女校生怪談

九龍塘有一間band 1女子中學 (係邊間唔洗講嘞啩!)，我就係喺果度渡過咗我既中學生涯...至F4就來鬼咗英國嘞!

先略略講解一下當時校舍既地形...
學校其實係位於小斜路之上，
所以隔離既火車站比校舍低咗落去。
(講到咁白，真係唔洗講邊間嘞啩!!?)
當時校舍連埋天台總共有6層，
學校入口 - 即有操場 + 禮堂果層係第三層~ 操場+ 禮堂以上 + 以下又各有兩層~
不過我地會稱操場(入口)果層為"地下";
上面兩層為"1樓" + "2樓" - 全部都係課室;
下面兩層為"地下室"~


因為學校位於較高處，
所以下面果兩層其實唔係真正既地下室!
兩層所謂"地下室"，其實都係由一排過既課室，
課室外係一條又長又窄既走廊通道組成。
雖然唔係真正地下室，但由於長期被大量樹木包圍，
所以冇乜光線，就算平日有燈，都有陰森既感覺!
冇燈時仲嚇鬼!!!

第一層"地下室"除咗有課室，仲有小食部 + 老師飯堂;
而最底果層就有音樂室、家政室、地理室...(其他唔係好記得!!) 依咋最底層課室既窗外就係火車站嘞~~~~
(校舍已經改建咗好鬼多年，唔知而家仲係唔係咁既間格......)

我F2果年既夏天，
我幾個同班同學就喺班會度講咗以下既經歷..........
當日下午最後一課係美術課，課題係素描，
大家都好興奮 - 因為老師講解完之後，
可以係校舍內自由走動搵景~~~
好似我依d咁既懶人就可以承機偷懶!!!
anyway 美術課完咗之後，係班會時間，
但當日班會有別於一般正常班會~
班主任冇依當日題目主持班會，
反而一開波就同我地講: 世界上係有好多唔可以解釋既事...但主會保守我地......
(咁上下啦~ 班主任係基督徒...)
跟住就叫咗其中一個同學出去開始講佢上美術課時既經歷......

話說依個位同學 (我仲記得佢個名! 但依度就稱佢為"G"啦~)
G上美術課時，同其他2位同學喺"地下室"最底層處搵景素描。當G到達最底層時，離遠望見走廊盡頭既音樂室，
透過門上既玻璃，見到裡面有人!
G當時好奇怪~ 因為:
(1) 音樂室冇開燈，即係裡面根本冇課;
(2) 當時我地學校來講，未經許可擅自走入任何課室係死罪來! 就算A班人去搵B班人都唔可以進入B班課室;
(3) 所有特別課室e.g. 音樂室美術室...依d咁既地方，只有任教老師先有鎖匙，平時冇課既話，門一定上鎖.....

G於是話比同行既2位同學 - 音樂室裡面有人~
而其他2位同學都証實，話當佢地望過去時，
見到音樂室裡面有個同我地一同樣 - 著住校服既女仔行過!
於是佢地行去音樂室睇吓乜事 - 去到門口由玻璃望入去，
但音樂室內空無一人!
佢地嘗試開音樂室既門，門亦上咗鎖打唔開......

當日佢地究竟遇到乜野...情況係點......
基本上除咗佢地3個之外，其他人完全唔知!
我曾經都有過疑問 - 會唔會只係風吹既樹影?
但如果樹影，應該冇理由3個都睇到"對方"著住校服喎......
(我地校服顏色好鮮艷呢!)

最重要係 - G + 另外2個同學都係出名品學兼優 + 老師鍚到燶果隻~ 而且佢地全部係基督徒!
佢地根本唔需要作個咁既故仔來引人注意~~~
(我唔記得另外2個係邊個~ 因為當時係由G一個人企出來講既!) 而且我都睇得出當時佢地好驚~ 尤其係G!

之後有一段日子，全校所有音樂課改咗去禮堂上課......
過咗一排，又正常地去返音樂室!
而學校亦一直冇同過我地解釋原因~~~
所以我唔知同依件事有冇關係........

咁究竟係唔係呢????