二人世界四餸一湯 - 2011年4月5日 (附食譜)

青紅蘿蔔煲豬骨豬脷; 玫瑰豉油雞; 薑蔥焗龍蝦; 蒜蓉炒菜心 & 湯渣豬脷2條

最近個幾星期天氣乍暖還寒，仲幾乎晚晚都落大雨!

天氣凍自然想食d食完全身會暖返既食物~  例如:

 星期日 + 星期一連續2日都煮咗大煲湯粉做晚餐 - 翠玉瓜肉片湯螺絲通粉~

之前煮依個係用開節瓜既......

 不過喺蘇格蘭節瓜仲未係時間，暫時未有得賣，所以今次用咗翠玉瓜代替，一樣好食呢!

連續2日都係食湯粉，尋日星期二晚(4月5日)煮返餐正常飯......

早幾日遊blog 見到blog 友整既玫瑰豉油雞好鬼吸引，搞到我又好想食!

其實玫瑰豉油雞我以前都有整過~ 不過知道blog 友今次係用生果日報私家廚房既食譜來整，八卦下我又去睇吓: http://www.youtube.com/watch?v=3HFEfdRO9xs

 哇~~~~~~~~~~~~~~~~ 整成隻雞要用咁鬼多生抽老抽，仲有大大兜冰糖!!

用咁多冰糖個汁一定甜鬼死......整完後keep 住剩低既汁都麻鬼煩啦!  撈飯邊撈得咁多呀!?!?!
之但係依個食譜確係有可取之處喎!

於是我就自行改良調較咗各材料份量，得出一個比較慳家慳材料既"縮骨版"!!

甘草 - 無! 所以無落;

桂皮 - 都無! 所以都無落;

丁香 - 有! 不過唔記得落!!

最後只用咗八角，個汁都好好味啊! 老公勁鍾意~~~~

而且佢個方法真係得架 - 煮雞時唔好蓋蓋，雞皮真係會爽脆果喎!!

 衰就衰在......英國既雞永遠鹵唔上色!!!!

上星期買咗條豬脷煲發財大利湯~

成條豬脷比我食哂 ，不過唔係好夠喉......

 於是再買豬脷來煲湯，今次仲要買夠2條!!

買到好靚豬筒骨，本來唸住煲菜乾湯......

不過尋日遊blog 見到blog 友飲青紅蘿蔔湯，我又流哂口水想飲埋一份!

(我喺食方面真係好容易受外界引誘呢!! )

 最後由原本既菜乾煲豬骨，變咗青紅蘿蔔煲豬骨豬脷~

 煲完湯既豬脷切片，淋埋豉油雞汁真係好鬼正!! 咁又多一個餸嘞~

尋晚本來打算整一味新餸 - 沙律明蝦球!

仲特登攞咗盒虎蝦出來解凍......點知去超市買餸時比我見到龍蝦!

頂! 上星期煮果餐 (網誌)一早plan 定咗煮龍蝦佢地就無貨，搞到要特登去泗和行買兇狠活龍蝦，用個要走油麻煩版方法去煮......

 基於條氣唔順底下，買咗2隻返屋企!

 虎蝦讓位入哂雪櫃，龍蝦打尖先被煮!!
食哂佢地落肚後條氣順返哂! 哈哈~~~~~~~


 翠玉瓜肉片湯螺絲通粉(參考食譜)click here~

 青紅蘿蔔煲豬骨豬脷食譜click here~

 玫瑰豉油雞(改良版)食譜click here~

 薑蔥焗龍蝦(急凍熟龍蝦專用速簡版)食譜click here~

 薑蔥焗龍蝦 (生龍蝦專用少少麻煩版)食譜click here~