2010年1月11日星期一

湯種北海道牛奶吐司


 買咗本"65C湯種麵包"咁耐,終於開工整咗第一個湯種麵包 - 北海道牛奶吐司!

書中並無指明要用北海道牛奶,就算有指明依度都無得賣......

 所以我用咗我至愛既香濃Channel Island Jersey Milk~

 今次試吓用新買既Waitrose 高筋麵粉!


_342.gif image by veronica_tsim 份量 + 做法均經我個人修改~

1. 先煮湯種:

 將水和高筋麵粉拌勻。水和高筋麵粉比例為5:1; e.g. 清水300g 加入高筋麵粉60g拌勻~

 一面加熱一面搞拌以防黐底。

加熱至攝氏65度離火,蓋上保鮮紙,待涼至室溫才可使用。

2. 乾材料: 高筋麵粉270g, 糖43g,  鹽4g, 快速酵母6g~

3. 濕材料: 細雞蛋1隻(全蛋), 動物性鮮奶油 (Single Cream) 30g, 牛奶27g, 湯種92g, 天然牛奶香料4g (唔知係咩來,所以無用到!)

4. 將乾材料和濕材料放入大盆內先用慢速拌勻。

5. 材料拌勻後改用中速拌至有筋性,加入無鹽牛油25g,先用慢速拌勻後,再改用中速搞拌。

6. 搞拌至麵糰可拉開薄膜,破洞邊緣為光滑狀為止。

7. 將麵糰封好,發酵40分鐘。 (溫度28C; 濕度75%)

8. 取出麵糰,將麵糰4邊各向中央摺一下,再封好靜置室溫發酵10至15分鐘。

9. 將麵糰拉長 + 壓扁,由上而下捲實。

10. 捲至尾將麵糰尾部拉爛,再往下捲 + 收口向下; 吐司模內層塗油,放入捲好的麵糰進行最後發酵至約吐司模八成。(圖片做法請參考方包食譜~)

P.S. 書中係將麵糰一分為二,分別捲成造型! 但我唔鍾意分開兩舊~

11. 包面塗上蛋液,放入已預熱焗爐170C,烤焗25至30分鐘至表面金黃即成。

 今次用咗扑星Day 減價時買既方包焗盆~
湯種整出來既麵包果然好軟熟!c562502d.gif image by veronica_tsim

不過多數煮一次湯種都用唔哂......
_342.gif image by veronica_tsim多出來既湯種,可以密封放入雪櫃保存1-2天; 當湯種變咗灰色時就唔可以再用架嘞!!!



19 則留言:

  1. 你又整包包,上色得好靚仔,包包好軟熟咁喎!!!
    [版主回覆01/12/2010 19:07:00]多謝! 係呀~ 今朝起身切來食都好軟熟架!
     
     
     
     

    回覆刪除
  2. Gaileは林家歐巴桑2010年1月11日 下午5:34

    個包攪到我好肚餓呀,我仲未食早餐架~~ 個皮甩左妳唔講我都唔知
    依邊既普通supermarket都有賣北海道牛奶(我唔認為真係來自北海道囉)...所以用普通牛奶都好可以整得好香奶味架...
     
    [版主回覆01/12/2010 19:05:00]我覺得北海道牛奶完全overrated! 我真係飲唔出好多人形容既所謂香濃........jersey milk 先係我飲過最好既牛奶!
     
     

    回覆刪除
  3. 個包包真係好靚呀  都係我衰,未食早餐就走入黎,好鬼肚餓囉
    [版主回覆01/12/2010 19:03:00]快d去搽麵包啦! 妳屋企又有玫瑰士多啤梨果醬又有洛神花醬~
     
     

    回覆刪除
  4. 終於都開工做包包喇 .... 幾靚喎.....
    [版主回覆01/12/2010 19:02:00]多謝讚賞~
     
     

    回覆刪除
  5. 用嚟揸牛油或果醬,一流..
    [版主回覆01/12/2010 19:01:00]係呀~ 我都整咗樽果醬!
     
     

    回覆刪除
  6. 湯種既麵包真係好軟熟好好味,我上次整完之後,而家又心郁郁想整,不過呢幾日太凍,所以又偷懶~~我隻腳凍到生蘿白仔,而家行路痛到CC下,慘!!
    [版主回覆01/12/2010 19:01:00]妳血液循環唔好呀~ 妳試吓臨瞓前先用熱水浸下手腳,咁樣可以幫入睡後血液循環架!
     
    仲有香港應該有腳用暖包賣? 唔好嫌麻煩~ 太凍時最好用啦! 我依度零下,但我從來都無生過蘿蔔仔架!
     
     

    回覆刪除
  7. 捲得好令啊,我上次整全mug吐司.....切開好樣衰,我都係跟65度整,不過整出o黎好似發育不良咁-_- 好彩好軟熟
    [版主回覆01/12/2010 18:47:00]多謝~ 可能妳上次發酵發得唔好?
     
