5遊花都 - 第二日(3月25日) 食野食野食野~~~

第二日: 一早起身就去揾食~ 不過咁早既巴黎係冇我想食既野既! 只有牛角包之類既野食...所以我地走咗去食法國麥記 - "Quick"~~~~~

 03年第一次去巴黎時，除咗喺Champs Elysees (香榭麗舍大道)見過麥當勞之外，喺其他地方完全冇見到有麥當勞存在~ 到處只有"Quick"! 不過今次喺巴黎，幾乎每間Quick 既隔離或對面都有一間麥當勞......但我覺得Quick 好食過麥當勞多多聲!!!! 喺法國連漢寶包都好食過人~ 每次到巴黎，我都一定會幫襯Quick!

 第一次食時，我要咗佢地既魚柳包 - "King Fish"~ 不過04年時已變咗而家既"Long Fish" - 魚柳薄咗但長咗~~~ 

 老公就食咗佢地既三層芝士漢寶......(個包印住"No3" - 因為有三層...好得意!)

食完第一餐~ 我地去咗Les Halles 一個好大既shopping centre 繼續shopping~ 主要目標係買個三腳架~ 因為來時唔記得帶! (而家屋企有3個三腳架...唉!) Les Halles 係巴黎市舊時代一個好大既食物市場，但今日已變成遊客區 + 大shopping centre.....

 大家冇眼花! 冇錯~ 係"無印良品"...英國雖然有，但我住果區冇~ 所以我一有機會去無印就會買野! 我買咗: 化妝棉1包、Lavender 香味浴鹽、兩本好似passport 既記事簿 + 廚房竹鑊剷1set - 貫徹我鍾意買廚具既精神!!!!

 仲喺Bershka 買咗兩件衫~ 依個牌子我喺英國冇見過，但舊年去西班牙時買過依個牌子 + 我好鍾意佢地既衫!

 shopping 完喺出面見到好多雀仔喺水池邊玩跳水沖涼! 好得意~ 好多人圍住影相! (雀仔~~~ 咁鬼凍~~~ 沖乜鬼涼?)

買完野又係食野既時候! 我地搭車去咗另一區Boulevard Montmartre......

 我地喺"Le Cafe Zephyr"食lunch~ 老公食咗燒豬肉腸配芝士焗薯; 我食咗煎厚牛扒配煎薯餅green beans + bearnaise sauce......個bearnaise sauce 超級好食!!!!!!! 係我食過最好食~ 連老公都話係! 可惜太細兜...我一定要自己學整!!!!!!!

 05年去巴黎時，我喺依度既Passage Jouffroy 揾到一間買公仔屋配件既玩具店~ 今次特登去番入貨for 我間袖珍餅店! 買咗咁多野都只係30幾euro，喺英國同樣價錢一半都唔知買唔買到......

 食完lunch 之後，我地特登去揾"Ratatouille" 裡面出現過既一間舖頭 - "Destruction des Animaux Nuisibles"~ 依間舖頭係專賣防治蟲鼠產品，已有好耐歷史(1872年!!!!) 

 喺"Ratatouille" 故事裡面，有一part 老鼠主角Remy 既老豆帶Remy 去睇人類點對付老鼠，叫Remy 要分清楚人類還人類，老鼠還老鼠! 舖頭窗櫥display 既全部係真老鼠標本! (好核突~) 唔知巴黎既蟲鼠問題係咪真係咁嚴重呢? 我地一路影相，一路都有好多人客進進出出舖頭! 因為裡面太多人，廢事阻人做生意，所以我地冇入去參觀~ 不過我見到佢地喺舖頭入面貼咗"Ratatouille"既poster! 哈哈~

 睇完老鼠店~ 又係食野時間! 我地去番05年+07年來時都有食過既法國餐廳 - 喺Gare de Lyon 火車站外面既"L' Europeen" 食海鮮下午茶!

 我地要咗法國蝸牛、膏蟹 + 海螺~ 本來老公仲order 咗海鮮湯，不過條友冇落單~ 蝸牛似牛龜咁大; 膏蟹超多膏; 海螺好鮮甜......

 食到最後兩隻螺時，老公話比我一個人食哂~ 但我想同老公分甘同味! 我餵咗老公其中一隻螺......點知到我食最後一隻既時候，我唔小心跌咗粒螺肉落地!!!! (我咁鍚老公...點解要罰我???????)

 食完野我地特登去咗揾一間叫"Casino" 既超級市場~ 之前我睇咗一本介紹歐洲超市既書，裡面話"Casino"可以買到鹽+胡椒粉既情侶裝...比我揾到啦!!!!!!! 好cute~~~~

 仲買咗一盒喺英國冇見過既家樂牌牛肉汁精.....

 第一晚冇去到紅燈區~ 所以趁住時候仲早，行完超市去咗紅燈區逛逛......夜咗去會太多人 - 危險比人打荷包! 雖然以前已經去過，但我地一直都冇睇過Moulin Rouge + sex show......真係冇乜興趣喎~~~~

 之後唔知係咪太凍冷親定乜鬼野，個頭開始痛! 返去酒店抖咗陣+食咗藥...又再出去食晚飯! 其實唔知係咪因為冇米落肚呢? 我係飯人來~ 就算唔食飯都要有碳水化合物落肚......於是乎又去食酒店附近既中國人日本餐(第二間~)

 埋單時~ 老闆又請我地飲兩杯清酒......!!! 我初時見到兩杯野~ 仲戇居居問老公: 點解比兩杯咁細杯水我地既?  因為我食咗藥，所以又係老公搞掂......咁又過咗第二日嘞~~~~~

*******************************************************************

明明頭先打緊第一日時，有個message 彈出來話每篇blog 最多放20張相......但而家放咗廿幾張都冇事.........