新口味 - 2010年5月3日

邊檔牛雜咁抵食? 緊係"V記"啦!

上星期整咗煲滷水豬雜 (網誌)，滷水只用一次就太浪費嘞......

 所以再滷一次金錢肚 + 牛孖筋!
第一次整牛肚......哇~~~~~ 原來急凍牛肚溶咗雪都好臭吓架!!!! 臭到我差d想揼咗佢，但又覺得太浪費......
所以先頂硬上整咗佢! 好彩我堅持啫 - 因為完成品好有街邊風味好好食!

 特登串住來食，合埋眼真係以為自己返咗香港呀!

哈! 街邊檔邊有我咁大串?

 見德國扑友MuiMuimui 激讚依隻印尼出品既營多撈麵 (Indomie)，見泗和有售我又買來試吓!

 每包撈麵裡面有4小包調味料......

包麵咁鬼細包，一次要淥哂2個先夠!

 淥完麵將所有調味料撈拌就食得! (2個麵有8包調味料，感覺少少麻鬼煩......)

一食落口就有種似曾相識既感覺......

係日清香蒜味撈麵呀!!!!

初來英時我好鍾意買日清撈麵來食，不過只限香蒜味~ 但後來日清撈麵消失咗無得賣.......

依個營多撈麵幾乎同日清既香蒜味撈麵味道一模一樣! 不過麵條比日清既更爽口彈牙，仲加好食過日清撈麵!!

 一碟營多撈麵，加一兜牛孖筋 + 金錢肚~

非常無益但好好味既一餐!

老公唔食牛雜，所以佢自己買三文治食~

買咗2個撈麵，一餐已經食鬼哂! 下星期要去入多幾包先得!!!