2010年1月22日星期五

狗公 (1)

會考八優既中文大學二年級生喺港鐵公然露械摩擦少女臀部罪成,雖然我好戥對方父母難過,不過我真係覺得大快人心!

因為世界實在越來越多依種變態狗公狗婆! e.g. 早陣子睇新聞18歲少女同未成年男友喺公眾地方進行性行為,被途人發現喝止仍然當人無到繼續做,係都要人地報警拉上差館見哂報紙先知衰......依d行為同狗根本完全無分別!

有朋友曾經喺圖書館比人偷拍裙底; 而我曾經遇過3次下流狗公......

(1) 07年2月農曆新年前一個天氣晴朗既星期六下午 (我咁記得係因為當日我同老公出街買浴室裝修用既瓷磚!)

當日下午點零鐘我地出到Glasgow City Centre,老公喺一間街口角落pound shop 先放低我,然後將車泊去Chinatown car park,唸住泊完車再返來同我會合~ 我落車後想起要買一個金屬炸篩,於是入咗pound shop 裡面睇睇......

依間pound shop 好大 + 當時裡面有好多客人,而廚具全部掛喺pound shop 最入面右邊既牆上~ 我入到去時留意到一個大約50零60歲既白頭阿伯,喺掛住廚具既牆前行來行去,當時我以為佢等緊老婆,所以無聊地行來行去,但佢阻住我睇野......

睇咗一陣我就搵到我想要既炸篩 - 掛喺牆既下方,於是我彎低身準備攞一個......依個時候我發現有人立直面向我既右手面,距離我頭只有一尺左右 - 因為我彎低咗身,所以我個頭右面剛好對正對方下部!

當我面轉向右邊時,我見到對方褲鍊完全拉開咗,右手握住完全裸露出來既"械"有所動作! 我即時大驚 + 講咗句粗口! 我企直後怒啤對方,當時我身後有一位頂龍只有十幾歲既印籍店員擺緊貨架,於是我即時向對方投訢!

白頭狗公見我向店員投訴,即時轉身向門口方向鬆人! 而果位店員比我反應係"who?",我指住正鬆人既狗公,店員竟然向我笑笑口 + 繼續擺貨!!! (真係想星佢一大巴!!!!)

我不甘白白受辱追到門口,狗公已消失於人來人往既大街! 我當時又驚又嬲,即時打電話比老公! 老公叫我返入pound shop 睇吓有無閉路電視,但我見唔到店內有閉路電視.......於是我走出pound shop,喺街角店既corner 位等老公,我當時好驚又好嬲,所以我叫老公唔好收線......

依個時候我已忍唔住喺街喊咗出來! 老公一路安慰我,一路跑來同我會合......突然我見到狗公轉入corner 位 - 一路向我行埋來,右手一路玩緊佢既"械"!

無錯 - 係星期六下午既大街! 唔好問我點解無其他人見到!!! (信就信~ 唔信就算!)

我即時跑過馬路另一邊 + 失去理智地向電話裡面既老公大叫: 條PK 跟住我呀!!! 狗公見我講緊電話,可能知我班緊人,再次轉身鬆人!!

今次我決定唔可以再放佢走,於是我即時追住狗公!!! 條街好多人,但狗公並唔知我跟蹤佢~ 我留意到佢一路行一路眼甘甘及經過佢身邊既少女......(真係賤!!!)

我曾經唸過放棄,但我條氣真係好唔順! 我亦曾經停落來向一對父子求救,但對方竟然叫我call the police! 我夠知要call police 啦!!! call 得來狗公都走Q咗唔知去邊啦!!

狗公經過一條後巷,我照跟! 當時後巷裡面有兩位阿嬸喺度煲煙閒聊 (我估佢地係店舖職員break 緊~),其中一個阿嬸見到我邊喊邊跑,上前問我咩事,我向阿嬸講出事件之後繼續追狗公,阿嬸喺我身後叫我要小心......

終於追咗狗公整整3條街,狗公喺一個巴士站停落來等車! 佢仍然唔知我一直跟蹤佢,而依個時候老公終於趕到! 老公即時上前質問狗公,狗公當然唔認啦! 不停死撐話"唔知我地講乜!"

我: 你睇吓個PK條褲鍊都未拉呀!!!

狗公望望自己褲鍊 + 即時拉返......不過巴士站前有一對年輕 + 推住BB車既chav,個男既都無出聲,但個女chav 用手推老公 + 指住老公鬧: Hey! What are you doing? 老公話狗公喺我面前露械,女chav 竟然話: So what? He's an old man! (咁又點? 佢係一個阿伯!) 哇~~~ 阿伯大哂呀?? 阿伯就可以公眾露械呀???

狗公趁老公 + 女chav 嘈緊,混亂中又想鬆人......我叫老公唔好理女chav,追返狗公~ 沿途我地一直留意有無警察,老公仲用手機拍低狗公樣貌!

