童年茶點之回憶

係呀~ 我依度買到山楂餅架!

 仲要係原裝正版大陸製造，口味最正宗果隻喎!

細個時我成日買來食架~~~~

 包裝幾十年如一日咁求其......

 拆開裡面味道同樣幾十年如一日咁原始!

我記得細個時V媽媽曾經買過另一隻包裝精美，香港製造既山楂餅比我食，不過我覺得完全唔好食!!

由細到大，由始至終，我都只鍾意依隻包裝一d都唔精美 (從未精美過! )，廉價兼庶民口味既山楂餅!!



我細個時好憎幼稚園供應既茶點! 尤其係香蕉糕!!

試過有次老師派緊香蕉糕做茶點，

我心裡開始盤算一陣"扮哂"唔小心跌咗條香蕉糕落地，唸住咁就天衣無縫可以避過一食......

頂~ 點知老師知道後竟然比過另一條我喎!!

不過到咗weekend 唔洗返學時既茶點我就好鍾意嘞 - 因為多數係街邊檔豬腸粉、一串串既鹵豬雜牛雜之類! 嘻嘻~~~~

至於比較"正常"，而且到咗而家我仍然好鍾意既童年茶點就係......

 奶油包是也!

細個時屋企隔離係麵包店，每日晏晝麵包準時出爐，聞到麵包香就攞2蚊去買包新鮮出爐方包~

屋企幾乎長期都有煉奶，方包搽煉奶後對摺; 另"不"2匙羹煉奶沖滾水...就咁食甜方包 + 飲甜既熱牛奶當下午茶!

小時候無咁講究，而家人大咗就"了"口咗 - 方包要去皮; 搽煉奶前又特登叮溶牛油，搽一層牛油後再搽煉奶~~~~~

 要搽好多好多煉奶!!



麻花一向非我所愛!

不過細個時食過，總算有d感情~ 見依度都有得賣 (台灣出品)，就買包來回味吓......

 不過依包野真係好唔掂!

唔係應該脆既咩?????

 已經咁鬼粗，仲硬到咬崩牙.......唔好食!



>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

Weekend 時喺Tesco World Food Section 見到依枝Vamino 豆奶，有幾位網友都話好飲~

抵鍚既老公知道我想試吓枝豆奶，尋日(8月12日)放工時特登兜去果間Tesco 買咗2枝比我!

 加多包卡樂B蝦條~

啱啱飲咗1枝 - 剛入口時有少少太甜，不過飲落後又真係幾好飲，好香濃豆味仲好滑!