My Toy Story~

唔知大家仲有無保留小時候既玩具呢?

星期日睇去完Toy Story 3，今集講玩具主人Andy 長大後將眾玩具送出，希望眾玩具可以繼續為小朋友帶來歡樂......
雖然不多，但我仍然保留住少量已有咸豐年歷史既兒時玩具架!

 好老實 - 莫講話攞去捐，我唸依咋野揼出街都無人會執~  

不過佢地載滿咗我小時候既回憶......

 依2個迪士尼原子印係我小學四年級時第一次去日本時買既!

相關網誌: 李家小姐初出城 - 日本北海道 (1987年2月)

 我幼稚園時代用來扣喺書包既鎖匙扣~

雖然淺藍色既塑膠部份已開始有少少褪色，不過啷啷部份至今完全無生銹，品質唔錯喎! 哈哈~~~

 依"粒"公仔同樣係我幼稚園時代既玩具~

 唔記得點解有次我嬲咗依"粒"公仔??   於是我好狠心咁將佢掟咗出對面街唔要佢!

如事者過咗幾日後，我喺屋企門口玩玩吓，見到公仔孤零零一"粒"瞓喺對面街，我即時充滿內疚感!! 覺得對佢好唔住...... (P.S. 果時長洲d街好窄架!)

就係咁我執返佢，一直保留到而家~

 依個熊貓公仔身上佈滿咗不少我既口水漬 + 鼻涕漬~ 顏色已經由黑白變成黑灰......

 有圖為証熊貓公仔的確歷史悠久架!

 熊貓公仔係V爸爸 + V媽媽二人世界唔帶我去日本旅行時，買返來送我既禮物~

 佢可以好似班"靚"模咁啜手指架!  右手又得......

 左手又得......

 甚至腳趾都得!

 如果大家睇到今日熊貓公仔既實物，會發現佢扁咗好多!


因為小時候既我玩玩具時，十足十Toy Story 3 裡面果班Caterpillar Room 既"靚"仔咁 - 亂咁掟!!

日子耐咗熊貓公仔甩線穿窿，裡面既填充物漏出來~ V婆婆幫我補過幾次 - 不過佢無將漏出來既填充物放返入去，所個熊貓公仔瘦哂身!

尋日攞熊貓公仔出來影相時......

老公: 佢叫咩名?

我: 無架~ 佢無名架!

老公: 妳無幫佢改個名咩? 妳地d女仔唔係好興同d公仔改名既咩??

我: 無架~ 佢咪"熊貓"囉!


>>>>>>>>>>>>>>>>>>>>>>>>>>>>>>>>>>>>>>

隨住時間既流逝，揼既揼，比人既比人，我有好多玩具已經唔知去哂邊? 不過我香港娘家房間仍然有大量毛公仔~

我仲讀緊大學既時候，有次放暑假返香港發現咗一件事，我嬲鬼咗V爸爸!!

事源有次娘家大掃除，V爸爸喺未經我 + V媽媽同意下揼咗我2個好好好心愛既公仔......

 我心愛既"大助"...... (我細個時Monchichi 係叫"大助"架! )

大佬~ 咁大隻Monchichi 我早幾年喺Sogo 見到最少要過千 ; 當年聽V媽媽講佢買比我時都要3舊幾水架......

睇我同V婆婆合照都要攬住佢，就知我有幾鍾意"大助"啦!!!!

 依個豬腸頭洋娃娃係我四年級既農曆新年，V媽媽喺花墟年宵花市買比我既~

(係架~ 我好好記性架! )

佢有一身好靚既墨綠絲絨長裙，可惜我無公仔既全身照~  只記得整個農曆新年假期，我去邊都帶住佢!

依2個都係我好心愛既公仔，同樣慘死係V爸爸毒手之下! (後來V爸爸比V媽媽哦咗一輪!!)

事隔多年，而家望住佢地2張遺照，我都仲係有想喊既感覺!!  而且仲有少少嬲返V爸爸!! 尋晚老公安撫咗我耐......

所以我絕對理解Toy Story 3 Andy以為佢媽媽揼咗佢d玩具時既心情!!!

>>>>>>>>>>>>>>>>>>>>>>>>>>>>>>>>>>>>>>

V爸爸V媽媽成日都覺得我係長唔大既小朋友 - 佢地係啱既!

 因為今時今日我仍然好鍾意公仔!

 係呀~ 我好鍾意Pikachu 架! 擇個吉日先比大家睇吓我既Pikachu 珍藏~

除咗日系公仔之外，Mickey & Minnie 都係我所愛!

 第一次去Paris Disney 時老公送既~

 之後04年帶咗Minnie 返去;

 05年就輪到Mickey~

P.S. 小妹只得依張同Mickey 既合照，小妹特此將手上攞住某牌子名打咗格仔~ 心胸窄小既小人勿再入來插!

依對Mickey & Minnie 係Paris Disney 裡面售賣最大既公仔!

咁點解唔一次過帶哂佢地返屋企呢? 點解要分開2次呢??

因為老公唔肯幫我攞!

佢話如果我真係想一次過要哂2個公仔，佢會買比我~ 不過就要我自己一個人攞哂!! 佢身為一個男人，係絕對唔會攬住個大公仔喺巴黎市中心行來行去......

 所以唯有分兩轉佢地先可以團聚~

 Amsterdam Airport Schiphol 買既護士Miffy~

多年前睇壹週刊介紹過依隻特別版護士Miffy，喺Amsterdam Airport Schiphol 先有得賣!

個人並唔特別鍾意Miffy，不過2004年到Amsterdam 旅行時都特登湊熱鬧買咗隻! 唔知係咪已經絕咗版呢? 因為近年喺Amsterdam 等候轉機時，已經有無再見到依隻公仔有售......