I Love My Kitchen!!!! (2010年1月20日)

前日(1月18日)煮咗餐四餸一湯，煲羊肉好鬼大煲食唔哂! 本來唸住尋晚dinner 食隔夜餸...不過老公lunch 打電話來問我想唔想食壽司......

 所以尋晚(1月19日)又去咗YO!Sushi 食6折壽司!
今次食咗16碟，另加一碗Spicy Seafood Udon~ (碗烏冬鹹死人!!!!!)

 佢地個炸軟殼蟹手卷好鬼正~~~~~
本來唸住食完壽司去睇戲，不過最後食得飽得滯返咗屋企!

 前日剩低既羊肉煲，炒多碟芥蘭苗 + 煎咗4隻蛋，就成為咗今晚既晚餐~

我趁住今日唔洗預備晚餐，喺廚房一次過整咗幾樣野......

 先煮咗湯種來整伯爵奶茶吐司~
前晚四餸一湯食咗最後2隻鹹蛋存貨，趁住吐司發酵緊......

 醃好6隻鹹蛋! 今次用裹鹽法~
再來下一樣對我來講係個挑戰 -
豬大腸!
我好鍾意食豬大腸~~~ 不過自己親手整就係第一次!

 喺泗和行買到依種包裝好既急凍豬大腸，尋晚放定喺普通格溶雪......

 雖然豬大腸本身已經洗得好乾淨，不過真係好鬼臭!!!!!!
無計啦! 始終豬大腸用來裝過"2號仔"......鬼叫自己鍾意食，又咁鬼為食咩!

唯有迫自己一味只唸住整好後既美食樣~~~~

  Ta Da!!! 整好後果然好鬼正~~~ 不枉我一大輪功夫!

不過依碟野係留返聽晚用來炒鹹酸菜既~
(但我切片時偷食咗一塊! 嘻嘻~~~)

好鬼鍾意自己個廚房!!!

真係全日喱喺裡面都唔會悶~~~

 湯種伯爵奶茶吐司食譜click here~

 自製鹹蛋 - 裹鹽法click here~