2008年7月11日星期五

蜜月旅行相

06年10月結婚時,由籌備婚禮...到完成哂兩個婚禮 (英國 + 香港~),已經用哂老公果年全年既假期! 所以我地影婚紗相 + 蜜月旅行都係後補既.......

舊年差唔多依個時候 - 6月尾 + 7月頭,我地就去咗意大利 + 西班牙2個星期補渡蜜月~ 依2星期裡面,我地影咗過千張相,全部係用同一部相機 + 同一張memory card......不過其中3張喺佛羅倫斯影既相,就有少少古怪..........

07年6月28日,我地從羅馬搭火車到佛羅倫斯day trip,而果3張古怪相,就係我地參觀S. Maria Del Fiore - The Cathedral (聖母百花大教堂大圓頂) 時影到既。


 排隊比咗錢之後,我地就沿住又窄又暗通道走幾百級石級,走上教堂既頂部 - 大圓頂~ 基本上直至上到大圓頂之前所經過既地方都係咁既同樣......(因為窄而且遊客一個跟一個,所以就算攰都唔應該停落來抖...阻住人地嘛~~~)


我地一路行都一路影咗好多相~ 行到中段有一處比較寬敞既地方,放咗一排石像 (應該係天主教既聖經人物!) 石像前有鐵欄圍住,大部份人都會襯住依個空檔抖一抖~~~ 我 + 老公襯依個機會,叫其他遊人幫我地影咗1張合照,之後我再齋影咗2張石像相,就繼續上去大圓頂。

喺相機度睇返相就冇乜問題,但蜜月完咗返到屋企,將所有相upload 到電腦後,就發現千幾張相裡面,就只有喺石像前影依3張相,有好多大大細細半透明既圓點.......


 第一張係遊客幫我地影既合照~ 左方有1個好清楚 + 好大; 老公上方喺2個石像之間,有另1個唔太清晰既,要留心睇先睇到.........


 第二張有1個細少少都頗為清楚既喺既右上方 + 1個好細又冇咁清楚既喺右面兩個石像之間..........


 第三張...唔洗講喺邊嘞啩!

我 + 老公都有唸過會唔會係相機鏡頭有塵呢? 

 但如果只係塵...咁點解其他相又完全冇咁既問題呢?? (我地冇抹過鏡頭喎~) 而且 - 我地喺大圓頂裡面又唔止影咗依3張相...咁點解其他大圓頂相又冇圓點呢???
最主要係我 + 老公睇過好多真實個案有關靈異經驗既電視節目,好多人原來都試過影相或拍video 時影 / 拍到依d圓點! (video 仲恐怖 - 圓點會郁既!!!! ) 果d白色圓點就同我地果3張相一模一樣! 而根據節目所講,果d圓點係靈體來,叫做"orbs".........

V媽媽叫我delete 咗依3張相~ 不過我覺得影相時係日光日白,而睇返相都只係覺得奇怪,又唔係好驚果隻....所以我覺得冇咁既必要! 就由佢繼續做個小小既不解之謎啦........

>>>>>>>>>>>>>>>>>>>>>>>>>>>>>>>>>>>>>>>>>>>>>>>>

Speaking of 古怪相~ 我唸起朋友Kelly + Wing 既美洲之旅.......

Kelly (女) + Wing (男)只係一對好朋友,佢地唔係親密男女關係! 不過就會約埋一齊去旅行~ 佢地所講既古怪相,其實我冇睇過! 

只係佢地去完旅行返來時既一次飯局,我向佢地提起蜜月旅行依3張古怪相......

跟住Wing 就露出一個驚恐既表情來,話佢地喺Mexico 時都影到一張相 - 裡面有個男人頭! Kelly 再話: 真係架~ 個男人頭好清楚架!!!!!

不過之後佢地去clubbing 時唔見咗個相機......



3 則留言:

  1. 但係第三張又真係好似啲塵咁嘅樣,比任何人睇仲會諗機主仲乜鬼唔抺下個鏡頭添~~
    不過古堡都係多呢啲事架喇,我試過去旅行社諗住訂澳門有間百幾年歷史嘅酒店住,個女店務員靜靜咁同我講,叫我訂第二間,呢間好多果啲野 ,咁我又膽小,我無理由挑戰自己底線嘛,咪唯有簡第二間囉
    [版主回覆07/11/2008 21:40:00]我都希望果d係塵來...但我覺得冇理由喺教堂裡面其他位置影既相又冇問題,係依3張先係咁!?!? 如果d塵真係咁勁,我影之前都一早抹鬼咗啦!!!! 就算真係靈體,我覺得一d都唔出奇~ 間教堂內部長期不見天日,又暗又陰冷...果味野係鍾意喺依d地方架啦! (我去時係盛夏來喎! 意大利好鬼熱喎!!! 但一入到去就透心涼~~~)
    哈哈~ 英國依度有好多旅館 / 細酒店都係以有鬼做賣點架! 我同老公都想試吓去住一兩晚~~~ 嘻嘻!!

    回覆刪除
  2. 我以後都係日頭先喱揾你喇,費事個  D  嘢有機會遊埠喇
    [版主回覆07/14/2008 06:48:00]送一隻比你~~~~  等你日頭 + 夜晚去邊佢都跟住你!  嘻嘻~~~

    回覆刪除
  3. 你真係大方喇 ..........................D 公仔勁得意呀!!!!你真係醒,...係邊處揾㗎,hehe,  靚女師傅
    [版主回覆07/14/2008 14:56:00]咪又係果度囉!!!
    話時話你張大頭相靚仔咗喎~~~~ 呵呵!

    回覆刪除

Related Posts Plugin for WordPress, Blogger...