Far East 抬頭了! (2010年8月7日)

由我第一日踏足蘇格蘭至今已有十幾年，我一直不停喺度呻 - 英國無啖好食!

初來報到曾經喺Asda 見過有出前一丁麻油味出售，不過價錢驚人!  咁鬼貴搞到我咁恨食都唔捨得買，更莫講話洋人啦

......後來出前一丁當然喺Asda 消聲匿跡!

好彩當時Glasgow 都已經有幾間中型小型中式超市，雖然貨品選擇超少供應又唔穩定，但總好過乜都無，點都叫做有途徑可以買到香港食品一解鄉愁!

時至今日Glasgow 開咗間好鬼大既中式超市泗和行，貨品種類多咗好多! 競爭下連帶其他早已存在既中式超市入貨都比以前多元化! 除咗香港 + 中國食品，日本、韓國、台灣、泰國、新加坡、馬來西亞、越南......，雖然同香港相比仍然係差好多皮，但選擇越來越多，比我初來英時改善咗好多好多!

 依個唔係中式超市既貨架;

 依咋即食麵亦都唔係中式超市買既!



早幾年前所有比較大間既Tesco (英國主要大超市之一) - Tesco Extra 24 hrs 都開設咗World Food Section! 不過所謂"world food"，大部份都係來自印度、波蘭、西班牙 + 其他歐洲各國生產既食品......

後來有朋友話我知 - Tesco Extra World Food Section 有卡樂B蝦條賣!

不過我屋企附近果間Tesco Extra 24 hrs 無喎!  朋友再告知原來係另一間Tesco Extra 分店買既! 咁即係話 - 唔係間間Tesco 既World Food Section 買既貨都一樣!



我屋企附近既Tesco Extra，除咗調味料section 有李X記蠔油 + 雙璜生抽之外，World Food Section 賣既一律係印度 + 歐洲各國生產既食品~

早幾日老公放工時，無意中發現離我地屋企遠些少既另一間Tesco Extra 分店，World Food Section 比我地平時去開果間大好多好多!!

而且仲有好多我從來無唸過會有既亞洲食品......

 傳說中既卡樂B蝦條出現咗嘞!

另外中有大白兔奶糖 + 嘉頓威化餅喎~

 無唸過會喺洋人超市見到香港品牌"超力"!

 更加無唸過竟然會有"良友牌羅漢齋"!! (洋人會買羅漢齋來食咩!!?!??? )

隔離仲有泰國入口既樽裝辣油香筍~

 左上唔知邊度出既豆奶; 中國出品既樽裝檸茶、綠茶 + 茉莉花茶包~

 樂天熊仔餅

 各種口味既媽媽麵~

 日式咖喱磚

 連泰國是拉差辣椒醬都有得賣!!



講種類當然仍然比唔上中式超市選擇多! 不過Tesco World Food Section 從東南亞各地入口各種食品，最起碼洋人超市唔再只售由洋人公司"扮哂正宗口味"咁製造出來亞洲食品，令我地一眾身在外國既亞洲人，更容易 + 更方便食到家鄉正宗口味!

亞洲食品正正式式打入洋人市場，絕對係一個非常好既開始!

洋人超市賣亞洲食品，貴少少係預咗架嘞! 不過唔洗下下要去中式超市，真係非正方便咗好多!!

但係卡樂B蝦條......Tesco 竟然賣得平過中式超市喎!!!