5遊花都 - 第三日(3月26日) 不一樣既凡爾賽宮......

之前來過巴黎4次...迪士尼都去過3次~ 但我地反而未去過人人讚靚既凡爾賽宮! 其實我一直都好想知Marie Antoinette - 喺人民冇麵包食既時候，會問:冇麵包...咁點解唔食蛋糕????? - 依個咁搞笑既女人，所住既地方係點既!

第三日: 天陰陰咁既衰樣~ 天氣報告又話放晴?????  好彩買火車飛時，售票員叫我地買套票 - 包來回火車飛+凡爾賽宮入場~ 如果唔係都幾大煲 - 去到排哂長龍!!!!!!!

 地方真係好鬼大!!! 行到腳軟~~~ 如果好天既話，一定好靚! 但...點解同明信片上見到既凡爾賽宮唔一樣既 - 一朵花都冇既??????? 真係一朵都冇喎!!! (有冇搞錯呀??!!?!?)

 雖然天陰又冇花...但我心情靚靚!!

 入到宮殿裡面，我好詫異點解要咁多間房+咁花lee 花碌? 宮殿起都起咗成50年...(洗唔洗咁巴閉呀????) 巴黎真係好得意 - 度度都有告示叫人唔准影相，但個個攞起相機猛咁影都冇人理! 以前去羅浮宮睇Mona Lisa 又係咁~ 所以唔影就笨嘞!!!

 成個天花都佈滿壁畫~ 睇都睇到頸痛...

 好靚好華麗既"鏡廊"~

 因為趕時間返出去巴黎市中心 - 想去睇間新開既水族館(收8pm~)...所以我冇時間食野~ 不過老公頂唔順求其喺宮裡面既小食亭買咗個好核突 + 唔係咁好味既火腿芝士crepes......

 返到市中心~ 揾咗好鬼耐先揾到水族館所在位置! 水族館入口處好得意 - 要穿過一個"水屋頂"~~~ 有少少濕身架!

 本來想喺水族館裡面既日本餐廳食lunch...但間死野竟然要7.15pm 先開門.......

 水族館位於巴黎鐵塔對面~ 所以離開水族館後，順便走去影吓日頭既巴黎鐵塔!

 我果張相上面有隻鴨飛緊...(咁都比老公影到 - 真好野!!!!)

 真係餓到頂唔順~ 返咗去Latin Quarter 果頭食法國野! 老公既法國洋蔥湯 + 我既蝸牛頭盤...

 主菜 - 老公既牛扒配bearnaise sauce + 我既香草汁羊扒~

 唔知係咪餓過龍...依頭啱啱食完扒，我即刻走去餐廳對面買咗盒壽司~ 10分鐘後返到酒店，我成盒食哂!

 喺酒店抖咗陣~ 就再返出去影巴黎鐵塔夜景!

 鐵塔底部 - 好似LV logo! (嘻嘻~~~)

 影完相，老公喺鐵塔旁既小食檔買咗個甜crepes - 香蕉+朱古力......

 之後去Champs Elysees 既餐廳"George V"食宵夜......

 我既田雞飯~ 碟野埋枱時香到不得了!!!!!! 田雞唔知用乜鬼來醃? 好香好入味......

 老公剛剛喺鐵塔旁食完甜品又再食甜品! 依舊唔知朱古力乜鬼 - 佢話好正~ 不過太細舊喎!

食完宵夜就返酒店覺覺豬......