既"Memories of Murder"!

 (稍嫌太朴贊郁,唔夠奉俊昊!)




9 則留言:

  1. 今次我終於第一啦
    [版主回覆08/28/2010 05:23:00]恭喜妳! 可惜無獎品........
     
     

    回覆刪除
  2. 唔知妳會唔會好似套戲咁, 做過[老婆同謀], 為老公乜都夠膽死.........
    [版主回覆08/28/2010 05:22:00]依點要視乎佢衰乜嘞!
     
     

    回覆刪除
  3. 'mother"我係買咗DVD,故事內容吸引,不過仲未睇,等老公陪我睇,打打殺殺的戲我有D驚,睇完通常會發惡夢。
    [版主回覆08/29/2010 01:34:00]依套係劇情片,唔係打打殺殺戲,妳睇完應該唔會發惡夢!
     
     

    回覆刪除
  4. 'mother"我係買咗DVD,故事內容吸引,不過仲未睇,等老公陪我睇,打打殺殺的戲我有D驚,睇完通常會發惡夢。

    回覆刪除
  5. 我都睇咗呢套呀, 故事平平淡淡, 但最尾結局都令我有驚喜. 反而你話好驚嗰套陰容院在, 唔知係咪我期望過過, 反而唔係好驚, 有三個場口仲幾好笑呀!
    PS.可唔可以ADD我呀, 打驗證碼好煩呀.PLEASE & THANKS
    [版主回覆08/29/2010 03:04:00]Mother 在我來講,無我期望中咁好! 可能我當初覺得會有"殺人回憶"咁既水準~
     
    咁每個人睇同一套戲都可能會有唔同感受既~ 好似人人讚到天上有地下無既"Avatar",對我來講垃圾都不如!! 又有人話周秀娜果套港剷垃圾"惡胎"好恐怖.......  各花入各眼啫! 我自己就真係覺得"陰容院在"好好好驚嘞!
     
    add 咗妳嘞! Thank you~
     
     

    回覆刪除
  6. 呢套戲我有排冇得睇喇~
    [版主回覆08/30/2010 02:47:00]香港已經出咗DVD,如果妳11月返香港既話,咪可以買來睇囉~
     
     

    回覆刪除
  7. "V媽媽 + 99知道真相後都一定會大義滅親......"
     V媽媽, 貢o鍚你, 會咩?
     
    [版主回覆08/31/2010 22:45:00]佢會架! 佢係鍚我,但佢係一個黑白 + 愛恨分明既媽媽,佢一定唔會盲目包庇我......
     
     

    回覆刪除
  8. "V媽媽 + 99知道真相後都一定會大義滅親......"
     V媽媽, 貢o鍚你, 會咩?
     

    回覆刪除
  9. 我好少睇韓片/韓劇,不過我認得金惠子,前排亞視播佢套“媽媽發爛渣”,播足100集,我媽咪就追足100集,每晚過黎我度食完飯,就返去自己嗰邊追劇 (因為我地睇無線) 
    [版主回覆08/31/2010 22:44:00]竟然有100集咁堅長既韓劇??   金惠子幾好戲啊~
     
    我好鍾意部份韓戲,尤其係犯罪果類thriller,韓戲處理氣氛好有一手! 但講到韓劇就唔好搞我,好鬼多都係情情塔塔,又婆婆媽媽 (仲婆媽過我呢! ) 不過我返親香港,V媽媽都會逼我睇......
     
     

    回覆刪除

Related Posts Plugin for WordPress, Blogger...