2008年3月17日星期一

我的好友 - M

Guidis 對我來講係一間充滿回憶既餐廳......

十多年前我剛剛認識M,大家仍未熟絡,仍未成為好友...第一次去Guidis,係同我既ex + 一大班朋友為M慶祝生日,當晚好熱鬧,大家都好開心! 經過咗一段時間,發現大家好投契,漸漸我同M成為咗好朋友,M會叫我做"阿姐"~ 當時我同M對感情事都好唔成熟,經常為感情事而煩惱 + 唔開心~ 我地會同對方講心事,陪對方笑,陪對方喊; 開心時又會一齊煮野食、BBQ+shopping......我地會買同款既衫......M好鍾意食我煮既餸......我地一齊喺香港影咗一輯唔多靚既相.......

我同ex 分手時,係我人生最倒霉既一段日子~ ex 同M係由細玩到大既好友,我亦係因為ex 而認識M~ 但M因為我既原故,同我ex 反咗面......到我認識老公之後,記得有一次M來我屋企過夜,我同M講: 而家好開心~ M回答我: 我見到妳咁開心,我都好開心呀! - M就係一個咁不可多得既好朋友!

多年後有一日,我收到M離世既消息......當時我唔想/唔肯相信係事實,我甚至嘗試打M既手提,希望M會接電話,同我講一聲"阿姐,我冇事~" 可惜接電話既係M既姐夫......我當時好嬲M! 我將我地既合照+M去加拿大讀書時寄比我既信全部揼哂! 但我保留咗僅有既一張相 - 相裡面既M + 我都笑得好開心......我仲記得最後一次見M既時候,M好開心,仲同我講將來我結婚既時候,希望做我既伴娘......我到今時今日都唔明點解M要離開我地?

當年我只到過Guidis 一次,後來已經忘記咗地址...M離世兩三年後,我同老公買咗樓,計劃我地既將來......有一日我同老公揸車喺屋企周圍揾食,無意中發現原來Guidis 就喺我地屋企附近! 唔知係咪M提醒我 - 叫我唔好忘記佢呢?

我每次去Guidis,我都會唸起第一次去既情境~ M喺我心目中永遠都係咁開心咁靚女! 我想M知道 - 我時時都會掛住佢,佢永遠都係我好朋友......

2 則留言:

  1. 吾知講咩好...因為我吾係好識安慰人...只係知..人大左好難識到知心朋友...
    [版主回覆03/18/2008 17:27:00]多謝妳~  唔洗安慰我! (我明架嘞~) 我只係想喺自己blog 度紀念一下我好朋友~ 我相信佢會睇到我blog! 我冇唔開心...都過咗咁多年,我只會記住開心既野~~~~

    回覆刪除

Related Posts Plugin for WordPress, Blogger...