粉葛赤小豆扁豆煲排骨; 梅子蒸雞; 蟹柳炒蛋 & 蒜茸菠菜
天氣持續熱 + 焗~~~~
冇乜食慾更"煮慾"! 不過就算我唔食，老公都要食! 而且冇食慾就更加唔想嘥錢出街食~~ 所以都係煮啦!!! 最多煮清淡d.........
湯仍然係果煲~ 一煲湯我地通常飲2餐; 餸就煮咗個新既開胃菜 - 梅子蒸雞~ 老公又話好鍾意! 晚晚叫佢比分，佢都話比10分，都唔知係咪架......??!?! 所以由尋晚開始，我要佢講埋比10分既原因!!!! 佢話梅子蒸雞有少少酸，有少少甜，又有少少辣...好開胃好好送飯喎~~~ 睇佢個樣又唔似假喎 - 成碟幾乎都係佢食哂! 我食得幾舊 - 因為我冇胃口唔想食咁多肉~~~~~
喺雪櫃裡面發現早排整壽司用剩既蟹柳，仲有幾日就過期! 於是發揮我慳家既本領 - 蟹柳炒蛋~ 咁又搞掂一餐 + 唔浪費嘞~~~~~~~
粉葛赤小豆扁豆煲排骨食譜click here~
梅子蒸雞食譜click here~
蟹柳炒蛋參考食譜click here~
乜唔係永遠都係11分嘅咩???有個咁知慳識儉又出得廳堂,入得厨房嘅老婆 應該餐餐都係滿分兼爆燈啦!
回覆刪除哩排我都好濕熱,都係時候煲吓粉葛湯清清佢!
[版主回覆07/31/2008 20:30:00]我反而想佢老實d喎~ 咁我先會有改善有進步嘛! 不過見佢好似餓鬼上身食得好鬼滋味咁款~ 又似佢真係覺得好好味咁喎! 除咗菜 + 蝦膏咸魚之類囉.........
最近我依度粉葛好靚! 以前我見到粉葛都唔會買來煲，廢事切餐死! 自從有咗把日本菜刀之後就冇有怕!
2個人要3餸一湯咁多嘅? 我都係2個餸1湯.
回覆刪除原來新加坡人好鍾意家裡煮餸煮定一大煲, 午餐食佢, 晚餐又食佢. 分分鐘第2日都係佢.
我嫁過黎時, 奶奶問我點解煮咁多, 我話2個餸1湯ja wor. 佢話唔洗成日煲湯, 新加坡人好慳. 唔想用咁多媒氣. 我話我用真空煲. 大少都話點解唔煮一個餸. 佢話一個餸佢都得架啦. 我話我唔得架喎. 我話一定有菜, 另加一碟餸. 如果唔係咪均衡唔到營養囉.
如果我好似您煮咁多. 實行捉我去勞改呀.
[版主回覆08/26/2008 18:23:00]2個人3餸1湯真係好多咩? 我地食到喎! 如果得2個餸...我又一定要有菜 + 我老公唔鍾意菜，咁咪即係老公變相得一個餸食?
而且依度買野唔似得香港 - 要幾多買幾多~ 依度買乜都好，多數一包包pack 好哂，都幾大份~ 加上肉已經係冰鮮或雪藏過， 我鍾意新鮮，唔想留太耐，咪一次過煮哂佢囉!
我未嫁時喺香港外家一路都係最少3餸1湯 (我係獨女，所以得3個人~) 我慣咗要3餸1湯啊~~~~~~~ 湯我都係一星期最少煲1次，多極都係2次，唔算多啦!