節瓜肉片大地魚湯螺絲通粉

依個可以話係童年回憶餐，食極都唔厭~

細個時一到夏天，V婆婆成日都會用地仔魚餚湯底，整依個節瓜肉片湯螺絲通粉做午餐，快手滾起有肉有菜有湯又好好味，啱哂夏天熱得滯唔想煮飯!

(我自己手痕加埋蝦仁! )

我地一般俗稱為螺絲粉既pasta 係Fusilli; 不過V婆婆用既係Riccioli!

 兩者分別在於Riccioli (左)由一條幼長通心粉扭成螺旋形; 而Fusilli 則由一條扁平既pasta 扭成螺旋形，口感有分別架!

 成條螺絲粉都係通心架~

超市普遍都買得到Fusilli，但Riccioli 就好少見......

 早排喺Tesco 見到佢地有得賣 (第一次見!!)，即時買包來試試老翻V婆婆手勢!

 咁煮依個粉係咪一定要用Riccioli 呢?

當然唔係啦!

其實用咩pasta 係可以隨個人喜好! (當然lasagna 除外啦! 哈哈~~ )

之但係"了"咀既我食得出口感上既分別，而且基於我自己既童年情意結，所以我個人堅持煮依個粉，就一定要用Riccioli!

1. 枚頭肉切薄片，用胡椒粉、生抽、糖、少許雞粉、麻油和粟粉拌勻醃10分鐘。

2. 節瓜一條用刀背刮淨表皮，洗淨瀝乾切條備用。

3. 螺絲通粉(或其他種類pasta) 煮熟，過冷河後瀝乾備用。

4. 大地魚湯底: 大地魚乾一條用小爐火煨香，剪成小塊放入煲魚袋內，鍋中加入滾水適量，放入煲魚袋，用中火滾約10分鐘淆出湯底，用鹽調味。

 P.S. 嫌餚大地魚湯底麻煩的話，可以用清雞湯或豬骨湯塊來做湯底，一樣好好食架!

5. 煮滾湯底加入肉片滾數分鐘，再加入節瓜，大火滾至肉片和節瓜熟透。

 6. 將(3)之螺絲通粉加入湯內，煮至回大滾熄火，灑上蔥花即成。



依個湯通粉無論肉類或蔬菜材料都可以隨自己喜好變化 e.g. 雞肉、牛肉、甚至海鮮均可!

 變化 - 西芹肉片湯螺絲通粉~