終於我地跟咗都唔知幾多條街,到咗Queen Street 火車站附近,老公就叫我入去火車站既差館報警,老公就繼續跟住狗公......

最後有一男一女差人陪同我會合老公~ 老公當時身在Glasgow City Centre Gallery of Modern Art 門前 - 原來老公跟到Gallery 門口,咁啱同時遇到警察!

女警體貼地將我帶到Gallery 門前銅像既另一邊 - 我望唔到狗公既地方,先初步向我了解事發經過......最後一干人等全部返哂Queen Street 火車站差館落口供......

落完口供之後,女警搭一搭我膞頭表示同情 + 好坦白咁同我講 - 由於目擊者 + 當事人只有我一個,應該好難告到狗公! 但因為我落咗口供投訴,所以佢地會鎖狗公入臭格最少4粒鐘! 佢地亦會返去事發地點附近,睇吓附近有無CCTV錄到事發經過,不過機會好微......

之後有兩名警員用警車車我地返去事發既pound shop,查問果位我向佢投訴,但乜野都唔做既"靚"仔印籍店員,果位店員戇居居咁同警員講: 佢係有投訴,不過我只見到個男人背面......我即時無名火起,當住差佬面前大鬧"靚"仔印籍店員: 真係多Z謝你乜都唔做,所以個賤人喺街跟$住我!!! (其實我喺公眾地方講粗口,差佬係有權拉我既......不過我唸佢地都體諒我當時心情,所以只係好聲地叫我calm down......)

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
事件到此告一段落~ 不過果條狗公既樣至今我仍然記得清清楚楚!

每次我講返依次經驗,都會有人問我: 星期六日光日白,人來人往既街頭,真係無其他人見到狗公既行為? (連向我落口供既女警都有問過我!)

我真係唔知! 我自己都覺得狗公真係好誇張 + 好搶狂! 我只可以講或者有人見到但唔出聲; 但亦有可能就係因為條街太多人,唔會有人特別留意一個模樣普通既阿伯! 再加上當時天氣寒冷,個個都著到成隻粽咁,要即時收埋都好容易......

我曾經為咗依件事唔開心咗一段時間,不過老公安慰我話我好勇敢! 佢話我咁做可能令狗公以後唔敢再犯,唔會再有下一個受害人,間接幫到其他人......

我幾乎可以肯定狗公既行為並唔係第一次,而且我覺得佢應該會再犯! 我真係好唔明點解依種變態狗公,硬係要喺公眾地方先可以有快感?

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

後記

幾個星期後,我收到警方轉介Victim Support 既社工來電,問我需唔需要佢地提供社工心理輔導,我婉拒咗佢地既好意~ 佢地最後同我講,若我change my mind,隨時可以打電話比佢地約時間......



16 則留言:

  1. Gaileは林家歐巴桑2010年1月22日 下午7:20

    我都有過類似經驗,嗰時我好似讀緊F.3,有次放學我搭bus返屋企,喺巴士度俾條友公然摸大脾....我嗰日就係咁岩唔記得帶mobile,巴士上面另有兩個乘客,我坐最後座,條死pk就坐左我隔離,仲一直迫過黎...
    我就以為巴士關係就算啦,睇條pk斯斯文文就唔為意,後來我差唔多到站時,佢隻手開始放喺我椅背度借d椅摸我條腰,我就知條pk擺明非禮,我到站要起身落車時,佢就成隻手伸左入我校裙度摸我大脾,我當然好驚但只係用粗口鬧左佢一句,死pk,你變X態架,車上兩個乘客只係望左我一睇,個司機又好似等緊我落車,當時F3仲細個唔知道點好,又冇帶電話,又好驚,就咁講句粗口就落車...
    之後諗返有d後悔,我應該向司機投訴,同埋同車上果兩個乘客講,我當時諗車上既乘客背對我地根本見唔到,我叫非禮都冇用,其實咁樣係唔岩,因為我放過左佢,佢又會去傷害其他女仔....
    我完全明白妳當然冇助既感受,不過我覺得妳真係好勇敢,起碼我當然都唔識得好似妳咁做...
    [版主回覆01/23/2010 23:32:00]年紀輕時可能真係唔識處理依d情況! 因為太突然嘞,又驚又嬲一時間真係會不知所措.......不過有時就算識向人求救,人地都未必會幫自己! 好似果個死"靚"仔店員咁 - 我喺佢既店遇事,我向佢投訴唔係要佢捉住個狗公,但佢最少應該知會老闆有事發生! 佢比我既反應,真係令我好反感!!! 我話想星佢一巴係真既! 因為佢個樣好似聽到個好好笑既笑話!
     
