朱古力糯米滋 (Chocolate Mochi)

依粒野而家喺香港非常容易買得到，不過喺英國就麻鬼煩嘞!

好多年前Mochi 喺香港仲未好似而家咁普遍~ 有次我 + 當時仲拍緊拖既Mr.T 返香港，V阿姨喺Sogo 某counter 買咗一盒送比Mr.T，佢一食就從此愛上咗!

後來有次我地去倫敦玩，喺Piccadilly 發現咗一間賣和果子既專門店Minamoto Kitchoan 有chocolate mochi 賣，當然好鬼貴啦......

而且最麻鬼煩既係 - chocolate mochi 竟然季節限定!  所以有時我地夏天去倫敦就無得賣嘞!!

Glasgow 係無和果子賣既，但近年因為開咗Yo! Sushi，迴轉帶上都有mochi (朱古力味 + 抹茶雪糕)，不過一樣好鬼貴!

老公今日喺香港返來，尋晚我特登整咗chocolate mochi 迎接佢!


佢今朝到咗Heathrow 等轉機時打比我，話喺FB見到張mochi 相已經好開心!

老公啱啱試咗一粒......

經Mr.T 親身驗証，佢好興奮咁話同街買既一模一樣!

以後唔洗買都有得食咯!!

>>>>>>>>>>>>>>>>>>>>>>>>>>>>>>>>>>>>>>

A. 朱古力餡......

 1. 含糖牛奶朱古力粒100g 和無鹽牛油1湯匙隔熱水坐溶拌勻。

2. 加入Double Cream 4湯匙，用手提電動打蛋器打至稠，用保鮮紙蓋好放入雪櫃雪凍約30分鐘。

3. 取出用茶匙刮鬆朱古力餡，用約1茶匙份量快手搓成圓球備用。
P.S. 一定要快手喎! 如果唔係會溶到一手都係架!!


B. 朱古力味糯米滋皮......

 1. 大玻璃碗中放入糯米粉1 ½杯、砂糖3/4杯、無糖可可粉2茶匙。

 我用依隻Cadbury 無糖可可粉~

 2. 加入1 ½杯清水拌勻。

 3. 將粉漿過篩令粉漿順滑。 

 4. 蓋好玻璃碗，將粉漿放入微波爐(800W)用高火先叮4分鐘。

 5. 取出粉漿用矽膠刮拌勻。(小心熱啊!! )

 6. 放回微波爐再叮4分鐘取出。

 7. 雙手拍上粟粉作手粉。

 8. 取約1湯匙(6)之糯米糰搓圓輾扁，包入A3的朱古力餡料後封口搓圓造型。

Step 8請注意.......

- 此時的糯米糰仍熱而且非常黏手，所以一定要有足夠手粉先可以將糯米糰輾扁;

- 此外一定要趁糯米糰熱時包入朱古力餡，否則好難封口架!

 9. 最後將整個mochi 沾上可可粉，室溫放至全涼即成。(放入雪櫃可保存2日~ )