愛與狗同行 (This Darling Life)

今年睇過既戲，大部份都算好~ 就算唔太好既...都不至於太差! 依套<愛與狗同行>...真係一套真真正正既港"剷"片 - 完全破壞咗我今年幾乎冇睇過爛片既良好紀錄!!

套戲係返香港時買既VCD，我 + 老公都係dog person~ 見到有講狗既紀錄片，總會有d興趣! 今次老公好有先見之明 - 佢認為香港拍親依類片，大都係懶煽情想人喊; 喊唔喊我冇乜所謂，我志在睇狗仔啫!


不過一開波約10分鐘，我地已經覺得唔對路...之後我同老公都一路睇一路鬧鬼!!

越睇越火滾!!!!

戲由多個人與狗相處既真實故事串連而成，素材好充裕，如果切合返主題來拍，的確好有potential! 但戲最大敗筆之處就係名不符實 + 完全離題......

- 阿導演陳安琪開場時係咁二講過吓佢果2隻松鼠狗，之後就不停講佢自己 + 佢已去世既媽媽既關係~

show 舊家庭相既同時(唔係狗相喎!)，中間仲有一段無厘頭到同自己細佬一齊返舊居......完全同狗冇關!!

- 其中一段影Beyond 黃貫中講佢養既狗就仲離哂大譜!!! 一半時間影黃貫中喺台上表演;另一半時間影佢擔住枝煙印印腳咁講述佢有次泊車時，有位阿叔個紙皮箱阻住佢，佢一腳踼開人地紙皮箱既英勇事蹟......完全9唔搭8!

果段黃貫中隻狗完全冇出現過，我到而家都唔知佢養既係咩狗......;


- 其中一個個案，講1個女人 + 1隻佢"老公"執返來既流浪狗仔一見鍾情，女人收養咗隻狗仔之餘，仲要一路支持佢患上癌症既"老公"......個女人 + 男人口口聲聲稱呼對方做"老公" + "老婆"，但個女人原來係二奶來! 

至於個所謂老公，就仍然未同個真老婆離婚~~ 個二奶就好偉大地咁話 - 係佢照顧之下醫好咗佢"老公"! 撇開同狗完全冇關...但個女人一副光明正大既態度，令我覺得好反感囉~~~

- 當中有幾段狗主愛犬離世後，主人為愛犬舉行葬禮 (仲有和尚到場打齋超渡!) - 我自己曾經都係狗主，我唔會否認有人鍚狗鍚到咁既程度! 不過愛犬既葬禮有人用鏡頭影住自己喊，實在有點兒那個囉~~~~ 

究竟個葬禮係為愛犬而舉行? 還是為拍戲出鏡呢???

- 其中一個case，導演偷拍1個流浪者 + 佢隻狗~ 個流浪者應該完全唔知情! 我覺得導演咁鬼鬼鼠鼠好冇品囉~~~ 觀乎外國拍既紀錄片，採訪既人明知自己唔受對方歡迎，但點都會先徵求人地同意囉......(除非有切身危險就另作別論!!!)

個人覺得成套戲完全冇感動位~ 廁所位就成套戲都係! 我好surprised Yahoo Movie 裡面竟然有咁多positive reviews~~~ (係咪做媒架???) 在我來講就係超爛片一套!! 就算套戲係免費，我都覺得浪費咗我82分鐘生命!! 我仲係真金白銀咁買返來睇喎，有乜辦法唔火滾吖~~