    我覺得果日我 + 老公遇到好多種族歧視既人! 依個印籍店員故然係啦~ 另外個女chav 仲加不知所謂! 我覺得佢認為2個中國人指住個鬼佬阿伯來鬧,覺得我地蝦緊個阿伯! 佢自己做咗人阿媽推住個BB女,阿伯露械竟然話"so what?" 既然佢唔認為阿伯露械有乜大不了,如果佢 + 狗公上咗巴士,狗公對住佢個BB女露械既話,我真係想知佢做阿媽會有咩反應囉!!!
     
     

    回覆刪除
  2. 你真叻而且非常冷靜 , 真是我們婦女界的典範 .
    [版主回覆01/23/2010 23:19:00]冷靜其實我未夠冷靜~ 典範就更加講唔上! 如果我夠冷靜,應該即時影低佢既惡行!! 不過而家總算對狗公有些少阻嚇作用~
     
     

    回覆刪除
  3. 我都有試過類似經驗呀~
    第一次讀書時代~ 放學後成班女仔係公園仔傾計~
    個公園都算偏僻~ 當時見到有個男人係草叢邊~
    但我地無理佢~ 點知轉頭見到佢露械!!!!!
    不過當時年紀細~ 成班女仔都無理佢~ 之後見佢搞掂咗就走咗.......
    第二年係同同學搭車番學途中~ 比人摸pat pat~ 一摸完佢即刻落車~
    我同同學追佢九條街~ 但因為趕住番學~ 最後都無繼續追.....
    [版主回覆01/23/2010 23:16:00]做女人真係要特別小心! 而且遇到依d事一定要出聲,唔可以助長依類狗公既惡行!!!
     
     

    回覆刪除
  4. 我在香港讀書時都撞過, 但在英國未撞過! 你真係好震定, 追佢九條街! 做得好! 起碼俾佢一個"知"字, 婦女不係好"蝦"!!
    [版主回覆01/23/2010 23:13:00]唸返起其實我覺得自己都係唔夠鎮定~ 狗公喺街度跟住我時,我應該即時用相機影低佢既變態行為! 咁就一定告得佢入!!! 不過而家總算唔多唔少可以阻嚇到佢~
     
     

    回覆刪除
  5. 你好勇敢, 跟住佢..如果係我, 可能太驚只係會識得好無助咁喊..
    真係好心D男人啦..將心比已, 如果果個係老婆/個女你又會咩反應!!
    [版主回覆01/24/2010 23:26:00]我夠膽跟住狗公,都係被佢迫出來架咋! 邊有唸過佢咁賤喺街度跟住我? 如果佢唔係返轉頭既話,我根本無機會~ 以為我細粒 + 喊就好蝦呀? 佢真係自己攞來衰!
     
     

    回覆刪除
  6. 絕對係種族歧視,掉轉你係佢個 race , 佢可能幫你追九條街,如果我係你,一聽見佢話 So What !  已經唔會同佢講落去
    [版主回覆01/24/2010 23:19:00]係條八婆捉住老公來鬧之嘛! 佢自己唔知頭唔知路就扮哂正義!
     
     

    回覆刪除
  7. 妖....真激死, 打了好大段字又冇哂呀 , 等我夜D用WORD 打我遇狗公的經過先....
    [版主回覆01/24/2010 23:16:00]下次記住打完內容後先copy 一次嘞!
     
     

    回覆刪除
  8. 我讀書時[中學]都遇過架..仲不少女同學中招添... 其實係佢地見到先架, 佢地講完我地知, 之後就到我&我同學一齊遇到.  可能有心理準備喇...所我地都唔係太驚, 佢係著住件褸, 無著褲個D..死狗公. 結果我 &同學遇見佢時拋得一句: 得咁細條就咪鬼拎出黎獻世喇! 跟住無理佢斷續吹水, 佢超無癮起收返埋佢閃左.. 返到屋企同亞媽講, 點知佢都有遇過[原來狗公係可以經得上時代變遷架] 我媽仲激過我呀..佢話當然見到狗公..附近有"腸粉檔" 即時搶左把較剪追住狗公大叫: "變賤佬, 你咪走呀, 露得咁過癮呀! 剪左你落黎睇下係咪咁過癮! 嚇到個狗公跑得仲快過 欄王呀!
    [版主回覆01/25/2010 20:36:00]果時喺香港我讀女校,聽過有人話學校後門度閘仔成日有同一個狗公喺條罅度伸入來,學校都報度警備案~ 但我自己就未見過!
     
    哈哈~~~ 伯母好掂喎!!!
     