     

    回覆刪除
  8. 唔該,....留番一磅比我唷=)
    [版主回覆01/12/2010 21:25:00]1磅夠唔夠呀?
     
     

    回覆刪除
  9. 搽果醬,花生醬都好好味
    [版主回覆01/13/2010 07:37:00]我鍾意果醬多d~ 我好少食花生醬架!
     
     

    回覆刪除
  10. 唔好面包既我都覺得好吸引呀!!!
    同黎配牛油同果醬就最岩......加多杯香濃coffee就perfect啦!!
    [版主回覆01/13/2010 07:36:00]Thanks Jane~ 我都整咗果醬啊!
     
    不過咖啡唔啱我.....
     
     

    回覆刪除
  11. The bread looks soft and yummy. And the color is great too.
     
    YOu are the expert
    [版主回覆01/13/2010 07:35:00]thanks very much YanYan! but im not an expert~
     
     

    回覆刪除
  12. 好似好難整咁...好叻呀你
    [版主回覆01/13/2010 19:56:00]唔難唔難~ 包包其實唔係咁難整架咋!
     
     

    回覆刪除
  13. 嘩~ 見到你個包包又想起~~ 我好耐冇整包啦~~
    [版主回覆01/13/2010 19:56:00]部mixer 壞咗,weekend 先得閒攞去整~ 暫時我都整唔到包包咯.....
     
     

    回覆刪除
  14. 好有心得, 好有心機!! 你個溫度計在那裡買的呀?
    [版主回覆01/13/2010 19:54:00]個溫度計係我上次同妳講果間Lakeland 買架!
     
    其實我曾經網上睇到一位烹飪高人講過 - 湯種唔係一定要exactly 65C~ 只要煮到湯麵係杰杰地既麵糊狀,過咗65C都一樣可以,麵包出來效果一樣軟綿綿! (不過我未試過....... )
     
     

    回覆刪除
  15. 睇落好似好易, 等我都試下先
    [版主回覆01/20/2010 08:20:00]做落就知道唔難架嘞!
     
     

    回覆刪除
  16. 哈哈﹐ 唔好意思﹐ 因為打算整包包所以睇番你之前0既blog, 我想問下﹐ 點為知 薄膜? 我試過搓好耐都唔覺有﹐ 係咪要用麵包機? 通常要搓幾耐? 上次搓到我手都酸哂﹐ 好慘! 仲有﹐ 動物性鮮奶油是什麼? 唔知點解我次次發 酵都好耐﹐ 人地話大約一個鐘﹐ 點解我要成起碼2個鐘發呢? 有無方法可以快D發完? thank you定先
    [版主回覆10/22/2010 21:42:00]問野唔洗唔好意思~  薄膜既意思係可以拉到半透明既膜狀囉! 其實只要搓到麵糰光滑唔黐手就已經可以攞去發酵架嘞! 唔係要用麵包機呀 - 我自己都無麵包機.....
     
    真係好難講要搓幾耐果喎! 每個人用既力度、材料唔同e.g. 唔同麵粉受水性可能唔同.....妳可以先用mixer 麵糰勾打勻材料成麵糰,然後再改用手搓,咁會容易好多!
     
    動物性鮮奶油上面咪講咗係single cream 囉!
     
    至於發酵既問題 - 濕度、溫度 + 麵糰搓得是否均勻,都會影響到麵糰發酵效果! 妳可以先將焗爐預熱至50C左右然後熄火, 搓好麵糰後放喺大碗,再用厚既濕布蓋住住大碗,連大碗一齊放入焗爐裡面發酵~ (可以另外放多一碗熱水!) 咁應該會快d完成發酵~
     
     

    回覆刪除
  17. 我想問.. 我係超市見到Strong White Bread Flour 同 Bread Flour有無分別傢? 還是一樣?
    [版主回覆11/08/2010 01:55:00]麵粉一般分為高、中、低筋 - 高筋粉即bread flour; 中筋粉plain flour; 低筋粉cake flour! 而筋性係高係低,決定於麵粉所含既蛋白質~
     
    Strong white bread flour 比bread flour 筋性更高,換句說話即係蛋白質含量更高! 因為筋性高,所以搓出來既麵包更柔軟~
     
     

    回覆刪除
  18. 嘩!個面包盤好得意呀!
    [版主回覆02/26/2011 23:42:00]係呀~ 仲好易脫模呢!
     
     

    回覆刪除
  19. 其實係點計 材料中高筋麵粉 和湯種 的比例的?   我成日都唔明點計出來呀?  例如你是用92g湯種, 很零叮啊.
    謝謝.
    [版主回覆09/23/2011 18:49:00]做唔同麵包湯種用量比例都唔相同! 通常做吐司湯種份量係佔麵包材料總重15至20%~
     
    我係照住65C本書既比例,不過我個模比書中用既細,所以我自行用比例來減返份量,that's why 有個零叮數~ 不過要個電子磅就係用來磅依d零叮數架啦!
     
     

    回覆刪除

Related Posts Plugin for WordPress, Blogger...