蠔豉花蟹粥

早排見到網友Fian 煲咗花蟹粥，即時令我唸返起上次去澳門時，網友Samchi 媽帶我地去食過一鍋好正既田雞蟹粥 (網誌)......搞到我流鬼哂口水~~~

依度可以買到生猛既活蟹只有2種 - 蘇格蘭膏蟹(類似麵包蟹 ); 同埋另一種約1隻電腦滑鼠咁上下大細既綠色蟹仔~

至於咩野花蟹、淡水膏蟹、三點蟹......全部欠奉!

2種蟹我都食過 - 不過蘇格蘭膏蟹太鬼巨型，價錢又貴，用來煲粥似乎太過浪費; 但綠色蟹仔奀挑鬼命無肉兼唔甜，煲來都no point.......

不過上天對為食既我總算不薄!  雖然依度買唔到生猛花蟹......

 但最近比我喺泗和行發現依隻新鮮急凍花蟹!

 牠們來自印度!

反正未試過，就買盒來試吓煲蟹粥啦!!

一盒裡面有6隻大小不一，獨立包裝~

 求其攞2隻溶咗雪後個樣好OK喎! 而且仲未煮已經聞到好大陣蟹香味~~~

 肢解咗d蟹後，仲見到好多蟹膏呢!

雖然依度都買到大大隻既雪藏田雞腿，但肉質老靭，鮮味欠奉...都係算罷啦! 咁就改用生曬蠔豉來增加粥既鮮味啦!!



蠔豉花蟹粥

 1. 先煲一煲白粥(可參考快速煲粥法~)，加入魚湯精調味(optional)。

 2. 花蟹用刷子洗擦乾淨甲殼後起蟹蓋，蟹身則去腮及一開二。(若花蟹較大，可以斬得更細!)

 3. 蟹件用薑絲、少許胡椒粉和紹酒撈勻略醃一會。

 4. 生曬蠔豉適量洗淨瀝乾並剁碎。

 5. 煲滾白粥，下花蟹略滾至蟹殼變紅。

6. 再下(4)之蠔豉碎拌勻，滾粥5分鐘後，用海鹽調味。

 7. 食時灑上蔥花即成。

雖則係雪藏貨色，

不過粥滾起時滿室蟹香 + 蠔豉香~~~ 當然講鮮甜就一定唔夠澳門食到既正架嘞.....

 但依個"外國將就版"既花蟹粥，就好似美沙酮一樣 - 用來止口癮絕對食得過!