     

    回覆刪除
  9. 嘩!!!呢個阿伯,你叫佢食屎啦,咁多人C唔見佢C既,呢D咁既賤人最好拉佢去打把,我都唔明點解D人可以咁賤,我記得我細細個去荃灣既公園,有個男人係度玩自己果度,頂!!成班小朋友個PK都唔放過,真係PK黎架,當時我得幾歲又唔識嗌,比個賤人嚇到C,如果而家再遇到呢D事,我一定上前屌佢一獲金,之後再報警,呢D人唔可以放過佢!!
    [版主回覆01/25/2010 20:31:00]依個狗公直頭人渣啦! 邊有唸到佢會衰到走咗又行返出來跟住我? 以為我喊就係怕咗佢? 佢真係自己攞來衰!!!
     
     

    回覆刪除
  10. 阿伯就可以露械? 講嗰件真係好有問題囉
     
    係咪佢地見你地係華人,所以咁呢…
     
    我中學嗰陣係又一村讀書,好多同學行落去穿花墟公園行出太子,如果補完課嗰邊就比較靜,尤其落雨天,成日都有個乾濕褸露體狂係嗰邊露械,好多同學都見過,試過有一次狼到追住兩個同學,嚇到佢地跑返學校,學校阿sir即刻跑落去,件變態佬已經走咗,到我畢業都未捕到件變態佬
    [版主回覆01/25/2010 20:29:00]果個女chav 直頭不知所謂! 唔知頭唔知路以為我地恰個阿伯~ 其實我地同佢講咗咩事後,佢又做咗人阿媽,我唔信佢真係覺得無問題囉! 佢老公一直都無出聲,我覺得佢只係喺中國人面前唔衰得先死撐話so what!
     
    我覺得d狗公見到妳越驚就會越得戚! 我而家唔驚架嘞,總之有咩風吹草動,我就搞大佢! 等佢地唔好以為我細粒就好蝦!!!
     
     

    回覆刪除
  11. 俾我係男人都唔幫....我個 ex之前都俾人 0係 地鐵摸 patpat
    之後好彩俾 便衣警察見到, 幫手捉左佢上差館....
    [版主回覆01/25/2010 20:23:00]我相信任何正常人都唔會覺得個阿伯無問題! 所以果位女chav 既反應令我好意外!!!
     
    女人遇到依種事真係唔可以退縮! 點都要搞大佢,盡可能拉佢地上差館! 唔好比d狗公再搞其他人!!!
     
     

    回覆刪除
  12. 妳真係好勇敢呀, 不過最緊要自己安全
    [版主回覆01/28/2010 20:17:00]我咁勇其實都係比個狗公迫出來架咋......日光日白我都應該好安全既,夜晚我就一定唔會嘞!
     
     

    回覆刪除
  13. 你已經好勁, 仲可以追到個阿伯! 年紀大又怎樣, 死變態佬!
    但我覺得個chav女更黑我憎
    [版主回覆02/01/2010 20:18:00]咁咪係囉! 年紀大就可以亂來架! 衰d講句 - 咁係咪佢年紀大強姦咗人都無問題???
     
    英國好多chav 係種族歧視既! 個八婆唔知頭唔知路以為我地蝦個阿伯,老公話咗比佢知咩事,佢仍然鬧我地不是! 我唔排除果個八婆係種族歧視囉!!!
     
     

    回覆刪除
  14. V 你好堅喎,我諗我除左驚同呆,再做唔出任何反應。至於嗰個印藉店員同女chav,正正演活了「各家自掃門前雪,那理他人瓦上霜。」呢句話。
    [版主回覆01/21/2011 18:40:00]其實我都好驚 + 好呆架!! 不過隻狗公好似我越驚佢越興奮咁款,一次又一次跟住我,我條氣真係好唔順先焗住跟住佢架咋!! 事後唸返起我真係唔夠冷靜 - 我應該攞個相機出來影隻狗公惡行嘛! 咁就一定告得佢入!!!
     
    個印藉0靚仔 + 個女chav 直頭不知所謂啦! 有朋友話個0靚仔有可能未夠秤出來做野又或者唔合法居留,所以唔想搞大件事喎......
     
     

    回覆刪除
  15. 我細個讀中一時,响巴士同個同學一齊遇倒嗰個狗公仲嘔心,佢响架車度對住响咸書度撕落嚟嘅其中一頁打飛機,但我哋只係坐响後兩排咋........
    [版主回覆01/23/2011 02:50:00]妳地遇到依隻狗公佢自己對住鹹書打係佢既事吖! 但我遇著果隻個目標係我......
     
     

    回覆刪除
  16. 哈哈,我講得唔清楚,佢對住咸書嘅同時,都一路擰轉頭望住我哋架,呢個先係最驚,我哋仲响度商量,如果我哋落車時佢未落車,我哋點行過佢身邊,好在佢落車先過我哋咋
    [版主回覆01/23/2011 21:16:00]如果係我我會即時同司機講! 但最少佢無跟住妳地吖~
     
     

    回覆刪除

Related Posts Plugin for WordPress, Blogger...