盡量環保

上次我嘗試過用純梘片 + 新鮮迷迭香自製環保洗潔精，效果不俗!


之後我就先剷除屋企原本買定既洗潔精存貨，然後就一直用法國薰衣草乾來自製既薰衣草洗潔精~

上次已經略略講過吓純梘片既好處......

(1) 可以減低對環境既損害;

(2) 耐用 - 圍起皮上來比環保洗潔精 + 一般洗潔精化算;

(3) 用途廣泛 - 我除咗用純梘片來自製洗潔精之外，仲可以用來洗一d需要手洗既衣物;

(4) 唔會有我最怕既洗潔精人造香味 - 依點對我來講好緊要!!

 上次喺Tesco 買既依隻Granny's 純梘片已用得七七八八......

當我再去Tesco 入貨時，發現佢地已唔再賣依隻Granny's 梘片!!

上網查吓邊度仲可以買得到依隻梘片，發現所有超市都無得賣! 唯一途徑只可網上訂貨......

唔通我又要再次用返假味洗潔精???

好彩......

 早幾日喺Boots 比我發現佢地自家有出品梘片!

經過Tesco 買完一次就無既教訓，我今次一口氣掃哂貨架上4大盒!  (£1.65 each)



後來有一日自製既薰衣草洗潔精用哂，我又趕住要洗碗，唯有直接用梘片來洗碗，我發現直接用梘片開熱水來洗碗效果更好!

 只要小半湯匙，就可以開到一大盆泡沫豐富既洗碗水，足夠洗一大堆碗碟鑊煲~

而且洗碗時唔會有任何刺鼻味道，乾淨既碗碟上又唔會殘留怪味~

 所以而家大樽梘片放喺sink 盆隔離用來洗碗!

不過 - 我屋企仍然存放一枝普通洗潔精以備不時之需~  因為住喺英國多年，已經習慣哂店舖賣開一件貨，突然唔再有得賣!

依一日隨時都會來臨，到時我就要再用返洗潔精來洗碗......



>>>>>>>>>>>>>>>>>>>>>>>>>>>>>>>>>>>>>>>>>>>>>>

上星期浴室電花灑壞咗!

我地平時用開既電器人又去咗旅行......  

 老公為免我大頭蝦一時忘記，特登畫咗張嚇鬼告示夾咗喺開關提醒我!

(放心~  唔係真係漏電! )

暫時唯有每晚都浸浴......


雖然我一向都好享受用唔同香味浴鹽浸浴，不過最近晚上天氣太翳焗，一滴風都無，浸浴後乾乾淨淨但齋坐喺度唔郁都會出返一身汗!

我最近先發現 - 原來浸浴唔環保!

因為用水量 + 消耗能量都比淋浴多......

仲有就係我 + 老公輪住浸浴，不過boiler 容量唔夠2個人! 永遠我沖完涼後，老公要等一排boiler 水熱返先可以去沖;

如果係老公先沖涼既話就仲死! 佢咁鬼大舊放水放到好滿 - 所以我要等得更耐先可以沖涼!!

不過而家我屋企個花灑咗喎~ 喺修理返或安裝過部新既之前依段日子，都唔可以沖淋浴......聰明既老公唸到一個方法!

 浴室有一個小膠盆，我專用來手洗衣物時用~

早幾晚老公沖完涼......

老公: Honhon~ 妳可以去沖涼嘞!

我: 你啱啱先沖完邊有熱水呀? 等我睇埋報紙先啦!  (網上報紙!)

老公: 有熱水架嘞~ 因為我頭先好似日本人咁沖涼!

 老公所指既"日本人沖涼" - 先用小膠盆盛一盆熱水用來淋濕頭身，然後開始洗頭洗身，最後再盛兩盛熱水沖乾淨身上既泡~

用水量分分鐘仲少過佢用花灑淋浴!

老公: 我係咪好叻呢? 咁我沖完涼後妳咪唔洗等可以即刻去沖囉!

我: 係好醒.......不過你唔好唸住依個方法掂，個電花灑你拖得就拖呀!!



就係咁~ 依幾晚我都開始用老公依個方法沖涼啦!

(不過我唸冬天就唔得嘞~~~ )