孖T香港日食夜食2008 - 麻麻地篇

香港貴為美食天堂，不過樹大有枯枝~ 有好好食既...亦有普普通通...麻麻地...+ 完全唔掂!

我個人鍾意先甜後苦~ 咁講完好食既......而家就輪到唔係咁好食既!

>>>>>>>>>>>>>>>>>>>>>>>>>>>>>>>>>>>>>>>>>>>>>>>

越南人: 有日我 + 老公陪V爸爸喺舖頭附近食lunch，本想去隔離街一個我覺得好好食又好平既越南餐廳，點知依間餐廳已經執鬼咗......於是就去咗舖頭轉彎(即金魚街轉角果間)既越南人~

 食越南野我一定會食香茅豬扒~ 我 + 老公都係要香茅豬扒飯; 以味道來講都合格既...只係合格之喎~ 唔係好味喎! 而且豬扒又少又薄唧唧......

 V爸爸試新野 - 香茅豬肉飯~ 依個幾好味! 但就要等好鬼耐!!! 我 + 老公食咗成大半碟香茅豬扒飯先送來.......

另外我地order 咗d小食，3個人分......

 越南春卷~ 尚算香脆，還可以......

 越式拼盤~ 好一般......

 沙爹牛肉串~ 依個我冇試到...因為我唔鍾意沙爹!!

好老實...我唔知其他越南人分店係咪咁既水準??? 但佢地打正食越南野既招牌，味道真係好一般! 執咗果間越南餐廳比依間越南人好食得多多聲!!! 價錢都比越南人平......

不過最唔掂既唔係佢地既食物~ 而係佢地裡面果條企枱四眼仔!

 態度真係不知所謂 + 冇禮貌!!!! 問多兩句都一副唔想答既面口，冇野做時只掛住傾計......唔想撈其實好易架啫~ 反正而家市道咁不景!!! 食物水準已經唔高，侍應仲要態度差...要執笠真係指日可待!!!

撇開條不知所謂四眼仔~ 單以食物來計，我真係食過好多比越南人好食好多既越南餐廳! 越南人雖不至係我食過既最差，但就係尾二囉......


元氣: 香港咁多間唔同既迴轉壽司店，我 + 老公獨愛元氣~ 曾經去試過板前，但一路食個心一路鬧!!!!!

我地喺香港時間寶貴，既然知道元氣一定有我地鍾意既野，所以唔想 / 懶得冒住唔好食既risk 去試新既店.........

但今次喺香港去咗2次元氣，發現水準真係下降咗! 壽司種類少咗好鬼多之餘，亦冇以前咁好味~ 或者金融海嘯唔多唔少都有d影響!

不過元氣仲未變成唔好食! (希望唔會有咁既一日~) 只係冇以前咁好食啫~~~ (希望遲吓水準會提高返啦!!!)

個人覺得元氣最少有3樣野仍然保持水準既...燒海鰻壽司(依個真係好食!); 燉蛋 (十年如一日地滑滑~~) 油甘魚都唔錯.....炸軟殼蟹都幾好(但炸野有幾難呢??!!?!);

 以前已經好想試象拔蚌壽司! 不過好少見會擺出來，我顧住攞又顧住食懶得order......所以一直冇試過~ 象拔蚌好鮮甜喎!!!

同老公去元氣，我唸佢最enjoy 既並唔係壽司~ 而係元氣五顏六色既甜品!!!

 依舊芝士餅，老公一口氣食咗3塊!!!

 食完第二舊芝士餅之後，老公攞咗杯低能啫喱糖!!!! 不過老公話啫喱糖麻麻地......所以再食多塊芝士餅來"遮住啫喱糖既味道"!!!

我覺得元氣唔應該因為金融海嘯而將貨就價~ 喺逆境都要保持價廉物美既水準，先可以捱得過大風浪架嘛!!!

我地下次返香港時，仍然會去元氣~ 因為雖然水準冇以前咁好，但我地仍然覺得係屬於好食! 不過同時我地亦會搵定後路 - 開始試吓其他迴轉壽司店~~~

客家人: 有晚V媽媽去咗打麻雀，咁我唔忍心V爸爸一個人孤零零食晚飯，所以我同老公陪V爸爸食~ V爸爸提議去屋企(娘家)附近既客家人試試......

V爸爸細食，所以我地只叫咗3道菜......

 客家釀豆腐~ OK...不過唔夠味! (我唸住試吓煮依個餸~ 我好有信心可以整得好味過佢!!!!)

 客家豬肉砵~ 豬肉炆得唔夠入味! 可取之處係豬肉夠肥，夠軟滑~ (所以我懷疑係用壓力煲炆既!)

 蒜茸菠菜~ (依個冇可能可以炒得難食嘞啩!!!?!?!)

餐牌上既食物，我地連點3個餸都話"賣哂"!

 基本上佢地既食物都OK 既，只係樣樣都好似冇乜味道......


心。泰: 今次香港之行，最離譜既都算係新世紀廣場既心。泰! 故名思義"心。泰"係食泰國野既~ 因為時間關係，我地就唔到時間特登去九龍城食泰國菜

 所以將就地搵咗依間近近地既心。泰~ 入到去一坐低，我心裡面已經叫咗一聲"shxt~~~~"......

睇裝潢其實已經睇得出...不過佢地連餐品都寫到明係泰fusion 菜~~ 我一向都好憎fusion 菜! 話得係fusion，咁即係唔正宗啦!!! 我會覺得係因為做唔到正宗既，先會美其名為"fusion"~~~

 我要咗個泰式黃咖喱雞飯~ 個汁其實非常好味好送飯!!! 但咖喱雞...竟然蕃薯多過雞肉!!

 賣相麻麻到我唔想試...老公既泰式炒飯~ (老公話OK 喎! 但佢不停偷我d咖喱汁撈飯...)

 點都要食返餐泰菜既原因，其實係為咗碗冬蔭功! 依個湯夠辣，不過味道似我喺英國食到既味道~ 如果返到香港都只係食到咁既質素...why bother????

咁我點解話心。泰離譜呢??? 

 咪睇佢個湯裡面，有一大隻完整既大頭蝦...大頭蝦當然係雪藏野來啦~ 我絕對接受得到! 而且我都食慣雪藏野!!! 不過......

 依隻野竟然係霉既!!!!!!!

 
仲要係霉中之霉果隻!!!!!! 我反應快吐返出來~ 但老公就傻更更吞咗落肚......


不過我好佩服個chef - 隻野霉成咁...佢都煮得出一個"望落新鮮樣"!!! 而且仲可以keep 到個蝦形狀......

>>>>>>>>>>>>>>>>>>>>>>>>>>>>>>>>>>>>>>>>>>>>>>>

總括來講...以上依幾間餐廳，除元氣之外...其他我地都唔會再幫襯!!!